- ភ្នំពេញ
កម្ពុជាកំពុងជំរុញខ្លាំង ចំពោះការងាកទៅរកការប្រើរថយន្តលក្ខណៈគ្រួសារ និងរថយន្តក្រុងដែលប្រើប្រាស់អគ្គិសនី ដើម្បីដើរអោយទាន់ប្រទេសជិតខាង និងពិភពលោក
កម្ពុជាកំពុងជំរុញខ្លាំង ចំពោះការងាកទៅរកការប្រើរថយន្តលក្ខណៈគ្រួសារ និងរថយន្តក្រុងដែលប្រើប្រាស់អគ្គិសនី ដើម្បីដើរអោយទាន់ប្រទេសជិតខាង និងពិភពលោក។
ទោះបីជាកម្ពុជាយឺតជាងប្រទេសជិតខាងមួយជំហាន ប៉ុន្តែពលរដ្ឋអាចនឹងមានឱកាសសាកល្បងរថយន្តក្រុងអគ្គិសនី ដែលហៅកាត់ថា E-Bus នៅក្នុងពេលឆាប់ៗនេះ ខណៈពេលដែល ក្រសួងសាធារណការ និងដឹកជញ្ជូនកំពុងតែជំរុញ ។
លោក ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូន បានថ្លែងក្នុងពិធីចុះហត្ថលេខាលើអនុស្សរណៈនៃការយោគយល់រវាងក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ ជាមួយនឹងសមាគមដឹកជញ្ជូនអ្នកដំណើរផ្លូវគោកកម្ពុជា កាលពីពេល ថ្មីៗនេះថា ក្រសួងកំពុងតែជំរុញកិច្ចការនេះ។
លោកបានឲ្យដឹងថា នេះគឺជាគោលនយោបាយរបស់រាជរដ្ឋាភិបាល និងជាគោលដៅដែល ក្រសួងកំពុងតែជំរុញ ។
លោកបានបន្តថា គោលនយោបាយជំរុញការប្រើប្រាស់រថយន្តក្រុងដើរដោយថាមពលអគ្គិសនី សំដៅចូលរួមការការពារបរិស្ថាន គឺជាជំហាននៃការអនុវត្តយុទ្ធសាស្ត្រអភិវឌ្ឍន៍រយៈពេលវែងប្រកបដោយអព្យាក្រឹតកាបូនឆ្នាំ២០៥០ និងនិន្នាការ នៃការប្រើប្រាស់យានយន្តអគ្គិសនីរបស់ពិភពលោក និងក្នុងតំបន់ផងដែរ។
មកដល់ពេលនេះគេដឹងថា កម្ពុជាមានយានយន្តអគ្គិសនីសរុបចំនួន ៧៣១គ្រឿង ក្នុងនោះរថយន្តមានចំនួន ៣៦៩គ្រឿង ត្រីចក្រយានយន្ត ដែលភាសាសាមញ្ញហៅថា ម៉ូតូកង់បី មានចំនួន ៣៣៩គ្រឿង និងទោចក្រយានយន្តមានចំនួន ២៣គ្រឿង ខណៈដែលពេលនេះកម្ពុជា មានស្ថានីយបញ្ចូលថាមពលយានយន្ដអគ្គិសនីចំនួន ១៣កន្លែង ក្នុងនោះស្ថិតនៅក្រសួងសាធារណការ និងដឹកជញ្ជូនចំនួន ៤កន្លែង ផ្សារទំនើបអ៊ីអនម៉លសែនសុខ ១កន្លែង ស្ថានីយប្រេងឥន្ធនៈតូតាល់ចំការដូង ១កន្លែង ខេត្តបាត់ដំបង ១កន្លែង ខេត្តសៀមរាប ១កន្លែង ក្រុងព្រះសីហនុ ១កន្លែង ខេត្តមណ្ឌលគិរី ១កន្លែង ហើយ៣កន្លែងទៀត គឺនៅស្ថានីយប្រេងឥន្ធនៈ PTT ព្រែកព្នៅ ផ្លូវជាតិលេខ៥ និងស្ថានីយប្រេងឥន្ធនៈ PTT ជ្រោយចង្វារ ផ្លូវជាតិលេខ៦ និង ស្ថានីយប្រេងឥន្ធនៈ PTT ច្បារអំពៅ ផ្លូវជាតិលេខ១ ។
