- ភ្នំពេញ
ពលរដ្ឋមួយចំនួនបានត្អូញថា លុយបច្ចុប្បន្នពិបាករក ប៉ុន្តែងាយស្រួលចំណាយ។ លុយពិបាក រកប៉ុន្តែទំនិញនៅលើទីផ្សារឡើងថ្លៃ
ពលរដ្ឋមួយចំនួនបានត្អូញថា លុយបច្ចុប្បន្នពិបាករក ប៉ុន្តែងាយស្រួលចំណាយ។ លុយពិបាក រកប៉ុន្តែទំនិញនៅលើទីផ្សារឡើងថ្លៃ
ពលរដ្ឋមួយចំនួនបានត្អូញថា លុយបច្ចុប្បន្នពិបាករក ប៉ុន្តែងាយស្រួលចំណាយ។ លុយពិបាក រកប៉ុន្តែទំនិញនៅលើទីផ្សារឡើងថ្លៃ។
អ្នកស្រី ជាតា ពលរដ្ឋម្នាក់នៅភ្នំពេញ និយាយថា បច្ចុប្បន្ននេះ ទំនិញលើទីផ្សារគ្រប់មុខ បាន ឡើងថ្លៃ។ អ្នកស្រីថា កាលពីមុនប្រាក់៤ម៉ឺនរៀល ឬ១០ដុល្លារ គ្រួសារអ្នកស្រីអាចទិញម្អូបអាហារទទួលទានបានមួយថ្ងៃ ប៉ុន្តែបច្ចុប្បន្ននេះ ១០ដុល្លារមិនអាចហូបបានមួយថ្ងៃនោះទេ។
បុគ្គលិកក្រុមហ៊ុនឯកជនរូបនេះ បញ្ជាក់ថា ដោយសារគាត់ជាបុគ្គលិកក្រុមហ៊ុន ដែលមាន ចំណូលទៀងទាត់ មិនសូវលំបាកនៅក្នុងការរកប្រាក់នោះទេ។ គ្រាន់តែមិនមានថវិកាសល់ សម្រាប់ពេលមានអាសន្នប៉ុណ្ណោះ។ «មិត្តភ័ក្តិខ្ញុំបានត្អូញគ្រប់គ្នាពីទំនិញឡើងថ្លៃនេះ។ កាលពីមុខយើងអាចកាន់១០ដុល្លារទៅផ្សារ ប៉ុន្តែឥឡូវមិនបានទេ។ អ្វីៗឡើងថ្លៃទាំងអស់។ សូម្បីថ្លៃសាលារៀនកូនក៏ឡើងថ្លៃដែរ»។
លោក ផុន សំបូរ អ្នករត់ម៉ូតូកង់បី និយាយថា ពលរដ្ឋឥឡូវមិនសូវចាយលុយនោះទេ ដោយសារការរកលុយរបស់ពួកគាត់ក៏លំបាកដែរ។ បុរសរូបនេះនិយាយថា នៅពេលពលរដ្ឋមិនចាយលុយ ធ្វើឱ្យការរកចំណូលរបស់គាត់ក៏ធ្លាក់ចុះ។ «ថ្ងៃខ្លះខ្ញុំរកប្រាក់បានតែ២ម៉ឺនរៀលប៉ុណ្ណោះ។ ២ម៉ឺនរៀល គ្រាន់តែហូបបាន៣ពេលក្នុងមួយថ្ងៃ គឺអស់ហើយ គ្មានលុយសល់ទេ។ វាពិតជាលំបាកណាស់នាពេលបច្ចុប្បន្ននេះ»។
លោក សំបូរ ថា សម្រាប់អាហារដែលមានតម្លៃទាបនៅភ្នំពេញ កាលពីមុនលោកអាចទទួល ទានបានពី៤ទៅ៥ពាន់រៀលក្នុងមួយពេល។ តែបច្ចុប្បននេះ អាហារតាមចិញ្ចើមផ្លូវទាំងនោះមានតម្លៃពី៦ពាន់រៀលឡើងទៅក្នុងមួយពេល។
លោក ង៉ែត ជូ អ្នកជំនាញហិរញ្ញវត្ថុ បានទទួលស្គាល់ថា លុយពិបាកណាស់នាពេលបច្ចុប្បន្ន។ លោកបាននិយាថា គេមិនអាចរស់នៅដោយភាពងាយស្រួលនៅក្នុងការចាយលុយដែលលំបាករកនោះទេ។ «ជម្រើសមានតែមួយគត់ គឺប្រឹងរៀនសូត្រ និងសន្សំលុយដែលរក បាន ដោយលំបាក ដើម្បីវិនិយោគបង្កើតលុយដែលស្រួល»។
