ពេជ្រ សម្បត្តិ ចាប់ផ្ដើមល្បីរន្ទឺដល់ថៃកាន់តែខ្លាំង ទំនងជិតដល់កម្រិតអាចសាកជាមួយ Rodtang ហើយ
- ភ្នំពេញ
រាជធានីភ្នំពេញ ៖ អ្នកលេងគុនខ្មែរ ពេជ្រ សម្បត្តិ បានធ្វើឱ្យប្រិយមិត្តអ្នកគាំទ្ររាប់ម៉ឺននាក់ទាំង
រាជធានីភ្នំពេញ ៖ អ្នកលេងគុនខ្មែរ ពេជ្រ សម្បត្តិ បានធ្វើឱ្យប្រិយមិត្តអ្នកគាំទ្ររាប់ម៉ឺននាក់ទាំងអ្នកទស្សនាផ្ទាល់ និងអ្នកទស្សនាតាមរយៈការផ្សាយ ជក់ចិត្ត និងកោតសរសើរគ្រប់ៗគ្នា តាមរយៈការតទល់ជាមួយនឹងជើងខ្លាំងថៃសេកសាន់ ដោយបានយកឈ្នះថៃនេះដោយពិន្ទុ កាលពីប៉ុន្មានថ្ងៃមុននេះ ខណៈកីឡាករថៃនេះក៏ធ្លាប់ផ្តួលកីឡាករកម្ពុជាដែរ គឺកីឡាករ អេលីត សាន់ ។
ជ័យជម្នះរបស់កីឡាករគុនខ្មែរដែលមានរហស្សនាមថា«ក្របីព្រៃ»លើកីឡាករជើងខ្លាំងថៃលំដាប់Aរូបនេះ កាន់តែធ្វើឱ្យរូបគេកាន់តែល្បីរន្ទឺដល់ថៃកាន់តែខ្លាំង ធ្វើឱ្យផេកមួយចំនួនថែមទាំងលើកឡើងពីទស្សនះអ្នកគាំទ្រដែលមើលឃើញថា សមត្ថភាពរបស់ក្របីព្រៃពេជ្រ សម្បត្តិ ទំនងជិតដល់កម្រិតអាចសាកជាមួយកីឡាករជើងខ្លាំងថៃវ៉ៃមិនចេះឈឺRodtangហើយ ។
ទោះបីយ៉ាងណា អ្នកគាំទ្រខ្លះបានបញ្ចេញទស្សនៈចង់ឱ្យពេជ្រ សម្បត្តិ ប្រកួតជាមួយកីឡាករជើងខ្លាំងថៃ៣-៤នាក់ទៀតសិនចាំទៅជួបជាមួយRodtangក៏មិនទាន់ហួសពេលដែរ។ ពេជ្រ សម្បត្តិ ចាប់ផ្ដើមល្បីឈ្មោះ បន្ទាប់ពីឈ្នះកីឡាករជើងខ្លាំងថៃ ផាត់ថាណា ដើម្បីក្លាយជាម្ចាស់ជើងឯកខារ៉ាប៉ាវ រដូវកាលទី៨ ឆ្នាំ២០២២ អមដោយប្រាក់រង្វាន់៦ពាន់ដុល្លារកាលពីយប់ថ្ងៃទី២៣ តុលា នៅសង្វៀនបាយ័នស្ទឹងមានជ័យ ។
សិស្សគុននៃក្លិបប្រដាល់ចលនាយុវជនកម្ពុជា១៥៧គុនខ្មែរ កីឡាករ ពេជ្រ សម្បត្តិ បានចាត់ទុកឆ្នាំ២០២២ ជាឆ្នាំដែលរូបគេជោគជ័យបំផុតដោយប្រើពេលត្រឹមតែជាង២ខែ អាចដណ្តើមបានខ្សែក្រវាត់បានចំនួន២ខ្សែផ្សេងគ្នា ។ ខ្សែក្រវាត់២គ្រឿងដែលពេជ្រ សម្បត្តិ ដណ្ដើមបានគឺខ្សែក្រវាត់ខារ៉ាបាវ តាមរយៈការយកឈ្នះកីឡាករថៃផាត់ថាណាដោយពិន្ទុ នៅអំឡុងចុងខែតុលា និងខែក្រវាត់គ្រុឌគុនខ្មែរ បន្ទាប់ពីយកឈ្នះពិន្ទុកីឡាករធន់ អៀនឡៃ កាលពីថ្ងៃឆ្លងឆ្នាំ២០២២ ចូល២០២៣ ។
ជ័យជម្នះខ្សែក្រវាត់ផ្ទួនៗ និងការទទួលបានការគាំទ្រយ៉ាងសន្ធឹកសន្ធាប់ពីអ្នកស្រឡាញ់ប្រដាល់ដូចពេលបច្ចុប្បន្ន កូនសិស្សរបស់លោក ពេជ្រ សុផាន់ រូបនេះ បានអះអាងថា ជាជោគជ័យដ៏ធំមួយក្នុងអាជីពជាអ្នកប្រដាល់ដែលមិននឹកស្មានដល់ ខណៈរូបគេទើបតែចូលប្រឡូកបានរយៈពេល ២ឆ្នាំប៉ុណ្ណោះ។
សូមជម្រាបជូនថា ក្របីព្រៃ ពេជ្រ សម្បត្តិ មានស្រុកកំណើតនៅស្រុកបសេដ្ឋ ខេត្តកំពង់ស្ពឺ ហើយរូបគេបានចូលហ្វឹកហាត់ប្រដាល់គុនខ្មែរនៅអំឡុងឆ្នាំ២០២១ ដែលគិតមកទល់បច្ចុប្បន្នមានរយៈពេលប្រមាណ២ឆ្នាំគត់ ។ គិតមកទល់ដើមឆ្នាំ២០២៣នេះ ពេជ្រ សម្បត្តិ មានវ័យ២១ឆ្នាំ និងកំពុងហ្វឹកហាត់ប្រដាល់នៅក្លិបចលនាយុវជនកម្ពុជា ១៥៧គុនខ្មែរ ជាមួយនឹងប្អូនប្រុសម្នាក់ទៀត គឺកីឡាករ ផាន់ សឹង្ហៈ ដែលមានលោក ពេជ្រ សុផាន់ ជាគ្រូបង្ហាត់។
រយៈពេល២ឆ្នាំនៃការចូលប្រឡូកវិស័យគុនខ្មែរនេះ ពេជ្រ សម្បត្តិ ទទួលបានសមិទ្ធផលគួរឱ្យកត់សម្គាល់ គឺខ្សែក្រវាត់ ២គ្រឿង ទ្រព្យសម្បត្តិមួយចំនួនដែលសន្សំបានមកពីការឡើងសង្វៀន ជាពិសេសគឺការគាំទ្រពីទស្សនិកជនយ៉ាងច្រើនកុះករដែលកម្រកីឡាករណាមួយធ្វើបានដូចរូប
គេ ៕
ចែករំលែកព័តមាននេះ