ADផ្ទាំងផ្សព្វផ្សាយពាណិជ្ជកម្ម

Picture
  • ភ្នំពេញ

រាជរដ្ឋាភិបាល បាន​បង្កើត​វេទិកា​ទិវា​ជាតិ​ទីក្រុង​ស្អាត​ជា​រៀង​រាល់​ឆ្នាំ ដោយ​មាន​ទាំង​ការ​ប្រ​ទ្ប​ង​ប្រណាំង​ទីក្រុង​ស្អាត ហើយ​បាន​វាយតម្លៃ និង​ចាត់​ចំណាត់ថ្នាក់​ក្រុង​ខណ្ឌ ដែល​ទទួល​បាន​ជ​យ័​លា​ភី ផ្ការំដួល​១​ទង ជ័យ​លា​ភី​ផ្ការំដួល​២​ទង និង​ជ័យ​លា​ភី​ផ្កា​រំ​ដួង​៣​ទង​។ នៅ​ឆ្នាំ​នេះ ទីក្រុង​ខណ្ឌ ដែល​ទទួល​បាន​ជ័យ​លា​ភី​ផ្ការំដួល​៣​ទង មាន

រាជធានី​ភ្នំពេញ ៖ រាជរដ្ឋាភិបាល បាន​បង្កើត​វេទិកា​ទិវា​ជាតិ​ទីក្រុង​ស្អាត​ជា​រៀង​រាល់​ឆ្នាំ ដោយ​មាន​ទាំង​ការ​ប្រ​ទ្ប​ង​ប្រណាំង​ទីក្រុង​ស្អាត ហើយ​បាន​វាយតម្លៃ និង​ចាត់​ចំណាត់ថ្នាក់​ក្រុង​ខណ្ឌ ដែល​ទទួល​បាន​ជ​យ័​លា​ភី ផ្ការំដួល​១​ទង ជ័យ​លា​ភី​ផ្ការំដួល​២​ទង និង​ជ័យ​លា​ភី​ផ្កា​រំ​ដួង​៣​ទង​។ នៅ​ឆ្នាំ​នេះ ទីក្រុង​ខណ្ឌ ដែល​ទទួល​បាន​ជ័យ​លា​ភី​ផ្ការំដួល​៣​ទង មាន​៧​ក្រុង​-​ខណ្ឌ ខណៈ​ដែល​ក្រុង​ខណ្ឌ​ចំនួន​១៧ ទទួល​បាន​ផ្ការំដួល​២​ទង​។ សម្រាប់​ជ័យ​លា​ភី ផ្ការំដួល​១​ទង មាន​ចំនួន​១៤​ក្រុង​ខណ្ឌ​។

លទ្ធផល​នៃ​ចលនា​ប្រឡងប្រណាំង​ទីក្រុង​ស្អាត​លើក​ទី​៣ នៅ​ឆ្នាំ​២០២៣​នេះ មាន​បេក្ខភាព​ក្រុង​-​ខណ្ឌ ចូលរួម​ប្រឡងប្រណាំង​សរុប​ចំនួន​៤១ (១៤​ខណ្ឌ និង​២៧​ក្រុង​) ក្នុង​នោះ​មាន​បេក្ខភាព​ចំនួន​៣៨ ដែល​ទទួល​បាន​ជ័យ​លា​ភី​។ ជ័យ​លា​ភី​ផ្ការំដួល​៣​ទង មាន​ចំនួន​៧​ក្រុង​-​ខណ្ឌ (៦​ក្រុង និង​១​ខណ្ឌ​) ដែល​រួម​មាន ៖ ក្រុងព្រះសីហនុ​, ក្រុង​បាត់ដំបង​, ក្រុង​សៀមរាប​, ក្រុងកែប​, ក្រុង​កំពត​, ក្រុង​កំពង់ចាម​, និង​ខណ្ឌដូនពេញ​។

សម្រាប់​ជ័យ​លា​ភី​ផ្ការំដួល​២​ទង មាន​ចំនួន​១៧ (១៤​ក្រុង និង​៣​ខណ្ឌ​) ដែល​រួម​មាន ៖ ក្រុង​កំពង់ឆ្នាំង​, ក្រុង​បាន​លុង​, ក្រុង​ពោធិ៍សាត់​, ក្រុង​ប៉ោយ​ប៉ែ​ត​, ក្រុង​ច្បារមន​, ក្រុង​ក្រចេះ​, ក្រុង​សិរី​សោភ័ណ​, ក្រុង​ស្ទឹង​សែន​, ក្រុង​សួង​, ខណ្ឌទួលគោក​, ខណ្ឌ​៧​មក​រា​, ក្រុង​ព្រៃវែង​, ក្រុង​ស្វាយ​រៀង​, ខណ្ឌដង្កោ​, ក្រុង​សែន​មនោ​រម្យ​, ក្រុងប៉ៃលិន និង​ក្រុង​តា​ខ្មៅ​។

