រាជធានីភ្នំពេញ ៖ នៅក្នុងសង្គមខ្មែរមានការសង្កេតឃើញថា ក្មេងស្រីបានដើរតួនាសំខាន់នៅក្នុងការរកប្រាក់ផ្គត់ផ្គង់គ្រួសារ។ នៅក្នុងគ្រួសារមួយ បើគ្មានលទ្ធភាពឱ្យកូនរៀនទាំងពីរនាក់ រវាងកូនប្រុស និងស្រីនោះ ឪពុកម្តាយអាចនឹងឱ្យកូនស្រីឈប់សិក្សាមុនកូនប្រុស។
តាមពិតទៅសកម្មភាពនេះមិនមែនឪពុកម្តាយស្រឡាញ់កូនមិនស្មើគ្នានោះទេ ។ ការឱ្យកូនស្រីឈប់រៀនសូត្រមុនកូនប្រុស ដោយសារផ្គត់គំនិតចាស់ៗពីបុរាណបានគិតថា មុន និងក្រោយក្មេងស្រីគង់តែឈប់សិក្សាដដែល។ ក្មេងស្រីគង់តែនឹងក្លាយជាភរិយារបស់គេដដែល ដូច្នេះមិនបាច់រៀនច្រើនក៏បាន។
លោកស្រី ចាន់ថុល ដែលជាកូនច្បងនៅក្នុងគ្រួសារដែលមានបងប្អូន៦នាក់ និយាយថា អ្នកស្រីបានជួយរកប្រាក់មកផ្គត់ផ្គង់គ្រួសារតាំងពីអាយុ១៣ឆ្នាំ។ នៅអាយុ១៣ឆ្នាំ អ្នកស្រីបានក្លាយជាអ្នកលក់ដូរទំនិញក្នុងផ្សារជាមួយម្តាយ ដើម្បីរកប្រាក់ឱ្យបងប្អូនដែលជាបុរសបានសិក្សាដល់មហាវិទ្យាល័យ ។
ស្ត្រីរូបនេះ មិនតូចចិត្តចំពោះពលិកម្មរបស់ខ្លួននោះទេ ត្បិតអីពេលនេះ អ្នកស្រីទទួលបានការតបស្នងគុណពីបងប្អូនដែលបានរៀនខ្ពស់។ តែអ្នកស្រីនៅតែអន់ចិត្តពីការដែលខ្លួនគ្មានចំណេះដឹង ហើយការគ្មានចំណេះដឹងនេះ មិនមាននរណាអាចជួយគាត់បានទេ។ អ្នកស្រីបាននិយាយថា «គ្មានលុយបងប្អូនជួយលុយ តែចំណេះគ្មាន គ្មាននរណាអាចជួយបានទេ»។
អត្រាសិក្សារវាងសិស្សស្រី និងសិស្សប្រុសនៅមហាវិទ្យាល័យ ឬយ៉ាងហោចណាស់ចាប់ពីវិទ្យាល័យទៅនៅតែមានគម្លាតឆ្ងាយពីគ្នានៅឡើយ។ ការសិក្សាថ្នាក់កាន់តែខ្ពស់ ចំនួនសិស្សស្រីកាន់តែតិច នៅពេលការសិក្សាមានតម្លៃជាខ្លាំងនៅក្នុងការលើកកម្ពស់សិទ្ធិនារី ដើម្បីចូលបម្រើការងារនៅគ្រប់វិស័យទាំងសេដ្ឋកិច្ច នយោបាយ និងសង្គម ជាដើមនោះ។
ក្រៅពីផ្នែកហិរញ្ញវត្ថុ និងផ្នត់គំនិតចាស់បុរាណដែលបានក្លាយជាឧបសគ្គនៅក្នុងការទទួលបានការអប់រំរបស់ក្មេងស្រី។ សុវត្ថិភាពការធ្វើដំណើរ និងការស្នាក់នៅក៏នៅតែជាឧបសគ្គដល់ការសិក្សារបស់ក្មេងស្រីដែរ។ នៅឱកាសទិវាសិទ្ធិនារីឆ្នាំនេះ មានការអំពាវនាវពីប្រមុខរដ្ឋាភិបាលឱ្យមានការចូលរួមពីសប្បុរសជនក្នុងការកសាងអន្តេវេសិកដ្ឋានសម្រាប់សិស្សស្រីនៅជនបទ តាមវិទ្យាល័យនៅទូទាំងប្រទេស ដើម្បីកាត់បន្ថយគម្លាតនៃវិសមភាពរវាងសិស្សនៅតំបន់ជនបទ និងទីក្រុង។
