អ្នកលក់ដូរកញ្ច្រែងថា លក់ក្នុងផ្សារមិនដាច់ ខណៈអាជ្ញាធរចោទថាកំពុងបង្កបញ្ហាឱ្យឈឺក្បាល
- កំពង់ស្ពឺ
ខេត្តកំពង់ស្ពឺ៖ ក្រុមអាជីវករលក់ដូរនៅខាងក្នុងផ្សារកំពង់ស្ពឺ នៅតែបន្តលក់នៅលើដងផ្លូវខាងក្រៅ
ខេត្តកំពង់ស្ពឺ៖ ក្រុមអាជីវករលក់ដូរនៅខាងក្នុងផ្សារកំពង់ស្ពឺ នៅតែបន្តលក់នៅលើដងផ្លូវខាងក្រៅ នៃបរិវេណផ្សារដដែល ខណៈអាជ្ញាធរខេត្ត-ក្រុង មិនមានដំណោះស្រាយចំពោះពួកគាត់។ ពួកគាត់បានអះអាងថា ការលក់នៅខាងក្នុងផ្សារ លក់មិនដាច់ទេ ព្រោះគ្មានអ្នកចូលទៅទិញ ដោយសារតែអាជ្ញាធរក្រុង បង្កើតឱ្យមានផ្សារអាណាធិបតេយ្យមួយនៅខាងក្រៅគឺ ផ្សារដើមលាភ ឬហៅផ្សារកញ្ច្រែង។
ក្រុមអាជីវករក្នុងផ្សារបានលើកឡើងថា ក្រុមអ្នកលក់នៅផ្សារដើមលាភ ហៅផ្សារកញ្ច្រែងនេះ កន្លងមកអាជ្ញាធរបានរៀបចំឱ្យទៅលក់នៅផ្សារឈួន គឹមសាន រួចទៅហើយ ដោយរក្សាទុករង្វង់សួនដើមលាភជាកន្លែងដាក់ម៉ូតូ រថយន្ត មិនបង្កការកកស្ទះដល់អ្នកធ្វើចរាចរណ៍ទេ។ តែដោយភាពកំសោយក្នុងការដឹកនាំ និងលាភសក្ការៈ រង្វង់មូលដើមលាភបានក្លាយទៅជាផ្សារអាណាធិបតេយ្យម្តងទៀត ដែលក្រុមរៀបចំសណ្តាប់ធ្នាប់បានវាស់ និងរៀបឱ្យអ្នកលក់ទាំងនោះលក់លើផ្លូវបង្កការកកស្ទះ គ្មានសណ្តាប់ធ្នាប់ គ្មានសេចក្តីថ្លៃថ្នូរ ទោះមានការរិះគន់ពីពលរដ្ឋយ៉ាងណា ក៏មិនខ្វល់ដែរ។
ក្រុមអាជីវករក៏បានបោះជាពាក្យសម្តីតបវិញថា អាជ្ញាធរក្រុងអាចរៀបឱ្យអ្នកលក់ផ្សារដើមលាភលក់នៅលើដងផ្លូវបាន ដូច្នេះពួកគាត់ក៏អាចលក់លើដងផ្លូវបានដូចគ្នាដែរ។ បើចង់ឱ្យពួកគាត់ឈប់លក់លើដងផ្លូវលុះត្រាណាអាជ្ញាធររំលាយផ្សារដើមលាភនោះចេញ ទើបពួកគាត់វិលចូលទៅលក់ក្នុងផ្សារវិញ។
ពាក់ព័ន្ធនឹងការលើករបស់ក្រុមអាជីវករដែលលក់ក្នុងផ្សារកំពង់ស្ពឺ លោកវុី សំណាង អភិបាលខេត្តកំពង់ស្ពឺ បានឱ្យដឹងកាលពីថ្ងៃទី១៤ ខែកុម្ភៈ ឆ្នាំ២០២៣ ថា គណៈបញ្ជាការឯកភាពខេត្ត នឹងប្រើប្រាស់កម្លាំងសរុប មធ្យោបាយសរុប ដើម្បីរារាំង និងបញ្ឈប់ក្រុមអាជីវករផ្សារដើមលាភមិនឱ្យលក់នៅទីតាំងរង្វង់មូលដើមលាភបន្តទៀតទេ ហើយវិធានការនេះនឹងចាប់ផ្តើមអនុវត្តពីម៉ោង៤ទៀបភ្លឺថ្ងៃទី១៥ ខែកុម្ភៈ ឆ្នាំ២០២៣នេះហើយ។
ទន្ទឹមនោះ អភិបាលខេត្តកំពង់ស្ពឺ ក៏បានអំពាវនាវឱ្យអ្នកលក់នៅរង្វង់មូលដើមលាភវិលទៅលក់នៅផ្សារឈួន គឹមសានវិញ ដើម្បីទុករង្វង់ដើលលាភជាកន្លែងរថយន្ត ដាក់ម៉ូតូ ដូចដើមវិញ ពិសេសកាត់បន្ថយការកកស្ទះ និងសេចក្តីថ្លៃថ្នូររបស់ខេត្តកំពង់ស្ពឺ៕
ចែករំលែកព័តមាននេះ