ដោយ​ទ្បែ​ក​សម្រាប់​ជ័យ​លា​ភី​ផ្ការំដួល​១​ទង មាន​ចំនួន​១៤ (៦​ក្រុង និង​៨​ខណ្ឌ​) ដែល​រួម​មាន ៖ ក្រុង​ស្ទឹង​ត្រែង​, ក្រុង​ព្រះ​វិហារ​, ខណ្ឌ​សែន​សុខ​, ក្រុង​សំរោង​, ក្រុង​បា​វិត , ខណ្ឌចំការមន​, ខណ្ឌ​ជ្រោយចង្វារ​, ខណ្ឌ​ព្រែក​ព្នៅ​, ខណ្ឌ​ពោធិ៍​សែន​ជ័យ​, ក្រុង​ដូន​កែវ​, ក្រុង​ខេមរភូមិន្ទ​, ខណ្ឌ​មាន​ជ័ យ​, ខណ្ឌ​ច្បារ​អំពៅ និង​ខណ្ឌ​បឹង​កេងកង​។

ចំណែក​ក្រុង​ខណ្ឌ ដែល​មិន​ទទួល​បាន​ចំណាត់ថ្នាក់​ផ្ការំដួល មាន​ចំនួន​៣​បេក្ខភាព (១​ក្រុង និង​២​ខណ្ឌ​) រួម​មាន ៖ ខណ្ឌ​ឬ​ស្សី​កែវ​, ក្រុង​កោះ​រ៉ុ​ង និង​ខណ្ឌ​កំ​បូល​។

ជ័យ​លា​ភី​ទីក្រុង​ស្អាត ដែល​បាន​ផ្តល់​ជូន​ក្រុង និង​ខណ្ឌ​ប្រចាំឆ្នាំ​នេះ គឺជា​ការ​លើកទឹកចិត្ត​ទៅ​នឹង​កិច្ច​ខិតខំ​ប្រែង​របស់​អាជ្ញាធរ​ក្រុង​ខណ្ឌ​នីមួយ​ៗ​ក្នុង​ការ​អនុវត្ត​ការងារ​ទីក្រុង​ស្អាត ដែល​សុទ្ធតែ​ជា​ការងារ​ជា​ប្រក្រតី​របស់​រដ្ឋបាល​ដែនដី ដូច​ជា ការ​គ្រប់គ្រង​សំណល់ ភាព​ស្អាត ភាព​ទាក់ទាញ​ផ្នែក​ទេសចរណ៍ ហេដ្ឋារចនាសម្ព័ន្ធ ការ​រៀបចំ​ផែនការមេ និង​ការ​អនុវត្ត​គោលនយោបាយ​ភូមិ​-​ឃុំ​-​សង្កាត់ មាន​សុវត្ថិភាព​ជាដើម​។

ទន្ទឹម​នឹង​ចលនា​ប្រឡងប្រណាំង​ទីក្រុង​ស្អាត​នេះ អាជ្ញាធរ​រាជធានី​ខេត្ត ក្រុង ស្រុក ខណ្ឌ ក៏​បាន​ចលនា​មហាជន សិស្ស និស្សិត ជួប​ប្រារព្ធ​ទិវា​ទីក្រុង​ស្អាត ក្រោយ​ម​ប្រធានបទ «​ទីក្រុង​ស្អាត បដិសណ្ឋារកិច្ច​ល្អ ម្ចាស់ផ្ទះ​កម្ពុជា ផ្តល់​ភាព​កក់ក្តៅ ឆ្នាំ​២០២៣»​។ ការ​ជួបជុំ​ប្រារព្ធ​ទិវា​នេះ បាន​ធ្វើ​ឡើង​ដាច់​ដោយឡែក​ពី​គ្នា​ជា​បន្តបន្ទាប់​នៅ​រាជធានី​ខេត្ត ក្រុង ស្រុក ខណ្ឌ​ជា​ច្រើន​។

