រាជធានីភ្នំពេញ ៖ ដើម្បីសម្រួលដល់អតិថិជនរបស់ខ្លួន គ្រឹះស្ថានមីក្រូហិរញ្ញវត្ថុក្រេឌីត ភីអិលស៊ី បានចុះហត្ថលេខាក្នុងកិច្ចសហការជាមួយក្រុមហ៊ុនទ្រូម៉ាន់នី អនុញ្ញាតឱ្យអតិថិជនដែលប្រើប្រាស់
រាជធានីភ្នំពេញ ៖ ដើម្បីសម្រួលដល់អតិថិជនរបស់ខ្លួន គ្រឹះស្ថានមីក្រូហិរញ្ញវត្ថុក្រេឌីត ភីអិលស៊ី បានចុះហត្ថលេខាក្នុងកិច្ចសហការជាមួយក្រុមហ៊ុនទ្រូម៉ាន់នី អនុញ្ញាតឱ្យអតិថិជនដែលប្រើប្រាស់កម្ចីរបស់ក្រេឌីត អាចបង់ប្រាក់ត្រឡប់មកគ្រឹះស្ថាន តាមរយៈភ្នាក់ងារទ្រូម៉ាន់នី ដោយមិនចាំបាច់ធ្វើដំណើរមកកាន់ការិយាល័យក្រឌីតឡើយ ។
នៅក្នុងពិធីចុះហត្ថលេខារវាងក្រុមហ៊ុនទាំងពីរ កាលពីថ្ងៃទី៨ ខែសីហា ឆ្នាំ២០១៧ នៅការិយាល័យកណ្ដាលរបស់គ្រឹះស្ថានមីក្រូហិរញ្ញវត្ថុក្រឌីត លោក ចាន់ ម៉ាច ប្រធាននាយកប្រតិបត្តិគ្រឹះស្ថានមីក្រូហិរញ្ញវត្ថុក្រេឌីត ភីអិលស៊ី មានប្រសាសន៍ថា បើទោះជាសព្វថ្ងៃ ក្រេឌីត មានការិយាល័យនៅស្ទើរគ្រប់កន្លែងទូទាំងប្រទេស តែក្រេឌីតនៅតែស្វែងរកនូវជម្រើសសេវាកម្មផ្សេងៗនិងថ្មីៗសម្រាប់អតិថិជនរបស់ខ្លួន ។ ធ្វើដូចនេះ អតិថិជនអាចជ្រើសរើសនូវជម្រើសណាមួយដែលស័ក្តិសមសម្រាប់ពួកគាត់ងាយស្រួល និងសន្សំសំចៃ ។ តាមរយៈភ្នាក់ងារទ្រូម៉ាន់នីនៅទូទាំងប្រទេស ដែលមានប្រមាណ៥.០០០កន្លែង អតិថិជនរបស់គ្រឹះស្ថានមីក្រូហិរញ្ញវត្ថុក្រេឌីត នឹងអាចសន្សំពេលវេលាបានច្រើន ។
លោក គង់ មាន នាយកគ្រប់គ្រងទូទៅក្រុមហ៊ុនទ្រូម៉ាន់នី មានប្រសាសន៍ថា ការសហការនេះពិតជាបានផ្តល់ប្រយោជន៍យ៉ាងច្រើនសម្រាប់អតិថិជន ដោយគាត់ពុំចាំបាច់ចំណាយពេលវេលាយូរក្នុងការធ្វើដំណើរទៅកាន់គ្រឹះស្ថានមីក្រូហិរញ្ញវត្ថុក្រេឌីត ភីអិលស៊ី ដោយផ្ទាល់នោះទេ ខណៈដែលអតិថិជនមួយចំនួនស្នាក់នៅឆ្ងាយពីសាខារបស់គ្រឹះស្ថាន ឬមិនមានពេលវេលាគ្រប់គ្រាន់ ។ មួយវិញទៀត អតិថិជនអាចបង់ប្រាក់សងបានទាន់ពេលកំណត់ ដោយមិនអស់ថ្លៃពិន័យ ពីព្រោះទ្រូម៉ាន់នីបានផ្តល់ភាពងាយស្រួល និងជួយកាត់បន្ថយចំណាយរបស់អតិថិជនបានច្រើន តាមរយៈការផ្តល់ថ្លៃសេវាកម្មសមរម្យ និងភ្នាក់ងារជាច្រើនទីតាំង ។ មិនតែប៉ុណ្ណោះ ក្រុមហ៊ុននឹងពង្រីកវិសាលភាពឲ្យធំធេងជាងមុន រួមទាំងបន្តពង្រឹងនិងបន្ថែមសេវាកម្មថ្មីៗឲ្យរឹតតែប្រសើរឡើងផងដែរ ។ ជាក់ស្តែងនៅពេលឆាប់ៗខាងមុខនេះ ទ្រូម៉ាន់នី នឹងមានសេវាកម្ម E-Wallet ដែលអតិថិជនអាចប្រើសេវាកម្មទ្រូម៉ាន់នីទាំងអស់បានតាមរយៈគណនី ជាមួយនឹងកម្មវិធី Mobile App ដោយពុំចាំបាច់មានកាត និងសេវាកម្ម Payment Solution ដែលអតិថិជនអាចទូទាត់ចំណាយតាមហាងផ្សេងៗបានតាមរយៈគណនីទ្រូម៉ាន់នី។
ចែករំលែកព័តមាននេះ