ADផ្ទាំងផ្សព្វផ្សាយពាណិជ្ជកម្ម

Picture
  • ភ្នំពេញ

រាជធានី​ភ្នំពេញ ៖ ជា​ថ្មី​ម្តងទៀត មន្ទីរ​សុខាភិបាល​រាជធានី​ភ្នំពេញ​បាន​ចេញ​លិខិត​រឹត​បន្តឹង និង​ចាត់វិធានការ​លើ​រថយន្ត​គិលានសង្គ្រោះ​របស់​គ្លីនិក​ឯកជន​គ្រប់​ប្រភេទ ឬ​ឡានពេទ្យ​ឯកជន​ដែល​គ្មាន​ច្បាប់​អនុញ្ញាត​ត្រឹមត្រូវ និង​រថយន្ត​គិលានសង្គ្រោះ​ដែល​អនុវត្ត​ខុស​ពី​គោលការណ៍​ណែនាំ​។ នោះ គឺ​មន្ទីរ​សុខាភិបាល​រាជធានី​ភ្នំពេញ​ក៏​ដូច​ជា ក្រសួងសុខាភិបាល​បាន​ចេញ​លិខិត​ណែនាំ​រួច​ហើយ​មិន​អនុញ្ញាត​ឱ្យ​គ្លីនិក​ឯកជន…

រាជធានី​ភ្នំពេញ ៖ ជា​ថ្មី​ម្តងទៀត មន្ទីរ​សុខាភិបាល​រាជធានី​ភ្នំពេញ​បាន​ចេញ​លិខិត​រឹត​បន្តឹង និង​ចាត់វិធានការ​លើ​រថយន្ត​គិលានសង្គ្រោះ​របស់​គ្លីនិក​ឯកជន​គ្រប់​ប្រភេទ ឬ​ឡានពេទ្យ​ឯកជន​ដែល​គ្មាន​ច្បាប់​អនុញ្ញាត​ត្រឹមត្រូវ និង​រថយន្ត​គិលានសង្គ្រោះ​ដែល​អនុវត្ត​ខុស​ពី​គោលការណ៍​ណែនាំ​។

នោះ គឺ​មន្ទីរ​សុខាភិបាល​រាជធានី​ភ្នំពេញ​ក៏​ដូច​ជា ក្រសួងសុខាភិបាល​បាន​ចេញ​លិខិត​ណែនាំ​រួច​ហើយ​មិន​អនុញ្ញាត​ឱ្យ​គ្លីនិក​ឯកជន ឬ​ពេទ្យ​ឯកជន​យក​ឡានពេទ្យ​របស់​ខ្លួន ទៅ​ដឹក​អ្នកជំងឺ ដោយសារ​គ្រោះថ្នាក់​ចរាចរណ៍​យក​ទៅ​សម្រាក​ព្យាបាល​នៅ​មន្ទីរពេទ្យ​របស់​ខ្លួន​ឡើយ ។ ប៉ុន្តែ​មក​ដល់​ពេល​នេះ គេ​នៅ​តែ​ឃើញ​ឡានពេទ្យ​ឯកជន​ទៅ​ដណ្តើម​ដឹក​អ្នក​រង​គ្រោះ​ដោយសារ​គ្រោះថ្នាក់​ចរាចរណ៍​ដូច​ចាប់​ម៉ូយ​តាក់ស៊ី​នៅឡើយ​។

រូបតំណាង

សេចក្ដីជូនដំណឹង​របស់​មន្ទីរ​សុខាភិបាល រាជធានី​ភ្នំពេញ​បានឱ្យ​ដឹង​ថា យោង​ស្មារតី​អង្គប្រជុំ​ស្តី​ពី​កិច្ចប្រជុំ​ត្រួតពិនិត្យ​ពង្រឹង និង​ចាត់វិធានការ​លើ​រថយន្ត​គិលានសង្គ្រោះ​របស់​គ្លីនិក​ឯកជន​គ្រប់​ប្រភេទ​ដែល​គ្មាន​ច្បាប់​អនុញ្ញាត​ត្រឹមត្រូវ និង​រថយន្ត​គិលានសង្គ្រោះ​ដែល​អនុវត្ត​ខុស​ពី​គោលការណ៍​ណែនាំ​របស់​ក្រសួងសុខាភិបាល​កាលពី​ថ្ងៃ​ទី​០១ ខែកុម្ភៈ ឆ្នាំ​២០២៣ របស់​រដ្ឋបាល​រាជធានី​ភ្នំពេញ មន្ទីរ​សុខាភិបាល​នៃ​រដ្ឋបាល​រាជធានី​ភ្នំពេញ សូម​ជម្រាប​ជូនដំណឹង​ដល់​លោក​/​លោកស្រី​ជា​ម្ចាស់ ឬ​អ្នកគ្រប់គ្រង​មន្ទីរ​ពហុ​ព្យាបាល មន្ទីរ​សម្រាក​ព្យាបាល និង​មន្ទីរពេទ្យ​ឯកជន​ទាំងអស់​ក្នុង​រាជធានី​ភ្នំពេញ​ជ្រាប​ថា ករណី​រថយន្ត​គិលានសង្គ្រោះ​របស់​មូលដ្ឋាន​សុខាភិបាល​ឯកជន​ដឹក​អ្នក​របួស​ដោយ​គ្រោះថ្នាក់​ចរាចរណ៍​តាម​ដងផ្លូវ​សាធារណៈ​បញ្ជូន​ទៅ​កាន់​ទីតាំង​ផ្តល់​សេវា​សុខាភិបាល​ឯកជន​របស់​លោក​-​លោកស្រី​សូម​ជួយ​ទទួល និង​ផ្តល់​សេវា​សង្គ្រោះ​បន្ទាន់​ជូន​ជន​រង​គ្រោះ ព្រមទាំង​រាយការណ៍ ជូន​សមត្ថកិច្ច​ក្នុង​មូលដ្ឋាន (​ដោយ​ថតរូប​អ្នកបើកបរ និង​ស្លាក​លេខ​រថយន្ត​គិលានសង្គ្រោះ​)​ដើម្បី​ឃាត់​រថយន្ត និង​អ្នកបើកបរ​។