នៅ​រាជធានី​ភ្នំពេញ កាលពី​ខែកុម្ភៈ មាន​ពិធី​ជួបជុំ និង​ដើរ​រើស​សំរាម​នៅ​វិមាន​ឈ្នះ​ឈ្នះ និង​តាម​ផ្លូវ​នៅ​មុខ​ពហុ​កីឡដ្ឋាន​ជាតិ​មរតក​តេ​ជោ ដែល​ជា​កន្លែង​រៀបចំ​ការ​ប្រកួត​កីឡា​ស៊ី​ហ្គេ​ម នា​ខែឧសភា ឆ្នាំ​២០២៣ ដែល​កម្ពុជា ធ្វើ​ជា​ម្ចាស់ផ្ទះ​។ ដោយឡែក​នៅ​ខេត្តស្វាយរៀង ក៏​មាន​ពិធី​ជួបជុំ​កាលពី​ព្រឹក​ថ្ងៃ​ទី​២៨ ខែកុម្ភៈ ឆ្នាំ​២០២៣ នៅ​វិទ្យាល័យ​ចំណេះ​ទូទៅ និង​បច្ចេកទេស​បា​វិត ស្ថិត​ក្នុង​សង្កាត់​បា​វិត ក្រុង​បា​វិត ខេត្តស្វាយរៀង​។

ក្នុង​ពិធី​ជួបជុំ​ទាំងនេះ ក្រៅពី​ថ្លែងការណ៍​របស់​ថ្នាក់ដឹកនាំ​ខេត្ត​-​រាជធានី ពាក់ព័ន្ធ​នឹង​បរិស្ថាន និង​ការ​ទុកដាក់​សំរាម​កាក​សំណល់​ឱ្យ​បាន​ត្រឹមត្រូវ ក៏​មាន​អ្នក​ដើរ​រើស​សំរាម ដែល​ត្រូវ​បាន​គេ​បោះចោល​ពាស​វាល​ពាស​កាល​ផង​ដែរ​។

ជា​ការ​ពិត កាក​សំណល់ ជា​ពិសេស​សំរាម​ផ្លា​ស្ទិ​ក ត្រូវ​បាន​គេ​បោះចោល​កាន់តែ​ច្រើន ពាស​វាល​ពាស​កាល នៅ​តាម​ផ្លូវ មិន​ថា ផ្លូវ​តូច ផ្លូវ​ធំ ឬ​ក៏​នៅ​ដី​ទំនេរ តាម​របង​សាលារៀន និង​របង​វត្ត​នោះ​ទេ​។ បញ្ហា​នេះ មិនមែន​កើតឡើង​តែ​នៅ​ភ្នំពេញ​ទេ គឺ​នៅ​តាម​បណ្តា​ខេត្ត​ជា​ច្រើន ក៏​កើតឡើង​បញ្ហា​សំរាម​នេះ​ដែរ ពិសេស​តាម​ស្រុកស្រែ​ចំការ និង​តំបន់​ព្រៃ​ភ្នំ​។

ដូច្នេះ​ដើម្បី​ដោះស្រាយ​បញ្ហា​កាក​សំណល់​សំរាម ពិសេស​សំណល់​ផ្ទា​ស្ទិ​ក ដូច​ជា ស្បោង ប្រអប់​ជ័រ កំប៉ុង​ជ័រ និង​ដប​ទឹក​សុទ្ធ ជាដើម​នេះ​បាន គឺ​ត្រូវ​ចាប់ផ្តើម​ពី​ប្រជាពលរដ្ឋ​យើង​ម្នាក់​ៗ​។ ម្នាក់​ៗ មិន​ចាំបាច់​ដល់​ថ្នាក់​ដើរ​រើស​សំរាម​តាម​ផ្លូវ​នោះ​ទេ គឺ​ម្នាក់​ៗ​ត្រឹមតែ​សម្អាតផ្ទះ​របស់​ខ្លួន ហើយ​វេច​ខ្ចប់​ទុកដាក់​សំរាម​របស់​ខ្លួន​មាន​របៀបរៀបរយ​ក៏​គ្រប់គ្រាន់ ដើម្បី​ធ្វើ​ឱ្យ​ផ្ទះ ភូមិ និង​ទីក្រុង​យើង​ស្អាត​ហើយ​។ នៅ​ពេល​ចេញ​ក្រៅ​ផ្ទះ បើ​មាន​សំរាម​កាក​សំណល់​អ្វី​ក៏​ដោយ ត្រូវ​តែ​វេច​ខ្ចប់ ហើយ​យក​ទៅ​បោះចោល​នៅ​ធុងសំរាម​។ បើ​មិន​មាន​ធុងសំរាម ត្រូវ​កាន់​យក​របស់​ទាំងនោះ ត្រឡប់​ទៅ​វិញ ដើម្បី​បោះចោល​ក្នុង​ធុងសំរាម​ត្រឹមត្រូវ​។

