ភ្នំពេញ៖ លោក ឃួ​ង ស្រេង សមាជិក​គណៈកម្មាធិកា​រ​កណ្តាល​គណបក្ស​ប្រជាជន​កម្ពុជា និងជាប្រធាន​គណៈកម្មាធិកា​រគណបក្សប្រជាជនកម្ពុជា ​រាជធានីភ្នំពេញ បានណែនាំអោយ​មន្ត្រីគណបក្សប្រជាជនកម្ពុជា សាងអំពើល្អ អោយបានគ្រប់ពេលវេលា ដើម្បីទាញយក​បេះដូងប្រជាពលរដ្ឋ អោយពួកគាត់មានទំនុកចិត្ត  អាណិត និងស្រលាញ់យើង រហូតឈានដល់​បោះឆ្នោតជូនគណបក្សប្រជាជនកម្ពុជាយើង បន្តដឹកនាំប្រទេសជាតិបន្តទៀត។  

ការលើកឡើងរបស់លោក ឃួង ស្រេង បែបនេះ បានឡើង​ក្នុងពិធីសំណេះសំណាល និងសួរសុខទុក្ខជាមួយសមាជិកគណបក្ស ក្រុមការងារគណបក្ស ចុះជួយមូលដ្ឋានខណ្​ឌពោធិ៍សែនជ័យ ចំនួន ៥៣២នាក់ នាល្ងាចថ្ងៃទី១៧ ខែកុម្ភៈ ឆ្នាំ២០២៣ នេះ នៅសាលមជ្ឈមណ្ឌលអាពាហ៍ពិពាហ៍លាភមង្គល ស្ថិតក្នុងភូមិប៉ប្រកខាងជើង សង្កាត់កាកាបទី១ ខណ្ឌពោធិ៍សែនជ័យ​។  

លោក ឃួង ស្រេង  បានមានប្រសាសន៍ថា​ ក្នុងនាម​មន្ត្រីរបស់គណបក្សប្រជាជនកម្ពុជា យើងត្រូវ​បំរើប្រជាពលរដ្ឋ អោយបានគ្រប់ពេលវេលា មិនមែនធ្វើឡើងតែពេលបោះឆ្នោតនោះទេ គឺត្រូវបំរើ​ពួកគាត់ ៥ឆ្នាំពេញ និងសូមអោយរក្សាអំពើល្អនេះ រហូតតទៅ ដើម្បីទាញយកបេះដូងពួកគាត់ អោយគោរព អាណិត ស្រលាញ់ និងជឿទុកចិត្ត មកលើមន្ត្រី គណបក្សប្រជាជនកម្ពុជារបស់​យើង។ ក្នុងនាមសមាជិកបក្សប្រជាជនកម្ពុជា សូមបងប្អូនជួយផ្សព្វផ្សាយពីការពិត​នូវស្នាដៃរបស់គណបក្សយើងអោយគេបានដឹង ដើម្បីវាយបក ចំពោះការឃោសនាភូត​កុហករបស់ពួកអគតិមួយចំនួន។  

លោក ឃួង ស្រេង បន្តទៀតថា គណបក្សប្រជាជនកម្ពុជាបានរំដោះអាយុជីវិតប្រជាពលរដ្ឋ​កម្ពុជាចំនួន ២លើករួចមកហើយ ក្នុងនោះទី១ គណបក្សប្រជាជនកម្ពុជា បានរំដោះអាយុជីវិត ប្រជាពលរដ្ឋ នៅទូទាំងប្រទេសចេញពីរបបប៉ុលពតនៅថ្ងៃទី០៧មករាឆ្នាំ១៩៧៩ និងទី២ បានរំដោះអាយុជីវិត ប្រជាពលរដ្ឋទូទាំងប្រទេស ចេញពីជំងឺកូវីដ-១៩ និងបានបើកឲ្យដំណើរការ​សេដ្ឋកិច្ចជាធម្មតាឡើងវិញ។   

លោក ឃួង ស្រេង បន្ថែមទៀតថា ប្រទេសជាតិមានសន្តិភាពពេញលេញ ទើបយើងគ្រប់គ្នា មានឱកាស ក្នុងការរកស៊ីទទួលទាន និងកសាងអភិវឌ្ឍន៍ប្រទេស អោយរីកចំរើនរុងរឿងបាន។ដូច្នេះត្រូវគ្នារក្សាសន្តិភាពនេះ អោយបានគង់វង់ និងសូមអោយសមាជិកម្នាក់ ក្លាយជាសន្លឹកឆ្នោត ១សន្លឹករបស់គណបក្សប្រជាជនកម្ពុជា នៅពេលបោះឆ្នោត ឆ្នាំ២០២៣ខាងមុខនេះ  ដើម្បីយើងមានឱកាសកសាងអភិវឌ្ឍន៍ប្រទេស អោយរីកចំរើនរុងរឿងបន្ថែមទៀត។   

បន្ថែមពីនេះ លោក ឃួង ស្រេង បានជំរុញអោយអាជ្ញាធរខណ្ឌ សង្កាត់ មន្ត្រី និងគ្រប់ភាគីពាក់ព័ន្ធ ត្រូវបើកយុទ្ធនាការតភ្ជាប់ Channel ផ្លូវការ ក្នុងបណ្តាញ Telegram សម្ដេចតេជោ ហ៊ុន សែន ឲ្យបានលឿន ពិសេសនៅតាមផ្ទះជួល​កម្មករកាត់ដេរ ជាដើម​៕