ក្រុមអត្តពលិកជម្រើសជាតិ១៦៥នាក់ទទួលបានការលើកទឹកចិត្តពីក្រសួងអប់រំ ត្រៀមប្រជែងមេដាយស៊ីហ្គេម-អាស៊ានប៉ារ៉ាហ្គេម ឆ្នាំ២០២៣
- ភ្នំពេញ
រាជធានីភ្នំពេញ ៖ ក្រសួងអប់រំ យុវជន និងកីឡា បានរៀបចំពិធីសំណេះសំណាល និងសួរសុខទុក្ខក្រុម
រាជធានីភ្នំពេញ ៖ ក្រសួងអប់រំ យុវជន និងកីឡា បានរៀបចំពិធីសំណេះសំណាល និងសួរសុខទុក្ខក្រុម
រាជធានីភ្នំពេញ ៖ ក្រសួងអប់រំ យុវជន និងកីឡា បានរៀបចំពិធីសំណេះសំណាល និងសួរសុខទុក្ខក្រុមអត្តពលិកជម្រើសជាតិកម្ពុជា នៅពហុកីឡដ្ឋានជាតិមរតកតេជោ កាលពីល្ងាចថ្ងៃទី២២ ខែកុម្ភៈ ឆ្នាំ២០២៣ ដែលបង្ហាញពីការយកចិត្តទុកដាក់ និងលើកទឹកចិត្តដល់ក្រុមជម្រើសជាតិ ដើម្បីត្រៀមប្រជែងមេដាយក្នុងការប្រកួតកីឡាស៊ីហ្គេម-អាស៊ានប៉ារ៉ាហ្គេម នាខែឧសភា និងខែមិថុនា ឆ្នាំ២០២៣ នៅកម្ពុជា។
ឯកឧត្តម អ៊ុក សិទ្ធិជាតិ អគ្គនាយកកីឡាតំណាងដ៏ខ្ពង់ខ្ពស់ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានបង្ហាញការវាយតម្លៃខ្ពស់ចំពោះកិច្ចសហការរបស់ក្រសួងអប់រំ គណៈកម្មាធិការជាតិអូឡាំពិកកម្ពុជា និងសហព័ន្ធកីឡាជាតិ ដែលកំពុងយកចិត្តទុកដាក់ដល់ការបោះជំរំហ្វឹកហាត់របស់ក្រុមអត្តពលិកជម្រើសជាតិកម្ពុជាទាំងក្នុងស្រុក និងក្រៅស្រុក ដើម្បីត្រៀមឆ្ពោះទៅប្រកួតប្រជែងមេដាយស៊ីហ្គេម-អាស៊ានប៉ារ៉ាហ្គេម ឆ្នាំ២០២៣។
ក្នុងនាមក្រសួងអប់រំ យុវជន និងកីឡា ឯកឧត្តមអគ្គនាយក បានកោតសរសើរចំពោះការលះបង់ពុះពារការលំបាក យកអស់ស្មារតីខិតខំហ្វឹកហាត់ ក្នុងការបង្កើនគុណផលរបស់កីឡាករ កីឡាការិនី គ្រូបង្វឹក អនុរក្ស ដើម្បីត្រៀមប្រកួតដណ្តើមមេដាយជូនជាតិ ក្នុងព្រឹត្តិការណ៍កីឡាជាប្រវត្តិសាស្ត្រដំបូងរបស់កម្ពុជា ក្នុងពេលដ៏ខ្លីខាងមុខនេះ ។
ជាមួយគ្នានេះ ឯកឧត្តម អ៊ុក សិទ្ធិជាតិ ក៏បានថ្លែងអំណរគុណចំពោះថ្នាក់ដឹកនាំ គណៈកម្មាធិការជាតិ CAMSOC ដែលមានសម្តេចពិជ័យសេនា ទៀ បាញ់ ជាប្រធាន និងឯកឧត្តមបណ្ឌិត ថោង ខុន ជាអនុប្រធានអចិន្ត្រៃយ៍ ដែលតែងតែឧបត្ថម្ភគាំទ្រ និងផ្តល់ការលើកទឹកចិត្តគ្រប់បែបយ៉ាងដល់ការហ្វឹកហាត់របស់ក្រុមជម្រើសជាតិ ដើម្បីឆ្ពោះទៅសម្រេចភាពជោគជ័យក្នុងព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ក្រោយកម្ពុជារង់ចាំ៦៤ឆ្នាំ។
លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡាបានបញ្ជាក់ថា ការរៀបចំប្រមូលផ្តុំក្រុមកីឡាជម្រើសជាតិ ត្រៀមចូលរួមការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ដោយសារឆ្នាំ២០២១-២០២៣នេះ ក្រសួងបានច្របាច់បញ្ចូលគ្នារវាងក្រុមកីឡាថ្នាល និងក្រុមកីឡាជម្រើសជាតិឈានទៅសម្រិតសម្រាំងជ្រើសរើសកីឡាករជម្រើសជាតិសរុប៩៣៨នាក់
