- ភ្នំពេញ
ថ្ងៃទី៨ ខែមីនានេះ ជាទិវាអន្តរជាតិនារី គម្រប់ខួបលើកទី១១២ឆ្នាំ ដែលពិភពលោកតែងតែប្រារព្ធឡើងរៀងរាល់ឆ្នាំ ដើម្បីរំលឹកនូវការតស៊ូ និងគំរូវីរភាពរបស់នារីៗក្នុងការទាមទារសិទ្ធិសេរី និងគេចផុតពីទង្វើជិះជាន់នានា
ថ្ងៃទី៨ ខែមីនានេះ ជាទិវាអន្តរជាតិនារី គម្រប់ខួបលើកទី១១២ឆ្នាំ ដែលពិភពលោកតែងតែប្រារព្ធឡើងរៀងរាល់ឆ្នាំ ដើម្បីរំលឹកនូវការតស៊ូ និងគំរូវីរភាពរបស់នារីៗក្នុងការទាមទារសិទ្ធិសេរី និងគេចផុតពីទង្វើជិះជាន់នានា
រាជធានីភ្នំពេញ ៖ ថ្ងៃទី៨ ខែមីនានេះ ជាទិវាអន្តរជាតិនារី គម្រប់ខួបលើកទី១១២ឆ្នាំ ដែលពិភពលោកតែងតែប្រារព្ធឡើងរៀងរាល់ឆ្នាំ ដើម្បីរំលឹកនូវការតស៊ូ និងគំរូវីរភាពរបស់នារីៗក្នុងការទាមទារសិទ្ធិសេរី និងគេចផុតពីទង្វើជិះជាន់នានា។
ដូចរៀងរាល់ឆ្នាំ មិនថា នៅកម្ពុជា និងនៅលើពិភពលោក គឺទាំងរដ្ឋាភិបាល ទាំងអង្គការ សង្គមស៊ីវិល និងទាំងស្ថាប័នពាក់ព័ន្ធ បានជួបជុំប្រារព្ធពិធីអបអរសាទរដល់ទិវាអន្តរជាតិនារី ៨មីនា ដើម្បីលើកកម្ពស់ដល់ស្ត្រីក្នុងសង្គម។ ប៉ុន្តែខណៈដែលសង្គមកាន់តែផ្តល់តម្លៃ និងឱកាសដល់ស្ត្រី គឺស្ត្រីខ្លួនឯង ត្រូវពង្រឹង និងបង្កើនសមត្ថភាពផ្ទាល់ខ្លួន។
នៅកម្ពុជា ដើម្បីអបអរសាទរទិវាអន្តរជាតិនារី ៨មីនា លើកទី១១២ ក្នុងឆ្នាំ២០២៣នេះ រាជរដ្ឋាភិបាល បានប្រារព្ធពិធីជួបជុំ ក្រោមប្រធានបទ «ស្ត្រីរួមគ្នា រក្សាសុខសន្តិភាព ដើម្បីកិច្ចអភិវឌ្ឍក្នុងយុគសម័យឌីជីថល»។ ការប្រារព្ធពិធីអបអរសាទរទិវាអន្តរជាតិនារី ក្រោម ប្រធានបទនេះ មានគោលបំណងបន្តរំលេចពីតម្លៃនៃការចូលរួមរបស់ស្ត្រី ដែលមិនអាចកាត់ថ្លៃបាន ក្នុងការថែរក្សាសុខសន្តិភាព ក៏ដូចជា កំពុងចូលរួមយ៉ាងសកម្មក្នុងការពន្លឿន កិច្ចអភិវឌ្ឍលើគ្រប់វិស័យ។
ចាប់តាំងពីថ្ងៃរំដោះ រហូតដល់ពេលបច្ចុប្បន្នរាជរដ្ឋាភិបាលកម្ពុជា តែងតែបានយកចិត្តទុកដាក់ ជានិច្ចក្នុងការលើកកម្ពស់ស្ត្រី រហូតបង្កើតបានជាពាក្យស្លោកថា «ស្ត្រីជាឆ្អឹងខ្នង សេដ្ឋកិច្ចជាតិ»។