មួយថ្ងៃ មុនទិវាសិទ្ធិនារី ៨ ខែមីនានេះ សម្តេចហ៊ុន សែន លោក ហ៊ុន សែន បានលើកទឹកចិត្តឲ្យមានការកសាងអន្តេវេសិកដ្ឋានបន្ថែមទៀត នៅតាមសាលាកម្រិតមធ្យមសិក្សានៅទូទាំងប្រទេសសម្រាប់សិស្សស្រីនៅតាមជនបទ ជាពិសេសសិស្សក្រីក្រ ។ សម្តេចបានបញ្ជាក់ថា បើគ្មានស្ត្រីនៅមធ្យមសិក្សាទេ ក៏គ្មានស្ត្រីនៅឧត្តមសិក្សានោះដែរ។កន្លងមានរបាយការណ៍បញ្ជាក់ថា អត្រាចុះឈ្មោះចូលរៀនរបស់សិស្សស្រីនៅថ្នាក់បឋមសិក្សា និងមធ្យមសិក្សាមានប្រមាណ៤៨ភាគរយ ។ ចំណែកការចុះឈ្មោះចូលរៀននៅថ្នាក់ឧត្តមសិក្សាមានចំនួនតែ៣៧.៦ ភាគរយប៉ុណ្ណោះ។
គម្លាតសិស្សប្រុស និងសិស្សនៅពេលរៀនកាន់តែខ្ពស់នេះមានបញ្ហាមួយចំនួន ប៉ុន្តែបញ្ហាសុវត្ថិភាពការធ្វើដំណើរទៅសិក្សា និងការស្នាក់នៅ ដើម្បីសិក្សាជាផ្នែកសំខាន់មួយ ។ នៅទីជនបទការធ្វើដំណើរទៅសិក្សាអាចជួបការលំបាកដោយសារផ្លូវធ្វើដំណើរនៅឆ្ងាយពីផ្ទះហើយអាចមិនមានសុវត្ថិភាព។ចំណែកកន្លែងស្នាក់នៅ របស់សិស្ស គឺអន្តេវេសិកដ្ឋាននេះ មានមិនគ្រប់គ្រាន់ ឬគ្មានតែម្តងនៅតាមវិទ្យាល័យ និងមហាវិទ្យាល័យ។
បើតាមប្រមុខដឹកនាំរដ្ឋាភិបាល ការកសាងអន្តេវេសិកដ្ឋានសម្រាប់សិស្សស្រីនៅជនបទ ដើម្បីកាត់បន្ថយគម្លាតនៃវិសមភាពរវាងសិស្សនៅតំបន់ជនបទ និងទីក្រុង និងជំរុញក៏ដូចជាលើកកម្ពស់សិទ្ធិស្ត្រីឲ្យទទួលបានការសិក្សាកាន់តែខ្ពស់ផងដែរ។ ការកសាងអន្តេវេសិកដ្ឋាននេះ រដ្ឋាភិបាលបានធ្វើរួចមកហើយសម្រាប់សិស្សក្រីក្រ និងគ្រូ ដោយការកសាងនេះចំណាយថវិការដ្ឋសុទ្ធសាធ ។ ដូច្នេះហើយទើបលោកអំពាវនាវឲ្យ សប្បុរសជននានាចូលរួមវិភាគទានកសាងបន្ថែមទៀត។នេះជាការបញ្ជាក់របស់សម្តេច ហ៊ុន សែន។
មិនថា បុរស និងស្រីនោះទេ ទាមទារឱ្យមានការសិក្សាបានខ្ពស់ ទើបជីវិតកាន់តែល្អប្រសើរ ។ ស្ត្រីមានចំណេះដឹងខ្ពស់មិនត្រឹមជួយលើកកម្ពស់សិទ្ធិសេរីភាព និងការរស់នៅរបស់ពួកគាត់នោះ តែនឹងជួយដល់ការអប់រំសម្រាប់សង្គមទាំងមូលផងដែរ ។ ស្ត្រីជាម្តាយដែលមានប្រសិទ្ធភាពខ្ពស់នៅក្នុងការអប់រំណែនាំកូនៗ។
ក្រៅពីការលើកទឹកចិត្តដល់ការ សាងសង់អន្តេវាសិកដ្ឋានសម្រាប់សិស្សស្រីក៏មានការស្នើឱ្យមានការផ្តល់អាហារូបករណ៍ដល់សិស្សនារីឱ្យបានច្រើនផងដែរ៕ ដោយ សារ៉ាន់
ចែករំលែកព័តមាននេះ