ទាំងនេះ គឺជាការខិតខំរបស់កម្ពុជានៅលើវិថីនៃយានយន្តប្រើអគ្គិសនី ស្របពេលដែលប្រទេសជិតខាងកម្ពុជា ជាពិសេសគឺវៀតណាម និងថៃ គឺគេបានដើរមុនកម្ពុជាមួយជំហានដ៏វែងឆ្ងាយហើយ លើបញ្ហានៃការប្រើប្រាស់រថយន្តអគ្គិសនីនេះ ។
នៅវៀតណាម នៅពេលនេះគេមិនត្រឹមតែកំពុងតែប្រើប្រាស់រថយន្តក្រុងអគ្គិសនីនោះទេ ប្រទេសនេះក៏មានរោងចក្រដំឡើងរថយន្តក្រុងនេះផងដែរ ដែលជ្រកក្រោមស្លាកសញ្ញាពាណិជ្ជថា VinFast ។ ក្រុមហ៊ុននេះ បានកំពុងតែផលិត និងដំណើរការសេវាកម្មរថយន្តក្រុងសាធារណៈនៅវៀតណាមតាំងពីខែមីនា ឆ្នាំ២០២២ ជាមួយនឹងរថយន្តដែលមានធុងអាគុយផ្ទុកអគ្គិសនីទំហំ២៨១ kWh ហើយអាចនឹងធ្វើការដឹកជញ្ជូនបានដល់ទៅពី ២២០ ទៅ ២៦០ គីឡូម៉ែត្រ ។
សម្រាប់ថៃវិញក្រុមហ៊ុន Thai Smile បានអះអាងថា ខ្លួននឹងពង្រីកការប្រើប្រាស់រថយន្តក្រុងប្រើអគ្គីសនីនេះដល់ទៅ ៣.១០០ គ្រឿង នៅលើផ្លូវរត់សរុបចំនួន ១២២ ខ្សែ នៅក្នុងឆ្នាំ២០២៣នេះ ខណៈដែលពេលនេះ ក្រុមហ៊ុនកំពុងតែដំណើរការជាមួយនឹងរថយន្តក្រុងអគ្គិស នីចំនួន ១.២៥០ គ្រឿង នៅលើផ្លូវរត់ ៧១ ។
អគ្គនាយកដ្ឋានដឹកជញ្ជូនផ្លូវគោកថៃបានអះអាងថា នៅក្នុងទីក្រុងបាងកក មានផ្លូវរថយន្ត ក្រុងចំនួន ៧៧ ខ្សែ ហើយក្រុមហ៊ុននេះកាន់កា.ប់ ៧១ ខ្សែ ខណៈដែលនៅសល់ គឺក្រុមហ៊ុនពីរទៀតបានទទួលភ្លើងខៀវរួចហើយដែរ។ នៅពេលនេះ ថៃក៏មានផែនការយករថយន្តក្រុងអគ្គិសនីមកជំនួសរថយន្តក្រុងប្រើដោយថាមពលប្រេងម៉ាហ្ស៊ូតដែរ ប៉ុន្តែនៅមិនទាន់អាចផ្លាស់ប្តូរទាំងស្រុងនៅឡើយទេ ។
លើផែនការជំរុញ និងលើកទឹកចិត្តការប្រើប្រាស់រថយន្តអគ្គិសនីនៅកម្ពុជានេះ វាពិតជាយឺត សម្រាប់កម្ពុជា បើធៀបនឹងវៀតណាម និង ថៃ ប៉ុន្តែទោះបីជាយ៉ាងណាក៏ដោយ កម្ពុជាក៏កំពុងតែមានស្ថានភាពមួយប្រសើរជាងប្រទេសមួយចំនួននៅក្នុងតំបន់ផងដែរ ខណៈដែលពេលនេះ រាជរដ្ឋាភិបាលក៏បានដាក់ចេញនូវគោលនយោបាយ ផែនការយុទ្ធសាស្ត្រ និងវិធានការណ៍ចាំបាច់នានា ដើម្បីឈានទៅសម្រេចបាននូវការប្រើប្រាស់រថយន្តអគ្គិសនី ក្នុងអត្រា៤០% និងទោចក្រយានយន្តអគ្គិសនី ក្នុងអត្រា៧០% នៅឆ្នាំ២០៥០។ ដោយ ៖ ហេង ចេស្តារ
ចែករំលែកព័តមាននេះ