សម្ដេចតេជោ ហ៊ុន សែន សរសើរការដឹកនាំរបស់លោក Honda ដែលមិនឱ្យមានតួឯកក្នុងក្រុម
- ភ្នំពេញ
រាជធានីភ្នំពេញ ៖ ថ្លែងក្នុងពិធីប្រគល់សញ្ញាបត្រជូនដល់គរុនិស្សិតបច្ចេកទេស និងនិស្សិតនៃវិទ្យា
រាជធានីភ្នំពេញ ៖ ថ្លែងក្នុងពិធីប្រគល់សញ្ញាបត្រជូនដល់គរុនិស្សិតបច្ចេកទេស និងនិស្សិតនៃវិទ្យា
រាជធានីភ្នំពេញ ៖ ថ្លែងក្នុងពិធីប្រគល់សញ្ញាបត្រជូនដល់គរុនិស្សិតបច្ចេកទេស និងនិស្សិតនៃវិទ្យាស្ថានជាតិបណ្តុះបណ្តាលបច្ចេកទេស នៅមជ្ឈមណ្ឌលសន្និបាត និងពិព័រណ៍ជ្រោយចង្វារ កាលពីថ្ងៃទី២៧ កុម្ភៈ ម្សិលមិញនេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា មិនត្រឹមតែលើកទឹកចិត្តឱ្យអត្តពលិកប្រឹងប្រែងហ្វឹកហាត់ ដើម្បីប្រកួតឱ្យបានល្អក្នុងលក្ខណៈជាក្រុម ជាពិសេសវិស័យកីឡា
បាល់ទាត់ និងបាល់ទះប៉ុណ្ណោះទេ សម្ដេច ក៏បានសរសើរលោក Keisuke Honda អ្នកចាត់ការក្រុមបាល់ទាត់ជម្រើសជាតិកម្ពុជាដែលបានធ្វើកំណែទម្រង់វិស័យបាល់ទាត់កម្ពុជាឱ្យមានការរីកចម្រើនផងដែរ។
សម្ដេចតេជោ ហ៊ុន សែន ដែលជាអ្នកស្នេហាវិស័យកីឡាមួយរូបនោះ មើលឃើញថា ការលេងបាល់ទាត់ និងបាល់ទះ ភាគច្រើនគេឱ្យតម្លៃខ្លាំងទៅលើខ្សែប្រយុទ្ធ និងស្មាត់ជួរមុខ ប៉ុន្តែគេហាក់ដូចជាភ្លេចពីគុណសម្បត្តិខ្សែបម្រើ ខ្សែការពារ និងអ្នកប៉ះបាល់ទៅវិញ ។ សម្រាប់សម្ដេច ហ៊ុន សែន ការលេងបាល់ គឺអាស្រ័យលើអ្នកបញ្ជូន ឬអ្នកប៉ះបាល់ល្អ ហើយមានភាពវៃឆ្លាតនៅក្នុងក្រុម។
បើតាមប្រមុខរាជរដ្ឋាភិបាល ក្រោមការដឹកនាំរបស់លោក Honda បានធ្វើឱ្យវិស័យបាល់ទាត់រីកចម្រើនតាមរយៈការពង្រឹងគុណភាពកីឡាករ រាប់ចាប់ពីអ្នកចាំទី ដល់ខ្សែប្រយុទ្ធ ។ បន្ថែមពីនេះទៀត សម្ដេចបានមើលឃើញពីរបៀបដឹកនាំរបស់លោក Honda ក្នុងការជ្រើសរើសកីឡាករ ជាពិសេសមិនបង្កើតឱ្យមានកីឡាករតួឯក នៅក្នុងក្រុម ។ សម្ដេចតេជោនាយករដ្ឋមន្ត្រី បានបន្ថែមថា៖« Honda ដែលជាជនជាតិជប៉ុន អ្នកណាដែលដើរតួឯក អូសបាល់មិនព្រមបញ្ជូនបាល់ឱ្យគេ Honda អត់ឱ្យចូលទាត់ទេ ទោះអ្នកឯង មានឈ្មោះល្បីក៏ដោយ ក៏ Honda អត់ឱ្យចូលទាត់ទេ ព្រោះអាហ្នឹងលេងមិនមែនស្មារតីជាក្រុម គឺគិតតែអូសបាល់យកទៅស៊ុតតែម្ដង»។
