រាជធានីភ្នំពេញ ៖ នៅក្នុងកាលៈទេសៈដែលស្ថានភាពសេដ្ឋកិច្ចពិភពលោក និងកម្ពុជានៅក្នុងភាពមិនច្បាស់លាស់ដូចពេលបច្ចុប្បន្ន ការទិញមាសទុកអាចមានស្ថានភាពប្រសើរជាងការទិញអចលនៈទ្រព្យ ប្រសិនបើត្រូវការដោះដូរឆាប់ៗ និងទូទាត់ទាន់ចិត្ត។ មកដល់ឆ្នាំ២០២៣នេះ ស្ថានភាពអចលនទ្រព្យនៅលើពិភពលោក ជាពិសេសនៅក្នុងប្រទេសផ្ទាល់តែម្តង…
រាជធានីភ្នំពេញ ៖ នៅក្នុងកាលៈទេសៈដែលស្ថានភាពសេដ្ឋកិច្ចពិភពលោក និងកម្ពុជានៅក្នុងភាពមិនច្បាស់លាស់ដូចពេលបច្ចុប្បន្ន ការទិញមាសទុកអាចមានស្ថានភាពប្រសើរជាងការទិញអចលនៈទ្រព្យ ប្រសិនបើត្រូវការដោះដូរឆាប់ៗ និងទូទាត់ទាន់ចិត្ត។
មកដល់ឆ្នាំ២០២៣នេះ ស្ថានភាពអចលនទ្រព្យនៅលើពិភពលោក ជាពិសេសនៅក្នុងប្រទេសផ្ទាល់តែម្តង គឺមានសភាពស្ងប់ស្ងាត់ខុសពីធម្មតាខណៈដែលតម្លៃហាក់មិនប្រែប្រួលមិនចុះមិនឡើង តែលក់មិនចេញដោយសារតែមិនសូវមានអ្នកទិញ ប៉ុន្តែបើកុនលុយខ្លាំង គឺមានតែលក់បញ្ចុះតម្លៃខ្លាំង ពោល គឺសឹងតែដូចការប្រកាសលក់ឡៃឡុងទៅហើយ។
សម្រាប់រយៈពេលខ្លីនៅឆ្នាំ២០២៣ នេះការវិនិយោគលើអចលនៈទ្រព្យ គឺកំពុងស្ថិត នៅក្នុងស្ថានភាពពិបាកមែនទែននៅក្នុងការទិញលក់ដែលខុសពីហាងឆេងមាស ដែលកំពុងតែឡើងស្រឺតៗខណៈដែលក្រុមអ្នកវិភាគនៅលើទីផ្សារអន្តរជាតិបានអះអាងថា ហាងឆេងមាសកំពុងតែឡើង ខណៈសេដ្ឋកិច្ចសាកលមានស្ថានភាពមិននឹងនរហើយធនាគារ កណ្តាលនៅប្រទេសជាច្រើនបានសម្រុកទិញចូលជាទុនបម្រុងជាបន្តបន្ទាប់។
នៅកម្ពុជាហាងឆេងមាស គឺកំពុងប្រសើរ ស្របតាមការព្យាករណ៍របស់ពិភពលោក ហើយកម្រិតនៃការប្រែប្រួលតម្លៃនៅក្នុងស្ថានភាពមួយតិចតួច ប៉ុន្តែអ្វីដែលសំខាន់គឺថា ងាយលក់ និងងាយជួញដូ ដែលខុសពីអចលនទ្រព្យដែលទាមទារពេលវេលាយូរ អំណត់ ហើយអាចនឹងកប់ដើមចោលរាប់ឆ្នាំ។
ជាការពិតនៅក្នុងការវិនិយោគរយៈពេលយូរ គឺអាចទិញអចលនៈទ្រព្យ ប៉ុន្តែវាទាមទារការអំណត់ និងតស៊ូនឹងការកប់ដើមរាប់ឆ្នាំក៏មាន ប៉ុន្តែនៅក្នុងការទិញដូរមាសដំណើរការនៃការទិញលក់ គឺនៅក្នុងកម្រិតត្រឹមនាទីតែប៉ុណ្ណោះ ហើយវាមានហាងឆេងកំណត់ច្បាស់លាស់តែម្តង។
