ក្មេងទំនើងចំនួន៤នាក់ក្នុងចំណោម៥នាក់ ដែលតែងតែធ្វើសកម្មភាពគប់កញ្ចក់រថយន្តកាលពីពេលកន្លងទៅ បានត្រូវនគរបាលស្រុកត្រាំកក់ចាប់ឃាត់ខ្លួនកាលពី
ខេត្តតាកែវ ៖ ក្មេងទំនើងចំនួន៤នាក់ក្នុងចំណោម៥នាក់ ដែលតែងតែធ្វើសកម្មភាពគប់កញ្ចក់រថយន្តកាលពីពេលកន្លងទៅ បានត្រូវនគរបាលស្រុកត្រាំកក់ចាប់ឃាត់ខ្លួនកាលពីថ្ងៃទី២២ ខែកុម្ភៈ ឆ្នាំ២០២៣កន្លងទៅ វេលាម៉ោងប្រមាណ២និង១០នាទីរសៀល នៅក្នុងឃុំអង្គតាសោម ។
លោកវរសេនីយ៍ឯក ឌុក ធីយ៉ា អធិការនគរបាលស្រុកត្រាំកក់ បានឱ្យដឹងថា ក្មេងទំនើងដែលត្រូវបានចាប់ខ្លួនទាំង៤នាក់នេះមាន ៖ ១-ឈ្មោះ ហេង សុភក្តិ ហៅ ហ្តែត ភេទប្រុស អាយុ១៧ឆ្នាំ ជាសិស្ស រស់នៅភូមិត្រពាំងត្របែក ឃុំអង្គតាសោម ស្រុកត្រាំកក់ ដកហូតម៉ូតូ១គ្រឿងម៉ាកណិច ពណ៌ស ពាក់ផ្លាកលេខ តាកែវ១Z-៧២៩៦ ។
២-ឈ្មោះ ជុំ ចាន់ភារក្ស ភេទប្រុស អាយុ១៧ឆ្នាំ ជាសិស្ស រស់នៅភូមិព្រែរំដេង ឃុំអង្គតាសោម ដកហូតម៉ូតូ១គ្រឿងម៉ាកណិច ពណ៌ស លាយខៀវ ស៊េរីឆ្នាំ២០២៣ ពាក់ផ្លាកលេខតាកែវ ១AB-៥៥៧៨ ។
៣-ឈ្មោះ អ៊ុន យូ ភេទប្រុស អាយុ១៧ឆ្មាំ រស់នៅភូមិអង្គតាសោម ឃុំអង្គតាសោម ។
៤-ឈ្មោះ រី យ៉ានិត ភេទប្រុស អាយុ១៧ឆ្នាំ រស់នៅភូមិអង្គតាសោម ឃុំអង្គតាសោម ។
ចំណែកជនម្នាក់ទៀតឈ្មោះ លី ស៊ីអាន់ ភេទប្រុស អាយុ១៨ឆ្នាំ រស់នៅភូមិអង្គតាសោម ឃុំអង្គតាសោម និងជាម្ចាស់ម៉ូតូម៉ាកអ៊ិចសង់ទ័រ កំពុងរត់គេចខ្លួន ។
លោកអធិការបន្តថា នៅថ្ងៃទី២៣ ខែមករា ឆ្នាំ២០២៣ វេលាម៉ោងប្រមាណ៤និង១៥នាទីរសៀល នៅលើកំណាត់ផ្លូវជាតិលេខ៣ ចន្លោះគីឡូម៉ែត្រលេខ៧៨-៧៩ ស្ថិតក្នុងភូមិត្រពាំងខ្នារ ឃុំអង្គតាសោម មានករណីហិ.ង្សាដោយចេតនាដែលជនសង្ស័យមានគ្នាចំនួន៥នាក់ ជិះម៉ូតូ៣គ្រឿង គឺម៉ាកណិច២គ្រឿង និងម៉ាកអ៊ិចសង់់ទ័រ១គ្រឿង ប្រដាប់ដោយដុំថ្ម បានគប់ទៅលើកញ្ចក់រថយន្តម៉ាកហ្វដ ពណ៌ស ពាក់ផ្លាកលេខ កម្ពុជា EaLux68 ដែលជារបស់ឈ្មោះ អ៊ា អេលុច ភេទប្រុស អាយុ៤២ឆ្នាំ មានទីលំនៅក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ ។
រថយន្តខាងលើ ធ្វើដំណើរតាមផ្លូវជាតិលេខ៣ ពីខេត្តកំពតឆ្ពោះទៅរាជធានីភ្នំពេញ ហើយការគប់ដុំថ្មនេះ បណ្ដាលឲ្យបែកកញ្ចក់ពីមុខធ្លាយចូលទៅក្នុងរថយន្ត ត្រូវចំឈ្មោះ អ៊ា អេលុច រងរបួសធ្ងន់ត្រង់ក្ដោងច្រមុះ ។ ក្រោយពីធ្វើសកម្មភាពរួច ក្រុមជនសង្ស័យក៏បើកម៉ូតូគេចខ្លួនទៅទិសខាងត្បូងបាត់ទៅ ហើយសមត្ថកិច្ចបានធ្វើការស្រាវជ្រាវរហូតចាប់ខ្លួនបាន៤នាក់ ក្នុងចំណោម៥នាក់នោះ ។
នៅចំពោះមុខសមត្ថកិច្ច ក្មេងទំនើងទាំង៤នាក់ឆ្លើយថា ពួកគេបានជិះម៉ូតូគប់ដុំថ្មទៅលើគូជម្លោះរបស់ខ្លួនដែលជិះម៉ូតូតាមផ្លូវជាតិលេខ៣ ពីខាងត្បូងទៅខាងជើង តែបែរជាត្រូវរថយន្តទៅវិញ ។
លោកវរសេនីយ៍ឯក យ៉ុង ញីវ នាយការិយាល័យនគរបាលព្រហ្មទណ្ទកម្រិតស្រាលខេត្តបានឱ្យដឹងថា ក្មេងទំនើងទាំង៤នាក់ត្រូវបានកសាងសំណុំរឿងបញ្ជូនទៅសាលាដំបូងខេត្ត នៅថ្ងៃទី២៣ ខែកុម្ភៈ ឆ្នាំ២០២៣ ៕
ចែករំលែកព័តមាននេះ