រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានផ្តាំទៅកីឡាករ កីឡាការិនី ត្រូវគោរពវិន័យនៃការប្រកួត និងលក្ខន្តិកនៃការប្រកួត ជាពិសេសដាច់ខាតជៀសវាងប្រើសារជាតិលើកកម្លាំង ព្រោះវានឹងធ្វើឲ្យប៉ះពាល់ដល់កិត្តិយសជាតិធ្ងនធ្ងរ។
សម្តេចតេជោបានផ្តាំផ្ញើថា ៖ ខ្ញុំដូចមុនៗដែរ ផ្តាំផ្ញើសម្រាប់កីឡាករ កីឡាការិនីរបស់យើងដែលទៅប្រកួតអាស៊ានប៉ារ៉ាហ្គេម បំរាមធំបំផុត សុំផ្តាំផ្ញើ គឺហាមដាច់ខាតក្នុងការប្រើប្រាស់សារធាតុដែលមានជាតិលើកកម្លាំង ដែលផ្ទុយនឹងលក្ខន្តិកនៃការប្រកួតក្នុងក្របខណ្ឌកីឡា…។ រឿងនេះមិនត្រឹមតែខូចកិត្តិយសផ្ទាល់ខ្លួនទេ តែវាបានខូចដល់កិត្តិយសរបស់ប្រទេសជាតិ»។
សម្តេចបានថ្លែងបែបនេះ នៅព្រឹកថ្ងៃទី១៨ ខែសីហា ឆ្នាំ២០១៨ ពេលសម្តេចអញ្ជើញបំពាក់មេដាយ និងជូនរង្វាន់ដល់ក្រុមកីឡាជនពិការកម្ពុជាដែលបានទៅចូលរួមប្រកួតកីឡាប៉ារ៉ាឡាំពិក យុវជនជនពិការរដូវក្តៅនៅសាធារណរដ្ឋកូរ៉េ និងការសំណេះសំណាលជាមួយជាមួយប្រតិភូកីឡាប៉ារ៉ាឡាំពិកកម្ពុជា ទៅចូលរួលរួមប្រកួតកីឡាជនពិការអាស៊ាន លើកទី៩ នៅទីក្រុងកូឡាឡាំពួរ ប្រទេសម៉ាឡេស៊ី។
សម្តេចនាយករដ្ឋមន្ត្រីបានបន្តថា៖ «អញ្ចឹង សុំផ្តាំផ្ញើក្មួយៗ យកចិត្តទុកដាក់ទៅលើបញ្ហានេះ ប្រយ័ត្នគេធ្វើតេស្តទឹកនោម ឬតេស្តឈាម ឃើញសារជាតិបែបនោះ ទាំងសារធាតុគ្រឿងញៀន… និយាយរួមសារជាតិទាំងហ្នឹងមិនត្រូវប្រើទេ ទាំងទៅប្រកួត ឬមិនទៅប្រកួតទេ កុំប្រើឲ្យសោះតែម្តង ត្រូវជៀសវាងដាច់ខាតតែម្តង»។
សម្តេចក៏បានឧបត្តម្ភនូវប្រាក់ផ្ទាល់ខ្លួនចំនួន៣ម៉ឺនដុល្លារដល់កីឡាការ យ៉ាវ វណ្ណៈ យកទៅស្នងបំណុលធនាគារដែលខ្ចីសង់ផ្ទះជូនម្តាយដែលមានជំងឺ បូកពីលើប្រាក់រង្វាន់ពីក្រសួងអប់រំសរុបគឺទឹកប្រាក់ជាង៦ម៉ឺនដុល្លារ រួមទាំងការផ្តល់រង្វាន់ជាច្រើនដល់កីឡាករ កីឡាការិនី និងលោកគ្រូអ្នកគ្រូផងដែរ។
សូមបញ្ជាក់ថា នាថ្មីៗនេះ កីឡាករជនពិការកម្ពុជាចំនួន៣រូប បានទៅចូលរួមការប្រកួតក្នុងព្រឹត្តិការណ៍ជើងឯកយុវជនអាស៊ីនៅប្រទេសកូរ៉េ ក្នុងនោះមាន២នាក់ទទួលបានមេដាយមាស និងសំរិទ្ធ។ រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន បានជំរុញលើកកម្ពស់លើជនពិការ និងវិស័យកីឡាឱ្យមានការរីកចំរើនជាបន្តបន្ទាប់៕
ចែករំលែកព័តមាននេះ