កាលពីដើមឆ្នាំពោល គឺនៅថ្ងៃទី០១ ខែមករា ឆ្នាំ២០២៣ ហាងឆេងមាស មាសគីឡូគឺ២.២១០ដុល្លារ ផ្លាទីនទឹក៧៥ គឺ១.៦៦០ ដុល្លារ ហើយសម្រាប់ផ្លាទីនទឹក៧០ គឺ១.៥៥០ នៅក្នុងមួយតម្លឹង ដោយតម្លៃនេះ គឺជាតម្លៃលក់ចេញ តែតម្លៃទិញចូលវិញមាសគីឡូមួយតម្លឹង២.១១០ ដុល្លារ ផ្លាទីនទឹក៧៥ តម្លៃ១.៥៦០ ដុល្លារ និងផ្លាទីនទឹក៧០ គឺ១.៤៥០ ដុល្លារ នៅក្នុងមួយតម្លឹង។
មកដល់ថ្ងៃទី០៣ ខែ កុម្ភៈ ឆ្នាំ២០២៣ តម្លៃលក់ចេញនៃមាសគីឡូឡើងដល់ ២.៣២០ដុល្លារ ផ្លាទីនទឹក៧៥ ឡើងដល់១.៧៤០ដុល្លារ ផ្លាទីនទឹក៧០ ឡើងដល់ ១.៦៣០ដុល្លារ រីឯតម្លៃលក់ចេញវិញគឺ មាសគីឡូ គឺ២.២២០ដុល្លារ ផ្លាទីនទឹក៧៥គឺ១.៦៤០ដុល្លារ និងផ្លាទីនទឹក៧០ គឺ ១.៥៣០ ដុល្លារនៅក្នុងមួយតម្លឹង ។
មកដល់ថ្ងៃទី១៤ ខែកុម្ភៈ ឆ្នាំ២០២៣ ហាងឆេងមាសធ្លាក់ចុះបន្តិច ដោយមាស គីឡូតម្លៃលក់ចេញចុះមកនៅត្រឹម២.២៦០ ដុល្លារ ផ្លាទីនទឹក៧៥ តម្លៃ ១.៦៩០ ដុល្លារ ហើយផ្លាទីនទឹក៧០គឺ១.៥៨០ ដុល្លារនៅក្នុងមួយតម្លឹង ខណៈដែលតម្លៃទិញចូលវិញគឺ២.១៦០ ដុល្លារ ផ្លាទីនទឹក ៧៥ គឺ ១.៥៩០ ដុល្លារ និងផ្លាទីនទឹក៧០គឺ ១.៤៨០ដុល្លារ នៅក្នុងមួយតម្លឹង ។នេះ គឺជាការសង្កេតនៅលើទីផ្សារមាសនៅក្នុងប្រទេសកម្ពុជា សម្រាប់ទីផ្សារពិភពលោកនៅក្នុងឆ្នាំ២០២៣នេះ ត្រូវបានអ្នកជំនាញអះអាងថា វានឹងបន្តឡើងចុះនិងប្រែប្រួលរហូតដល់តម្លៃលើសពី៣.០០០ ដុល្លារទៅទៀតសម្រាប់ឆ្នាំនេះ ខណៈដែលប្រទេសនានាដូចជា ចិន ឥណ្ឌា និងជប៉ុនជាដើមបានប្រមូលទិញមាសស្តុកចូល។
តាមសេចក្តីរាយការណ៍ព័ត៌មានរបស់បណ្តាញព័ត៌មានស៊ីអេនប៊ីស៊ី (CNBC)បានឲ្យដឹងថា ហាងឆេងមាសនឹងកើនឡើងខ្ពស់ក្នុងរយៈពេលប្រាំមួយខែដំបូងឆ្នាំ២០២៣ ហើយអាចបន្ត ឡើងថែមទៀតដោយសារតែអស្ថេភាពនៃសង្គ្រាមរវាងរុស្ស៊ី និងអ៊ុយក្រែន ក៏ដូចជាបញ្ហាទណ្ឌកម្ម ។ប្រភពដដែលបានបន្តថា នៅមុនដំណាច់ឆ្នាំ២០២៣ ប្រមាណជា១ត្រីមាសតម្លៃមាសនៅលើទីផ្សារអន្តរជាតិ គឺមានតម្លៃប្រមាណជា២.៤៥០ដុល្លារនៅក្នុងមួយតម្លឹង ប៉ុន្តែនៅពេលដំណាច់ឆ្នាំ គឺឡើង២.៤៦៦ដុល្លារនៅក្នុងមួយតម្លឹង។
ទោះបីជាតម្លៃមាសបានធ្លាក់ចុះ ជាទូទៅចាប់តាំងនៅអំឡុងខែវិច្ឆិកា ឆ្នាំមុន ប៉ុន្តែដោយសារភាពចលាចលទីផ្សារការកើនឡើងការរំពឹងទុកនៃការធ្លាក់ចុះសេដ្ឋកិច្ច និងការទិញមាសកាន់តែច្រើនពីធនាគារកណ្តាលនាំឲ្យតម្លៃវាមានហាងឆេងខ្ពស់ឡើងវិញ។