ក្នុងពេលអញ្ជើញចូលរួមនៅក្នុងពិធីអបអរសាទរទិវាអន្តរជាតិ៨ មីនា លើកទី១១២ ឆ្នាំ២០២៣ ដែលបានធ្វើឡើងកាលពីថ្ងៃទី៧ ខែមីនា សម្ដេចតេជោ ហ៊ុន សែន បានមានប្រសាសន៍ថា អ្វីដែលយើងត្រូវធ្វើ ដើម្បីអំណាចស្ត្រីនោះ គឺត្រូវធ្វើយ៉ាងណាឱ្យស្ត្រីមានកម្រិតសេដ្ឋកិច្ចល្អប្រសើរ ព្រោះកត្តាសេដ្ឋកិច្ចនេះហើយ គឺជាការសម្រេចដ៏ធំរបស់ស្ត្រី នាពេលបច្ចុប្បន្ន។
សម្តេចតេជោនាយករដ្ឋមន្ត្រី បានមានប្រសាសន៍ថា កិច្ចការ ដែលត្រូវបន្តធ្វើនោះ គឺត្រូវពង្រឹង និងបង្កើតឱ្យមានអន្តេវាសិកដ្ឋានសម្រាប់និស្សិតជាស្ត្រីឱ្យបានកាន់តែច្រើន សម្រាប់ឲ្យពួកគាត់បានបន្តការសិក្សារៀនសូត្រ។ សម្តេចតេជោនាយករដ្ឋមន្ត្រី ក៏បានអំពាវនាវដល់ សប្បុរសជនអោយជួយគាំពារ ដើម្បីអាចបង្កើតអន្តេវាសិកដ្ឋានតាមកម្រិតមធ្យមសិក្សា និងថ្នាក់ឧត្តមសិក្សា ដើម្បីរក្សាគម្លាតនៃការសិក្សារវាងសិស្សស្រី និងសិស្សប្រុស ជាពិសេស តំបន់ជនបទដាច់ស្រយាល។
សម្តេចតេជោ ហ៊ុន សែន បានមានប្រសាសន៍ទៀតថា គោលដៅធំ និងជាអាទិភាព ដែលរាជរដ្ឋាភិបាល និងគ្រប់ស្ថាប័នពាក់ព័ន្ធត្រូវធ្វើ គឺត្រូវការពង្រឹងអំណាចស្ដ្រីក្នុងវិស័យ សេដ្ឋកិច្ចឱ្យបានកាន់តែធំធេងថែមទៀត តាមរយៈការពង្រឹងអំណាចដល់ស្ដ្រីនូវ គ្រប់ការងារទាំងអស់ ជាពិសេសអំណាចគ្រប់គ្រងសេដ្ឋកិច្ចគ្រួសារ។
សម្តេចតេជោ នាយករដ្ឋមន្ត្រី ក៏បានសម្តែងការព្រួយបារម្ភចំពោះទម្ងន់ នៃអំពើហិ.ង្សានានា ដែលមានស្ថានភាពធ្ងន់ធ្ងរ រហូតដល់បុរសជាប្តីបាញ់សម្លា.ប់ប្រពន្ធខ្លួនឯងកាលពីពេលថ្មីៗ នេះ និងទម្រង់ហិ.ង្សាផ្សេងៗទៀត។ ដូច្នេះសម្តេចតេជោ សូមអំពាវនាវឲ្យមានការបញ្ឈប់ អំពើហិ.ង្សាទាំងអស់នេះ និងចូលរួមលុបបំបាត់អំពើហិ.ង្សាគ្រប់រូបភាពទាំងអស់ទៅលើស្ត្រី។