គួរបញ្ជាក់ថា លោក Honda ដែលឡើងធ្វើជាអ្នកចាត់ការទូទៅក្រុមគោព្រៃកម្ពុជានៅឆ្នាំ២០១៨ បានបញ្ចប់ការដឹកនាំក្រុមឈុតធំហើយ ក្រោយកិច្ចសន្សារបស់លោកក៏ត្រូវបានបញ្ចប់នៅចុងឆ្នាំ២០២២ ។ តែលោក Honda នៅសល់កាតព្វកិច្ចមួយទៀត សម្រាប់ដឹកនាំក្រុមជម្រើសជាតិអាយុក្រោម២២ឆ្នាំ សម្រាប់ការប្រកួតព្រឹត្តិការណ៍ស៊ីហ្គេម ឆ្នាំ២០២៣ នាខែឧសភា ខាងមុខនេះ ។
ការថ្លែងរបស់សម្ដេចតេជោហ៊ុន សែន ធ្វើឡើងគាប់ជួនក្រុមបាល់ទាត់ជម្រើសជាតិកម្ពុជាអាយុក្រោម២២ឆ្នាំ (U22) បានចេញដំណើរទៅបោះជំរំហ្វឹកហាត់នៅប្រទេសថៃដើម្បីត្រៀមប្រកួតកីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះផងដែរ។
លោក Keisuke Honda អ្នកចាត់ការទូទៅក្រុមបាល់ទាត់ជម្រើសជាតិកម្ពុជា កាលពីព្រឹកថ្ងៃទី២៧ ខែកុម្ភៈ ម្សិលមិញនេះ បានប្រកាសថា៖«យើងចាប់ផ្តើមបោះជំរំហ្វឹកហាត់សម្រាប់ក្រុមបាល់ទាត់ជម្រើសជាតិកម្ពុជាអាយុក្រោម២២ឆ្នាំនៅប្រទេសថៃចាប់ពីថ្ងៃនេះទៅ»។
គួររំលឹកថា កាលពីថ្ងៃទី២០ ខែកុម្ភៈ កន្លងទៅនេះ សហព័ន្ធកីឡាបាល់ទាត់កម្ពុជា បានធ្វើការកោះហៅកីឡាករបាល់ទាត់កម្ពុជាអាយុក្រោម២២ឆ្នាំ ចំនួន៣០នាក់ ដើម្បីចូលរួមបោះជំរំហ្វឹកហាត់នៅប្រទេសថៃ ។ កីឡាករទាំង៣០នាក់មកពីក្លិបចំនួន១០ នៃលីគកំពូល និងលីគទី២កម្ពុជា ក្នុងនោះមានវិសាខា៥នាក់, ភ្នំពេញក្រោន៣នាក់, បឹងកេត៥នាក់, ព្រះខ័នរាជស្វាយរៀង៦នាក់, ណាហ្គាវើលដ៍៤នាក់, សមាគមកីឡាបាល់ទាត់ ខ.ភ.ម ២នាក់, អង្គរថាយហ្គឺ១នាក់, សូលទីឡូអង្គរ១នាក់, អគ្គិសនីកម្ពុជា១នាក់ និងព្រៃវែង១នាក់ ។
សម្រាប់ការហ្វឹកហាត់ដំណាក់កាលទី១ កីឡាករទាំង៣០រូប និងក្រុមគ្រូបង្វឹកនឹងចាប់ផ្ដើមធ្វើពីថ្ងៃទី២៧ ខែកុម្ភៈ ដល់ថ្ងៃទី ១៥ ខែមីនា ឆ្នាំ២០២៣។
កីឡាស៊ីហ្គេម លើកទី៣២ នឹងចាប់ផ្ដើមបើកជាផ្លូវការពីថ្ងៃទី០៥ ដល់ថ្ងៃទី១៧ ខែឧសភា ប៉ុន្តែសម្រាប់វិញ្ញាសាកីឡាបាល់ទាត់ ចាប់ប្រកួតពីថ្ងៃទី២៩ ខែមេសា ឆ្នាំ ២០២៣ ៕
ចែករំលែកព័តមាននេះ