រូបតំណាង

មន្ទីរ​សុខាភិបាល រាជធានី​ភ្នំពេញ បាន​ប្រកាស​ឱ្យ​ម្ចាស់ ឬ​អ្នកគ្រប់គ្រង​មន្ទីរ​ពហុ​ព្យាបាល មន្ទីរ​សម្រាក​ព្យាបាល និង​មន្ទីរពេទ្យ​ឯកជន​ទាំងអស់​ក្នុង​រាជធានី​ភ្នំពេញ ជ្រាប​ជា​ព័ត៌មាន និង​ចូលរួម​អនុវត្ត​ឱ្យ​មាន​ប្រសិទ្ធភាព​នូវ​សេចក្តីជូនដំណឹង​ដែល​ហាមឃាត់​មិន​ឱ្យ​ពេទ្យ​ឯកជន​ប្រើ​ឡានពេទ្យ​របស់​ខ្លួន​ដឹក​អ្នក​រង​គ្រោះ​ដោយសារ​គ្រោះថ្នាក់​ចរាចរណ៍​ឡើយ​។

ក៏​ប៉ុន្តែ​ក្រោយ​សេចក្តីជូនដំណឹង​នេះ តែ​ប៉ុន្មាន​ថ្ងៃ គឺ​នៅ​យប់​ថ្ងៃ​ទី​៤ ខែមីនា គេ​ឃើញ​រថយន្ត​សង្គ្រោះ​បន្ទាន់​ពាក់​ស្លាក​លេខ ខ​-​ម មក​ដឹក​អ្នក​របួស​គ្រោះថ្នាក់​ចរាចរណ៍​ស្រប​ពេល​ដែល រថយន្ត​សា​មុ​យ​របស់​រដ្ឋ​មក​ដល់ ។ ករណី​នេះ​ឡានពេទ្យ​ឯកជន ដែល​ពាក់​ស្លាក​លេខ​ខ​.​ម មិន​ព្រមអោយ​ខាង​រថយន្ត​សា​មុ​យ​របស់​រដ្ឋ​ដឹក​អ្នក​របួស​ឡើយ ។ ហេតុការណ៍​គ្រោះថ្នាក់​ចរាចរណ៍​នោះ​បាន​កើតឡើង​នៅ​មុខ​វត្ត​ទឹកថ្លា តាម​បណ្តោយ​ផ្លូវ​សហព័ន្ធ​រុ​ស្ស៊ី ក្នុង​សង្កាត់​ទឹកថ្លា ខណ្ឌ​សែន​សុខ រាជធានី​ភ្នំពេញ នៅ​យប់​ថ្ងៃ​៤ ខែមីនា ឆ្នាំ​២០២៣​។

សេចក្តីរាយការណ៍ បាន​បញ្ជាក់​ថា រថយន្ត​សង្គ្រោះ​ដែល​ពាក់​ស្លាក​លេខ ខ​.​ម នោះ​ធ្លាប់​ចេញ​ដឹក​អ្នក​របួស​តាម​ផ្លូវ​សាធារណៈ​ដោយ​មិន​ដឹក​អ្នក​របួស​ចូល​មន្ទីរពេទ្យ​រដ្ឋ​ទេ តែ​បែរ​ដឹក​ចូល​មន្ទីរពេទ្យ​ឯកជន ដែល​មានឈ្មោះ ឡ​រ៉ា ទៅ​វិញ​។