ចំណែក​អាជ្ញាធរ​សមត្ថកិច្ច​វិញ ត្រូវ​បង្កើត​ទីតាំង​ចោល​សំរាម​យ៉ាង​ហោច​ណាស់ ១​ភូមិ ឱ្យ​មាន ១​កន្លែង​។ រីឯ​ធុងសំរាម ក៏​ត្រូវ​តែ​ដាក់​ពង្រាយ​តាម​ផ្លូវ និង​ទី​សាធារណៈ សួនច្បារ សាលារៀន និង​តាម​វត្ត​អារាម​ជាដើម ជា​ពិសេស​នៅ​តំបន់​រមណីយដ្ឋាន​ទេសចរណ៍​។ នៅ​ពេល​មាន​ធុង សំរាម​ហើយ ក៏​ត្រូវ​តែ​មាន​អ្នក​ប្រមូល​យក​សំរាម និង​កាក​សំណល់​ទាំងនោះ​ជា​ប្រចាំ​រៀងរាល់ថ្ងៃ​។ នៅ​តាម​ស្រុក​-​ភូមិ និង​តាម​ផ្ទះ​ប្រជាពលរដ្ឋ​ក៏​ដូច​គ្នា ត្រូវ​តែ​មាន​ធុងសំរាម ហើយ​នៅ​ភ្នំពេញ និង​ទីប្រជុំជន ដែល​មាន​ក្រុមហ៊ុន​ឯកជន ផ្តល់​សេវា​ប្រមូល​សំរាម គឺ​ត្រូវ​តែ​ដឹក​ជញ្ជូន​កាក​សំណល់​សំរាម​ឱ្យ​ទៀងទាត់ បើ​មិន​បាន​រាល់ថ្ងៃ ក៏​ត្រូវ​តែ​២​ឬ​៣​ថ្ងៃ​ម្តង​ដែរ​។

នៅ​តាម​ភូមិ តាម​ទី​ជនបទ ក៏​ត្រូវ​តែ​មាន​កន្លែង​សម្រាប់​អ្នកស្រុក​អ្នក​ភូមិ​បោះចោល​សំរាម ដោយសារ​តែ​មិន​មាន​កន្លែង​បោះចោល​សំរាម ទើប​អ្នក​ភូមិ​ខ្លះ​បាន​ដឹក​ជញ្ជូន​សំរាម​កាក សំណល់​យក​ទៅ​បោះចោល​នៅ​ដី​វាល ឬ​ក៏​បោះចោល​តាម​ផ្លូវ បង្ក​ឱ្យ​ក្លាយជា​ក្លិន​មិនល្អ និង​ដាក់​តាំង​សំរាម កាក​សំណល់​បង្អួត​អ្នកទេសចរ និង​អ្នកដំណើរ​ជា​ហូរហែ ហើយ​សព្វថ្ងៃ សំរាម​មាននៅ​តាម​ផ្លូវ មិន​ថា នៅ​តាម​ផ្លូវជាតិ ឬ​ផ្លូវ​តាម​ភូមិ​នោះ​ទេ​។

ដូច្នេះ​ដើម្បី​ឱ្យ​ទីក្រុង​ស្អាត ស្រុកភូមិ​យើង​មាន​អនាម័យ គឺ​ទាមទារ​ឱ្យ​យើង​ចូលរួម​ទាំងអស់​គ្នា ទាំង​ប្រជាពលរដ្ឋ​ម្នាក់​ៗ និង​ទាំង​អាជ្ញាធរ​សមត្ថកិច្ច​។ ហាម​គេ​មិន​ឱ្យ​បោះ​ឆ្នោត​សំរាម​ពាស​វាល​ពាស​កាល តែ​ក៏​ត្រូវ​មាន​ធុងសំរាម និង​កន្លែង​បោះចោល​សំរាម​ត្រឹមត្រូវ​ដែរ​។ ដូច​គ្នា​ដែរ ហាម​គេ​មិន​ឱ្យ​ចត​ឡាន​ម៉ូតូ​តាម​ផ្លូវ តាម​សួនច្បារ តែ​ក៏​ត្រូវ​តែ​មាន​កន្លែង​ចំណត​ត្រឹមត្រូវ សម្រាប់​ចត​ឡាន​ម៉ូតូ​ដែរ​។ ហាម​គេ​មិន​ឱ្យ​បន្ទោ​របង់​តាម​ទី​សាធារណៈ តែ​អាជ្ញាធរ​សមត្ថកិច្ច ក៏​ត្រូវ​តែ​រៀបចំ​បន្ទប់ទឹក និង​បង្គន់​អនាម័យ សម្រាប់​គេ​បន្ទោ​របង់​ផង​ដែរ​៕ ដោយ ៖ មុត ស្រី​ពៅ

អត្ថបទសរសេរ ដោយ

កែសម្រួលដោយ