បើកការប្រកួតកីឡាប្រដាល់គុនខ្មែរជ្រើសរើសជើងឯកប្រចាំឆ្នាំ២០២២
- ភ្នំពេញ
រាជធានីភ្នំពេញ ៖ នាថ្ងៃទី៦ ខែមីនា ឆ្នាំ២០២៣ លោក ដួង មាសចំរើន អគ្គនាយករងតំណាងឲ្យ
រាជធានីភ្នំពេញ ៖ នាថ្ងៃទី៦ ខែមីនា ឆ្នាំ២០២៣ លោក ដួង មាសចំរើន អគ្គនាយករងតំណាងឲ្យលោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ និងលោក ហួត សេងទ្រី ប្រធាននាយកដ្ឋាន រៀបចំ និងគ្រប់គ្រងព្រឹត្តិការណ៍កីឡា បានអញ្ជើញចូលរួមបើកការប្រកួតកីឡាប្រដាល់គុនខ្មែរជ្រើសរើសជើងឯកប្រចាំឆ្នាំ២០២២ ដែលប្រព្រឹត្តទៅចាប់ពីថ្ងៃទី៦ ដល់ថ្ងៃទី១០ ខែមីនា ឆ្នាំ២០២៣ ។
លោក ទុយ ប៊ុនហឿន អគ្គលេខាធិការរងសហព័ន្ធកីឡាប្រដាល់គុនខ្មែរបានប្រាប់ឲ្យដឹងថា ការប្រកួតកីឡាប្រដាល់គុនខ្មែរជ្រើសរើសជើងឯកប្រចាំឆ្នាំ២០២២មានក្លិបប្រដាល់គុនខ្មែរចំនួន ១០ និងមានកីឡាករ-កីឡាការិនីចំនួន ១១១ នាក់ មកពីក្លិបក្រសួងការពារជាតិ ក្រសួងមហាផ្ទៃ រាជធានីភ្នំពេញ ខេត្តកណ្តាល ខេត្តបន្ទាយមានជ័យ ខេត្តបាត់ដំបង ខេត្តព្រៃវែង ខេត្តមណ្ឌលគីរី ខេត្តសៀមរាប និងខេត្តស្វាយរៀងចូលរួម។
លោក តែម ម៉ឺន បានមានប្រសាសន៍ថា ៖«ក្នុងនាមសហព័ន្ធកីឡាប្រដាល់គុនខ្មែរ និងក្នុងនាមខ្លួនខ្ញុំផ្ទាល់ ខ្ញុំសូមសម្ដែងការកោតសរសើរ និងថ្លែងអំណរគុណដល់ក្រសួងអប់រំ យុវជន និងកីឡា ដែលបានជួយឧបត្ថម្ភគាំទ្រទាំងផ្នែកឯកសារគតិយុត្តិ និងថវិកាគាំទ្រដល់សហព័ន្ធកីឡាប្រដាល់គុនខ្មែរជារៀងរាល់ឆ្នាំលើផ្នែកការងាររដ្ឋបាល ការងារបណ្តុះបណ្ដាល និងការងាររៀបចំការប្រកួតជ្រើសរើសជើងឯកថ្នាក់ជាតិប្រចាំឆ្នាំតាំងពីឆ្នាំ២០១៧រហូតមក ។
មកទល់នឹងពេលនេះ បានធ្វើឲ្យសហព័ន្ធកីឡាប្រដាល់គុនខ្មែររីកចម្រើន និងទទួលបាននូវគុណផលកីឡាជាបន្តបន្ទាប់រហូតមក។
ជាការពិតណាស់ ការប្រកួតកីឡាប្រដាល់គុនខ្មែរជ្រើសរើសជើងឯកប្រចាំឆ្នាំ២០២២នេះមានរយៈពេល៥ថ្ងៃ ចាប់ពីថ្ងៃទី៦ ដល់ថ្ងៃទី១០ ខែមីនា ឆ្នាំ២០២៣ គឺជាការផ្ដល់ឱកាសឲ្យកីឡាករ-កីឡាការិនីបានបញ្ចេញនូវទេពកោសល្យ សមត្ថភាព ក៏ដូចជាការវាស់ស្ទង់នូវបច្ចេកទេស កម្លាំងអំណត់ និង
កលល្បិចអត្តពលិកម្នាក់ៗដែលបានហ្វឹកហាត់កន្លងមក ហើយក៏ជាដំណើរឆ្ពោះទៅកាន់ការប្រកួតកីឡាស៊ីហ្គេមលើកទី៣២ឆ្នាំ២០២៣ ដែលកម្ពុជាយើងធ្វើជាម្ចាស់ផ្ទះនាពេលខាងមុខដ៏ខ្លីនេះផងដែរ ៕
ចែករំលែកព័តមាននេះ