ជាមួយគ្នានោះ សម្តេចតេជោបានលើកឡើងពីការហែកហួរគ្នារវាងប្តីប្រពន្ធ លែងលះគ្នា ហើយមានការឌឺដងឲ្យគ្នា តាមបណ្តាញសង្គម Facebook ដែលនេះ សម្ដេចតេជោ ចាត់ទុកថា ជារឿងអាម៉ាសបំផុត មិនត្រឹមតែបុគ្គលទាំងសងខាងនោះទេ វាបានជះឥទ្ធិពលធ្ងន់ធ្ងរដល់កូនៗ និងក្រុមគ្រួសារទៀតផង។
សម្តេចតេជោ ហ៊ុន សែន ក៏អំពាវនាវដល់ក្រុមគ្រួសារទាំងឡាយ បើសិនជាក្រុមគ្រួសាររស់នៅមិនចុះសម្រុងជាមួយគ្នា ត្រូវដោះស្រាយគ្នា ដោយសន្ដិវិធី ដើម្បីរក្សាកិត្តិយសគ្រួសារ និង សីលធម៌នៅក្នុងសង្គម ចៀសវាងការហែកហួរជេរគ្នាតាមបណ្ដាញសង្គម ដែលធ្វើឲ្យអាប់ឱន ទាំងគ្រួសារ និងសង្គមជាតិផងដែរ។
ជាការពិត បើចង់ឱ្យគេជួយ ទាល់តែខ្លួនយើងត្រូវជួយខ្លួនឯងសិន។ ដូចគ្នានេះដែរ សម្រាប់ស្ត្រី ជាពិសេសស្ត្រីកម្ពុជាយើង នៅពេលសង្គម ពិសេសរាជរដ្ឋាភិបាល បានរៀបចំគោលនយោបាយ និងលើកទឹកចិត្តដល់ស្ត្រីហើយនោះ គឺស្ត្រីខ្លួនឯង ពិសេសកុមារី ត្រូវតែប្រឹងប្រែងជម្នះរាល់ការលំបាក និងអភិវឌ្ឍខ្លួនឱ្យចេញផុតពីភាពអវិជ្ជា និងបង្កើនសមត្ថភាព ទាំងចំណេះ និងជំនាញរបស់ខ្លួន។
ជាការពិត ខ្មែរយើងតែងតែមានពាក្យថា «ស្ត្រីបង្វិលចង្ក្រាន្តមិនជុំ» ដែលមានន័យថា ស្ត្រីមានការងារច្រើនណាស់ ជាមេផ្ទះ និងចុងភៅ ហើយធ្វើការងារផ្ទះនេះ មិនចេះឈប់ទេ។ តែស្ត្រីខ្លួនឯង ត្រូវតែខំប្រឹងរៀនសូត្រ និងរៀនឱ្យចេះជំនាញច្បាស់លាស់ ដោយចេះជំនាញអ្វីក៏បាន ដើម្បីកុំឱ្យរស់ពឹងតែលើប្តី។ កាលណា ស្ត្រីមានការងារធ្វើ មានមុខរបរ មុខជំនួញ និងមានប្រាក់ចំណូលហើយពេលនោះ ស្ត្រីពិតជាមានអំណាចខាងសេដ្ឋកិច្ចពិតប្រាកដ។
ប៉ុន្តែនៅពេលឈានដល់ដំណាក់កាលជោគជ័យនេះហើយ ស្ត្រីខ្លួនឯងក៏មិនត្រូវភ្លេចតម្លៃខ្លួនជាស្ត្រីខ្មែរទេ ហើយស្ត្រីនឹងរឹតត្រូវតែរក្សាប្រពៃណី ទំនៀមទម្លាប់ ដើម្បីធ្វើជាគំរូដល់ក្រុមគ្រួសារ និងសង្គម។ ពោលគឺពេលមានការងារធ្វើ មានប្រាក់ចំណូល ឬក៏មានមុខរបរ ជំនួញ ដែលអាចរកប្រាក់ចំណូលបានច្រើនហើយ គឺស្ត្រីមិនត្រូវភ្លើតភ្លើន ភ្លេចប្តី ភ្លេចកូនឡើយ៕ ដោយ ៖ មុត ស្រីពៅ
ចែករំលែកព័តមាននេះ