មនុស្សជាង២០នាក់មានអាការៈក្អួតចង្អោរ ចុកពោះ ក្រោយញ៉ាំអាហារក្នុងពិធីជួបជុំមួយ
- ព្រះសីហនុ
យ៉ាងហោចណាស់ ក៏មានប្រជាពលរដ្ឋចំនួន២៤នាក់ ត្រូវបានអះអាងថា មានអាការៈពុលចំណីអាហារ (បា.ញ់ហយ, ញាំ និង
ខេត្តព្រះសីហនុ ៖ បើតាមសេចក្តីរាយការណ៍បានឱ្យដឹងថា យ៉ាងហោចណាស់ ក៏មានប្រជាពលរដ្ឋចំនួន២៤នាក់ ត្រូវបានអះអាងថា មានអាការៈពុលចំណីអាហារ (បាញ់ហយ, ញាំ និងនំបញ្ចុក) ក្នុងពិធីជួបជុំមួយ ហើយត្រូវបានដឹកជនរងគ្រោះយកទៅសង្គ្រោះនៅមណ្ឌលសុខភាពតក្កវិទ ស្ថិតនៅភូមិក្រាំងអាត់ ឃុំកំពង់សីលា ស្រុកកំពង់សីលា ខេត្តព្រះសីហនុ កាលពីនៅថ្ងៃទី១៥ ខែកុម្ភៈ ឆ្នាំ២០២៣នេះ។
ហើយបងប្អូនទាំងអស់ដែលសម្រាកព្យាបាលនៅមណ្ឌលសុខភាពតក្កវិទ ស្ថិតនៅ ភូមិក្រាំងអាត់ ឃុំកំពង់សីលា ស្រុកកំពង់សីលា ខេត្តព្រះសីហនុ មានចំនួន១៨នាក់ ចំណែកបងប្អូនម្នាក់សម្រាកព្យាបាលនៅពេទ្យផ្សេងទៀត និង០៥នាក់ទៀតមានសភាពស្រាល សម្រាកព្យាបាលនៅផ្ទះ ដូច្នេះសរុបជនរងគ្រោះទាំងអស់គឺ២៤នាក់។
ជុំវិញករណីពុលចំណីអាហារនេះផងដែរ បើយោងតាមប្រភពមួយចំនួនពីមន្ត្រីមូលដ្ឋានបានឱ្យដឹងថា បងប្អូនប្រជាពលរដ្ឋដែលមានអាការៈក្អួតចង្អោរ ចុកពោះ ងើបមិនកើត ទាំង២៤នាក់ខាងលើនេះ គឺបានចូលរួមក្នុងពិធីជួបជុំមួយតាំងពីយប់ថ្ងៃទី១៣ ខែកុម្ភៈមកម្ល៉េះ។ ប៉ុន្តែនៅថ្ងៃបន្ទាប់ គឺថ្ងៃទី១៤ ខែកុម្ភៈ បងប្អូនប្រជាពលរដ្ឋទាំងនោះពុំទាន់មានអាការៈធ្ងន់ធ្ងរអ្វីនោះទេ គ្រាន់តែមានស្ថានភាពចុកឆ្អល់ និងក្អួតខ្លះៗតែប៉ុណ្ណោះ។
ប្រភពដដែលបន្តថា លុះរហូតឈានដល់ល្ងាចថ្ងៃទី១៥ ខែកុម្ភៈ ស្ថានភាពបងប្អូនកាន់តែដុនដាបទៅដុនដាបទៅ រហូតមានចំនួនកើនដល់ ២៤នាក់ក្នុងនោះមានស្ថានភាពធ្ងន់ប្រមាណ៥ទៅ៦នាក់ ទើបធ្វើឲ្យមានការភ្ញាក់ផ្អើលដល់អាជ្ញាធរដែនដី និងបានបញ្ជូនជនរងគ្រោះដែលមានស្ថានធ្ងន់ធ្ងរ មកកាន់មន្ទីរពេទ្យបង្អែកចំការចេកខេត្តព្រះសីហនុតែម្តង។
បច្ចុប្បន្នពួកគាត់ទាំង២៤នាក់ មានសភាពធូរស្រាលហើយ ដោយអ្នកខ្លះក៏បានចេញទៅមន្ទីរពេទ្យ ត្រឡប់ទៅកាន់លំនៅឋានវិញហើយ។
គួរបញ្ជាក់ថា ក្រោយពីទទួលបានព័ត៌មានថា មានករណីប្រជាពលរដ្ឋចំនួន២៤នាក់ពុលចំណីអាហារភ្លាម ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ នារសៀលថ្ងៃទី១៥ ខែកុម្ភៈ ឆ្នាំ២០២៣ បានអញ្ជើញចុះសាកសួរសុខទុក្ខ និងនាំយកថវិការបស់សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ឧបត្ថម្ភដល់បងប្អូនប្រជាពលរដ្ឋចំនួន២៤នាក់ ដោយក្នុងនោះម្នាក់ៗទទួលបានថវិកា១០ម៉ឺនរៀល និងជួយឧបត្ថម្ភមណ្ឌលសុខភាពតក្កវិទ ចំនួន១លានរៀលផងដែរ។
ចែករំលែកព័តមាននេះ