(កីឡាការិនី ៣៤៦នាក់) និងគ្រូបង្វឹក ១៧៦នាក់ ដែលមានគុណផលខ្ពស់ និងសីលធម៌ល្អ ព្រមទាំងអនុរក្សចំនួន៥២នាក់។
លោកបញ្ជាក់ថា ក្រុមជម្រើសជាតិ ត្រូវបានរៀបចំឱ្យមានការហាត់ហ្វឹកហ្វឺនក្នុងប្រទេសដូចជា នៅក្នុងពហុកីឡដ្ឋានជាតិមរតកតេជោ មាន៩ប្រភេទកីឡា ស្មើនឹង១៦២វិញ្ញាសា និងមានកីឡាករ កីឡាកាវិនីសរុប ១៦១ នាក់ គ្រូបង្វឹក ៣១នាក់ និងអនុរក្ស ០៨ នាក់ ចំណែកនៅក្នុងពហុកីឡដ្ឋានជាតិអូឡាំពិក មាន១៧ប្រភេទកីឡា ស្មើនឹង២៣០វិញ្ញាសា ហើយមានកីឡាករ កីឡាការិនីសរុប ៣០៩នាក់ គ្រូបង្វឹក ៦២នាក់ និងអនុរក្ស ១៧នាក់ ។ ចំពោះនៅតាមសហព័ន្ធកីឡាជាតិវិញ មាន១៤ប្រភេទកីឡា ស្មើនឹង១៨៦វិញ្ញាសា និងមានកីឡាករ កីឡាការិនីសរុប ២៨៣នាក់ គ្រូបង្វឹក ៦២នាក់ និងអនុរក្ស ១៤នាក់។
ដោយឡែក សម្រាប់ការហាត់ហ្វឹកហ្វឺននៅក្រៅប្រទេស មានកីឡាករ កីឡាការិនីសរុប ២២៦នាក់ ត្រូវបានបញ្ជូនឱ្យធ្វើការហាត់ហ្វឹកហ្វឺននៅក្រៅប្រទេសដូចជា នៅសាធារណរដ្ឋប្រជាមានិតចិន មាន១២ប្រភេទកីឡា ស្មើនឹង៧៨វិញ្ញាសា ដោយមានកីឡាករ កីឡាការិនីសរុប១៤១នាក់ និងគ្រូបង្វឹកចំនួន១៣នាក់ គឺហាត់ហ្វឹកហ្វឺនរយៈពេល០៤ខែ ។ រីឯនៅសហរដ្ឋអាមេរិក មាន៦ប្រភេទកីឡា ដូចជា ជីជីតស៊ូ តេក្វាន់ដូ WT បាល់បោះ ហែលទឹក វាយកូនបាល់ និងវាយកូនឃ្លីលើតុ មាន១៣វិញ្ញាសា កីឡាករ កីឡាការិនីសរុប ២៦នាក់ និងគ្រូបង្វឹក ០៤នាក់ ហាត់ហ្វឹកហ្វឺនរយៈពេល៤ខែ។
ចំពោះនៅប្រទេសបារាំងវិញ មាន២ប្រភេទ គឺកីឡាតេក្វាន់ដូ WT និងទ្រីយ៉ាត្លុង មាន០៣វិញ្ញាសា កីឡាករសរុប ០៣នាក់ ហាត់ហ្វឹកហ្វឺនរយៈពេល ០៤ខែ និងនៅបណ្តាប្រទេសអាស៊ី រួមមាន ប្រទេសវៀតណាម ប្រទេសថៃ មីយ៉ាន់ម៉ា ប្រទេសអ៊ូសបេគីស្ថាន ប្រទេសកាណាដា និងប្រទេសកូរ៉េខាងត្បូងជាដើម ដោយមាន៦៤វិញ្ញាសា កីឡាករកីឡាការិនីសរុប ៨៧នាក់ និងគ្រូបង្វឹក១៤នាក់ ហាត់ហ្វឹកហ្វឺនរយៈពេល០៤ខែ។
យ៉ាងណាមិញ សម្រាប់ការហាត់ហ្វឹកហ្វឺនក្រុមកីឡាជម្រើសជនពិការជាតិ សម្រាប់ចូលរួមប្រកួតកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ គឺក្រសួងអប់រំ យុវជន និងកីឡា បានសហការជាមួយគណៈកម្មាធិការជាតិប៉ារ៉ាឡាំពិកកម្ពុជា ក្នុងការជ្រើសរើសកីឡាករ កីឡាការិនីជនពិការ និងប្រមូលផ្តុំហាត់ហ្វឹកហ្វឺនរយៈពេល៥ខែ ចាប់ពីខែមករា រហូតដល់ខែឧសភា មានចំនួន ១៣ប្រភេទកីឡា ស្មើនឹង១០១វិញ្ញាសា និងមានកីឡាករកីឡាការិនីសរុប ១៦៥នាក់ គ្រូបង្វឹក ៣១នាក់ និងអនុរក្ស ១៦នាក់ ហើយត្រូវបានរៀបចំឱ្យហាត់ហ្វឹកហ្វឺននៅមជ្ឈមណ្ឌលជាតិជនពិការតេជោសែន ៕
ចែករំលែកព័តមាននេះ