ពិធីសម្ពោធអគារសាលាពុទ្ធិកបឋមសិក្សា និងសមិទ្ធិផលនានានៅវត្តចន្ត្រី
ខេត្តស្វាយរៀង ៖ លោកជំទាវ ម៉ែន សំអន មានប្រសាសន៍ថា ៖ រាជរដ្ឋាភិបាលខំប្រឹងប្រែងកែទម្រង់គោលនយោបាយអភិវឌ្ឍន៍ជាតិ
ខេត្តស្វាយរៀង ៖ លោកជំទាវ ម៉ែន សំអន មានប្រសាសន៍ថា ៖ រាជរដ្ឋាភិបាលខំប្រឹងប្រែងកែទម្រង់គោលនយោបាយអភិវឌ្ឍន៍ជាតិ ធ្វើឲ្យប្រសើឡើងលើគ្រប់វិស័យ គឺមនុស្ស ទឹក ភ្លើង ផ្លូវ ។ លោកជំទាវបន្តទៀតថា មនុស្សសំដៅលើវិស័យអប់រំ យើងមានសាលា យើងមានគ្រូបង្រៀនប្រកបដោយគរុកោសល្យ ពីព្រោះចំណេះដឹង ជាធនធានដ៏មានសារសំខាន់ ដើម្បីធ្វើការអភិវឌ្ឍន៍សង្គមជាតិឲ្យរីកចំរើន និងមាននិរន្តរភាព។ ទឹក សំដៅលើប្រព័ន្ធធារាសាស្ត្រ សម្រាប់ប្រជាកសិករបង្កបង្កើនផលផ្នែកវិស័យកសិកម្ម ដែលប្រទេសកម្ពុជាយើងមានវិស័យកសិកម្ម ជាអាទិភាពក្នុងការបង្កើនសេដ្ឋកិច្ចជាតិ ដោយប្រជាពលរដ្ឋប្រមាណ៨៥ភាគរយ ប្រកបមុខរបរកសិកម្ម ។ ហើយទឹក យើងមានទឹកស្អាតសម្រាប់ប្រើប្រាស់ និងបរិភោគ ធ្វើឲ្យសុខមាលភាពរបស់ប្រជាពលរដ្ឋល្អប្រសើរ និងមានជីវភាពធូរធារក្នុងគ្រួសារ ។ ផ្លូវ ជាសរសៃឈាមសេដ្ឋកិច្ច សម្រាប់ការធ្វើដំណើរទំនាក់ទំនងការងារ និងដឹកកសិផល ឬដឹកទំនិញគ្រប់ប្រភេទ ។ ភ្លើង សំដៅលើភ្លើងអគ្គិសនី រាជរដ្ឋាភិបាលប្រឹងប្រែងរកវិនិយោគិន ធ្វើយ៉ាងណាឲ្យតម្លៃទាប ឲ្យប្រជាពលរដ្ឋក្រីក្រអាចប្រើប្រាស់បាន និងខំកៀរគរអ្នកវិនិយោគបរទេស ចូលមកបង្កើតរោងចក្រសហគ្រាសឲ្យបានច្រើន ដើម្បីរកការងារឲ្យកម្មករ កម្មការនី មានការងារធ្វើ និងមានប្រាក់បៀវត្សខ្ពស់ ប្រាក់ខែគោល ១៦៨ដុល្លារ ទៅ១៧៣ដុល្លារ ក្នុងឆ្នាំ២០១៨ ។
លោកជំទាវ ម៉ែន សំអន មានប្រសាសន៍បែបនេះ នៅក្នុងពិធីសម្ពោធអាគារពុទ្ធិកបឋមសិក្សា និងសមិទ្ធិផលនានានៅវត្តចន្ត្រី កាលពីវេលាម៉ោង០៩និង០០ព្រឹក ថ្ងៃទី២៣ ខែសីហា ឆ្នាំ២០១៧ ស្ថិតនៅភូមិចន្ត្រី ឃុំចន្ត្រី ស្រុករមាសហែក ។ ក្នុងឱកាសនោះដែរ ក៏មានការអញ្ជើញចូលរួមពីសំណាក់ លោក គឹម ធា ប្រធានក្រុមប្រឹក្សាខេត្ត លោក ម៉ែន វិបុល អភិបាល នៃគណអភិបាលខេត្ត មន្ត្រីរាជ្យការ ប្រជាពលរដ្ឋ សិស្សានុសិស្ស ព្រះសង្ឃ សរុប២៣០០អង្គនាក់ ។
លោកអភិបាលស្តីទីស្រុករមាសហែក បានមានប្រសាសន៍ថា ៖ វត្តចន្ត្រី បានចាប់ផ្តើមកសាងឡើងនៅឆ្នាំ១៧៥៩ គឺមានអាយុ២៥៨ឆ្នាំមកហើយ ដែលមានលោកឧបាសក់ នាម ធន់ និងឧបាសិកា នាម គង់ មានសទ្ធាជ្រះថ្លា ក្នុងព្រះពុទ្ធសាសនា បានបរិច្ចាគដីស្រែទំហំ ៤ហិកតា៦៥អា សម្រាប់សម្បត្តិវត្ត និងដឹកនាំកសាងដោយព្រះគ្រូចៅអធិការ ព្រះនាម មាស បានកសាងរួចនៅឆ្នាំ១៧៦០ រហូតមកដល់ឆ្នាំ១៩២១ មានព្រះគ្រូចៅអធិការ៤អង្គ គ្រប់គ្រងកសាងបន្ត ៕
ចែករំលែកព័តមាននេះ