ខេត្តសៀមរាប ៖ ភ្លៀងមួយមេលាយឡំខ្យល់ ផ្គរ និងរន្ទះ បានបាញ់លើមនុស្សបណ្តាលឱ្យស្លាប់ម្នាក់ និងរបួសធ្ងន់ម្នាក់ ដែលហេតុការណ៍រន្ធត់នេះកើតឡើងកាលពីវេលាម៉ោង១៤ និង៤០នាទីរសៀលថ្ងៃទី០៨ ខែឧសភា…
ខេត្តសៀមរាប ៖ ភ្លៀងមួយមេលាយឡំខ្យល់ ផ្គរ និងរន្ទះ បានបាញ់លើមនុស្សបណ្តាលឱ្យស្លាប់ម្នាក់ និងរបួសធ្ងន់ម្នាក់ ដែលហេតុការណ៍រន្ធត់នេះកើតឡើងកាលពីវេលាម៉ោង១៤ និង៤០នាទីរសៀលថ្ងៃទី០៨ ខែឧសភា ឆ្នាំ២០២៤ ស្ថិតត្រង់ចំណុចត្រពាំងក្បាលក្របី ស្ថិតក្នុងទឹកដី ភូមិរំដួល ឃុំរើល ស្រុកពួក ខេត្តសៀមរាប ។
បើតាមលោក ស៊ិន ចាន់ថុល អភិបាលស្រុកពួក បានប្រាប់នៅព្រឹកថ្ងៃទី៩ ខែឧសភា ឆ្នាំ ២០២៤ នេះថា មានភ្លៀងខ្យល់ និងផ្គររន្ទះបាញ់ នៅលើទឹកដីស្រុកពួក ខេត្តសៀមរាប ដែលនេះទឹកភ្លៀងដំបូងគេ ប៉ុន្តែបែរជាបង្កឱ្យមានមនុស្សស្លាប់ម្នាក់ និងរបួសធ្ងន់ម្នាក់ទៅវិញ ។
លោកបន្តថា ជនរងគ្រោះម្នាក់ឈ្មោះ កុក មិនា ភេទប្រុស អាយុ១៨ឆ្នាំ ជាកសិករ មានទីលំនៅភូមិក្បាលក្រពើ ឃុំរើល ស្រុកពួក ខេត្តសៀមរាប (ស្លាប់នៅនឹងកន្លែង)។ រីឯជនរងគ្រោះម្នាក់ទៀតឈ្មោះ នៅ ចាន់ ហៅណាំ ភេទប្រុស អាយុ១៨ឆ្នាំ ជាកសិករ មានទីលំនៅភូមិក្បាល ក្រពើ ឃុំរើល ស្រុកពួក ខេត្តសៀមរាប (រងរបួសធ្ងន់កំពុងសង្គ្រោះនៅមន្ទីរពេទ្យបង្អែក ស្រុកពួក) ។
លោកបញ្ជាក់ទៀតថា ក្នុងហេតុការណ៍គ្រោះធម្មជាតិខាងលើ ជនរងគ្រោះមានគ្នា៣នាក់ (ម្នាក់ទៀតជាឪពុកឈ្មោះតិត កុក អាយុ៥៣ឆ្នាំ) កំពុងព្យួរស្រែ ដោយប្រើគោយន្តកន្ត្រៃ ខណ:ពេលនោះឪពុកជាអ្នកភ្ជួរ ហើយកូនប្រុស និងក្មួយ២នាក់ខាងលើកំពុងឈរមើល ស្រាប់តែមានភ្លៀង និងផ្គររន្ទះបាញ់មកចំតែម្ដង។
ក្រោយហេតុការណ៍ ឪពុកបានរត់មកហៅបងប្អូននៅក្នុងភូមិរំដួល ចម្ងាយប្រហែល ២០០០ម៉ែត្រ ដើម្បីទៅជួយសង្គ្រោះដឹកជនរងគ្រោះ ( កូន និងក្មួយ) មកមណ្ឌលសុខភាពឃុំរើល តែជនរងគ្រោះម្នាក់បានស្លាប់ និងម្នាក់របស់ធ្ងន់កំពុងសង្គ្រោះបន្ទាន់នៅមន្ទីរពេទ្យបង្អែកស្រុកពួក ។
បច្ចុប្បន្ន សាកសពត្រូវបានសមត្ថកិច្ចនគរបាលស្រុកពួក ធ្វើការប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ។
ចែករំលែកព័តមាននេះ