រាជធានីភ្នំពេញ ៖ ដើមឈើយ៉ាងធំមួយដើម (ដើមគីនិន ) ដែលប្រជាពលរដ្ឋតែងហៅថា ដើមគ្រា.ប់បែក សង្ស័យតែពុកផុយឬសកែវអស់ទៅហើយ ទើបដួលរលំទៅលើផ្លូវបង្កអោយការកកស្ទះចរាចរណ៍ តែមិនប៉ះពាល់ដល់អ្នកធ្វើដំណើរនោះឡើយ ។
ហេតុការណ៍នេះ បង្កភ្ញាក់ផ្អើលកាលពីវេលាម៉ោង០៦ព្រឹកព្រលឹម ត្រូវនឹងថ្ងៃទី០៩ ខែឧសភា ឆ្នាំ២០២៤ នៅត្រង់ចំណុចជាប់នឹងរបងមន្ទីរពេទ្យគន្ធបុប្ផា ស្ថិតនៅតាមបណ្តោយផ្លូវលេខ៩០ សង្កាត់វត្តភ្នំ ខណ្ឌដូនពេញ រាជធានីភ្នំពេញ ។
បើតាមប្រភពព័ត៌មានពីប្រជាពលរដ្ឋរស់នៅក្បែរនោះបានប្រាប់អោយដឹងថា គាត់បានដើរហាត់ប្រាណ និងឧស្សាហ៍ដើរឆ្លងកាត់កំណាត់ផ្លូវលេខ៩០នេះ ជារៀងរាល់ព្រឹកតែម្តង ។ ខណៈពេលមកដល់វេលាម៉ោងកើតហេតុ ស្របពេលនោះគាត់កំពុងឈរនិយាយគ្នាជាមួយអ្នកលក់ភេសជ្ជៈក្បែរនោះ ។ លុះមួយសន្ទុះក្រោយមកក៏ឮសំឡេងបាក់ដើមឈើឮយ៉ាងខ្លាំង ផ្អើលអ្នករស់នៅជុំវិញកន្លែងកើតហេតុ រត់ចេញមកមើលតែម្តង ។
បើតាមប្រភពពីអាជ្ញាធរបានបញ្ជាក់ថា មូលហេតុដើមឈើយ៉ាងធំនេះដួលរលំ គឺដោយសារតែឬសកែវរបស់ដើមឈើនេះពុកផុយអស់ទៅទើបបណ្តាលអោយដួលរលំបែបនេះ ។ អាជ្ញាធរបន្តទៀតថា ក្នុងហេតុការណ៍នេះដែរ មិនបានបង្កអោយមានមនុស្សរងរបួសនោះឡើយ ។
បន្ទាប់ពីកើតហេតុភ្លាមៗ លោកជា ខេមា អភិបាលខណ្ឌដូនពេញ បានចុះមកដល់ទីតាំងផ្ទាល់ តែម្តង ។ ភ្លាមៗលោក អភិបាល បានទំនាក់ទំនងទៅក្រសួងសារធារណការអោយជួយចុះមកកាត់ដើមឈើខាងលើផងដែរ ។
ក្រោយពេលកើតហេតុ ក្រសួងសាធារណការ និងដឹកជញ្ជូនបានចុះមកដល់ រួចធ្វើការកាត់ដើមឈើមួយដើមយ៉ាងធំនេះចេញ និងដើម្បីកុំអោយការកកស្ទះចរាចរណ៍ក្នុងការធ្វើដំណើររបស់បងប្អូនប្រជាពលរដ្ឋ ៕ ដោយ ៖ រដ្ឋា
ចែករំលែកព័តមាននេះ