អតិផរណាជាមធ្យមប្រចាំត្រីមាសទី២ ឆ្នាំ២០២២ បានកើនឡើងដល់ ៧.៤% ខណៈកាលពីត្រីមាសទី២ ឆ្នាំ២០២១ មានអត្រាត្រឹមតែ២.៨%។ ព្រឹត្តិបត្រស្ថិតិសេដ្ឋកិច្ច និងហិរញ្ញវត្ថុប្រចាំត្រីមាសទី២ ឆ្នាំ២០២២ របស់ក្រសួងសេដ្ឋកិច្ច និងហិរញ្ញវត្ថុ ចុងឆ្នាំ២០២២ បង្ហាញថា អត្រាអតិផរណាក្នុងត្រីមាសទី២ នៅឆ្នាំ២០២២ គឺជាអត្រាដ៏ខ្ពស់មួយដែល មិនធ្លាប់មានពីមុនមក ក្នុងរយៈពេល៧ឆ្នាំចុងក្រោយនេះ ពោលគឺចាប់តាំងពីឆ្នាំ២០១៦ ដោយសារតែការកើនឡើងនៃតម្លៃប្រេងសាំង និងការកើនឡើងនៃតម្លៃទំនិញផ្សេងៗ បន្ទាប់ពីកើតមានវិបត្តិ សកលផ្ទួនៗគ្នា បើទោះបីជាកម្ពុជា រក្សាបាននូវលំនឹងនៃអត្រាប្តូរប្រាក់ក៏ដោយ។
ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ក្នុងត្រីមាសទី២ សន្ទស្សន៍ថ្លៃសាច់ជ្រូក បានកើនឡើង៥.៩%, ត្រី ៥.៦%, ឧស្ម័ន (Gas) កើន២៧.៩%, ។ ចំណែកទំនិញ និងសេវាកម្មផ្សេងៗ បានកើនឡើងដល់៤.៩%។ ចំណែកអត្រាប្តូរប្រាក់ ក្នុងត្រីមាសទី២ឆ្នាំនេះ ជាមធ្យមក្នុងរង្វង់ ៤ ០៦៥.១រៀលក្នុងមួយដុល្លារអាមេរិក ធ្លាក់ចុះ ០.២%។
ក្រសួងសេដ្ឋកិច្ចក៏បានបង្ហាញសន្ទស្សន៍ថ្លៃទំនិញសំខាន់ៗ លើទីផ្សារអន្តរជាតិផងដែរ រួមមាន ប្រេងឆៅថ្លៃ ១១០.១៩៩ដុល្លារក្នុងមួយបារ៉ែល កើនឡើង៦៤.២%, កៅស៊ូ (TSR20) តម្លៃ១ ៦៥២.១០ដុល្លារក្នុងមួយតោន ថយចុះ៣%, មាសថ្លៃ ២ ០៥៦.០១ដុល្លារក្នុងមួយអោន កើនឡើង៣.៣% និងអង្ករ (បាក់៥%) ថ្លៃ៤៤៦.៣៣ដុល្លារក្នុងមួយតោន ថយចុះ៧.៩% បើធៀបនឹងរយៈពេលដូចគ្នាកាលពីឆ្នាំ២០២១ ។
អ្នកសេដ្ឋកិច្ចខ្លះបាននិយាយថា វិបត្តិកូវីដ១៩ បន្ទាប់មកវិបត្តិសង្គ្រាមរុស្ស៊ី អ៊ុយក្រែនទៀត បានបង្កផលប៉ះពាល់ជាខ្លាំងដល់ពលរដ្ឋដែលមានចំណូលទាបនៅកម្ពុជា។ ហើយពលរដ្ឋមួយចំនួន ដែលទើបតែងើបចេញពីភាពក្រីក្រ ក៏បានធ្លាក់ខ្លួនក្រីក្រឡើងវិញ នៅគ្រាវិបត្តិផ្ទួនៗ គ្នាប្រមាណ៣ឆ្នាំចុងក្រោយនេះ៕ ដោយ សារ៉ាន់
ចែករំលែកព័តមាននេះ