កន្លង​មក ការ​ហាមឃាត់​ឡានពេទ្យ​ឯកជន មិន​ឱ្យ​ដឹក​អ្នក​រង​គ្រោះ​ដោយសារ​គ្រោះថ្នាក់​ចរាចរណ៍ ពិសេស​នៅ​ពេល​យប់​ដោយសារ​តែ​កន្លង​មក ក្រុម​ឡានពេទ្យ​ឯកជន​ទាំងនោះ​បាន​ឈ្លោះ​ដណ្តើម​ជន​រង​គ្រោះ​ដូច​ដណ្តើម​ម៉ូយ​ជិះឡាន​តាក់ស៊ី ។ មួយវិញទៀត នៅ​ពេល​ដឹក​អ្នកជំងឺ​យក​ទៅ​ដល់​គ្លីនិក​ឯកជន​ហើយ គឺ​ពេទ្យ​ៗ​ឯកជន​ទាំងនោះ​កា​.​ប់​កោរ​អ្នកជំងឺ​មិន​ដាក់​ទឹក ។ ហេតុផល​សំខាន់​មួយទៀត​ត្រូវ​បាន​គេ​រក​ឃើញ​ថា ឡានពេទ្យ​ឯកជន​ជា​ច្រើន​ដែល​ដណ្តើម​ដឹក​អ្នក​រង​គ្រោះ​ដោយ​គ្រោះថ្នាក់​ចរាចរណ៍ គឺ​មិន​មាន​ឧបករណ៍​សង្គ្រោះ​បឋម ហើយ​អ្នក​លើក​សែង​អ្នក​រង​គ្រោះ​ទៀត​ក៏​មិន​មាន​ជំនាញ​ពេទ្យ​ច្បាស់លាស់ ដែល​អាច​នាំ​ដល់​គ្រោះថ្នាក់​បន្ថែម​ដល់​អ្នកជំងឺ​។

យ៉ាងណា​ក៏​ដោយ ទន្ទឹម​នឹង​វិធានការ ដោយ​ហាមឃាត់​ឡានពេទ្យ​ឯកជន មិន​ឱ្យ​ចេញ​ដឹក​អ្នក​រង​គ្រោះ​ដោយសារ​គ្រោះថ្នាក់​ចរាចរណ៍​ដូច្នេះ គឺ​ឡានពេទ្យ​រដ្ឋ ត្រូវ​តែ​បង្កើន​សកម្មភាព​របស់​ខ្លួន ហើយ​ពេល​គេ​តេ​រក​ត្រូវ​តែ​លើក និង​ចេញ​ទៅ​យក​អ្នកជំងឺ​អ្នក​រង​គ្រោះ​ឱ្យ​បាន​ទាន់​ពេល​ផង ។ ក្នុង​ឡានពេទ្យ​រដ្ឋ​ក៏​ត្រូវ​បាន​តែ​បំពាក់​ឧបករណ៍​សង្គ្រោះ​បឋម​គ្រប់គ្រាន់ និង​មាន​ពេទ្យ​ប្រកបដោយ​វិជ្ជាជីវៈ​។

ម្យ៉ាងទៀត ក្នុង​ករណី​ឡានពេទ្យ​ឯកជន​នេះ មន្ទីរ​សុខាភិបាល និង​ក្រសួងសុខាភិបាល គួរតែ​បង្កើន​វិធានការ​គ្រប់គ្រង ហើយ​ត្រួតពិនិត្យ​ឱ្យ​បាន​ហ្មត់ចត់ និង​តម្រូវ​ឱ្យ​ឡានពេទ្យ​ឯកជន​ទាំងនោះ​បំពាក់​ឧបករណ៍​តាម​ស្តង់ដា​ដោយ​មាន​គ្រូពេទ្យ មាន​ជំនាញ​ពេល​ទៅ​ដឹក​អ្នកជំងឺ និង​អ្នក​រង​គ្រោះ ។ រីឯ​តម្លៃ​សេវា​ក៏​ត្រូវ​តែ​ក្រសួង និង​មន្ទីរ​សុខាភិបាល រួម​ទាំង​អាជ្ញាធរ​រាជធានី​ខេត្ត ចូលរួម​អន្តរាគមន៍ ឱ្យ​យក​ថ្លៃ​សមរម្យ​។

ការ​ទទួលខុសត្រូវ​របស់​ពេទ្យ​ឯកជន​លើ​អ្នកជំងឺ​ក៏​ត្រូវ​តែ​គិតគូរ ហើយ​បើ​ពេទ្យ​ឯកជន​ណា​មិន​ធ្វើ​តាម​ទេ ក្រសួង និង​មន្ទីរ​សុខាភិបាល​ត្រូវ​ចាត់វិធានការ​ម៉ឺងម៉ាត់​រហូត​ដល់​បិទ​គ្លីនិក​នោះ​តែ​ម្តង ។ ពោល គឺ​ពន្លត់ភ្លើង​ដោយ​មិន​ត្រូវ​នាំ​គ្នា​អង្គុយ​បក់ផ្សែង​ចិញ្ចឹម​បញ្ហា​ដូច្នេះ​នោះ​ទេ ។ ព្រោះថា បើ​នៅ​តែ​បណ្តែត បណ្តោយ​បញ្ហា​ដែល​យើង​ដឹង​ច្បាស់​ហើយ នោះ​អ្នក​រង​គ្រោះ គឺ​មាន​តែ​ប្រជាពលរដ្ឋ និង​អ្នកជំងឺ​តែ​ប៉ុណ្ណោះ​៕

អត្ថបទសរសេរ ដោយ

កែសម្រួលដោយ