លោក អោល ហានសេន ( Ole Hansen) ប្រធានយុទ្ធសាស្ត្រទំនិញនៅធនាគារ Saxo Bank ដែលជាធនាគារមួយនៅហូឡង់បាននិយាយ សេចក្តីព្រួយបារម្ភអំពីវិបត្តិសេដ្ឋកិច្ចសាកលដោយសារតែការធ្លាក់ចុះនៃសេដ្ឋកិច្ចនៅអាមេរិក និងចិនបូករួមនឹងហានិភ័យនៃភាពមិនច្បាស់លាស់នៃតម្លៃទីផ្សារភាគហ៊ុន ការរំពឹងទុកនៃអស្ថេរភាពនៃប្រាក់ដុល្លារ ហើយកម្រិតអតិផរណាមិនអាចទាញមកនៅត្រឹម៣% ដូចដែលគេរំពឹងទុក គឺសុទ្ធសឹងតែជាបញ្ហាដែលរុញច្រានឲ្យហាងឆេងមាសឡើងថ្លៃ ។លោកបានអះអាងថា បញ្ហានេះបានធ្វើឲ្យហាងឆេងមាសនឹងចាប់ផ្តើមឡើងជាបន្តបន្ទាប់ចាប់តាំងពី២.៤៥០ដុល្លារនៅក្នុងមួយតម្លឹង កាលពីឆ្នាំ២០២២ ទៅ២.៤៦០ ដុល្លារទៅ២.៥០០ ដុល្លារនឹងអាចឡើងជាបន្តបន្ទាប់ទៀត។
លោក អេរិន ស្ត្រេន ( Eric Strand )អ្នកគ្រប់គ្រងក្រុមហ៊ុនរ៉ែមាស AuAg ESG Gold Mining ETF បាននិយាយថា ការជំរុញយ៉ាងពេញទំហឹងដោយធនាគារកណ្តាលនានានៅឆ្នាំនេះ ទំនងជាមានផលប៉ះពាល់យ៉ាងសំខាន់សម្រាប់ តម្លៃហាងឆេង មាសសាកល។
លោកបានអះអាងកាលពីខែមុនថា ហាងឆេងមាសនៅឆ្នាំ២០២៣នឹងឡើងខ្ពស់លើសពី២.៧៩០ដុល្លារនៅក្នុងមួយតម្លឹង ដោយសារធនាគារកណ្តាលនៅប្រទេសជាច្រើនបានបន្តប្រមូលមាសដើម្បីបន្ថែមទុនបម្រុងរបស់ពួកគេជាមួយនឹងកំណត់ត្រាថ្មីមួយដែលបានកំណត់សម្រាប់តួរលេខប្រចាំឆ្នាំ។ពាក់ព័ន្ធនឹងវិស័យសំណង់ និងអចលនៈទ្រព្យវិញមិនថា តែនៅកម្ពុជានោះទេ នៅលើពិភពលោក គឺកំពុងតែស្ថិតនៅក្នុងស្ថានភាពមិនប្រាកដប្រជា ។
ថ្មីៗនេះ លោក រង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ចនិងហិរញ្ញវត្ថុ បានអះអាងថា នៅកម្ពុជានាឆ្នាំ២០២៣ វិស័យនេះអាចមានកំណើនតែយឺតណាស់ ទោះបីជាវិស័យនេះជាចន្ទុលសេដ្ឋកិច្ចមួយក៏ដោយ ។លោកបានអះអាងថា ហានិភ័យនៃការខ្វះឥណទាន ឬវិបត្តិឥណទាននៅក្នុងវិស័យនេះ គឺជាប្រភពសំខាន់ ដូច្នេះស្ថានភាពនៃវិស័យនេះ ដែលបានយ៉ាប់យឺនតាំងពីឆ្នាំ២០២២ ដល់ឆ្នាំ២០២៣នឹងបន្តតឹងតែងទៀត ហើយការងើបឡើងនៅលើវិស័យនេះ គឺអាចអូសបន្លាយ ប្រសិនបើបរិយាកាសខាងក្រៅនៅតែ មានបញ្ហា ។
សរុបមកវិញប្រសិនបើចង់ងាយស្រួលទិញលក់មាស គឺប្រសើរជាអចលនទ្រព្យ ពីព្រោះទីផ្សារមាសនៅតែសំខាន់ ខណៈដែលសំណង់និងអចលនទ្រព្យ វាអាចចំណេញធំ តែវាក៏អាចនឹងកប់ដើមរយៈពេលយូរបន្ថែមទៀត ហើយបើត្រូវការបន្ទាន់គឺមានតែប្រឈមមុខនឹងការខាតបង់ធំរាប់ម៉ឺនដុល្លារក៏មានផងដែរ៕ដោយៈ ហេង ចេស្តារ
ចែករំលែកព័តមាននេះ