រញ្ជួយដីនៅតួកគីនិងស៊ីរី អ្នកស្លា.ប់ឡើងដល់លើស២៨.០០០នាក់
ប្រទេសតួកគី-ស៊ីរី ៖ តុល្យការនៃការរញ្ជួយដីដ៏ខ្លាំងកម្លាំង៧,៨រីស្ទ័រ នៅតូកគីនិងស៊ីរីមកដល់ថ្ងៃទី១២
ប្រទេសតួកគី-ស៊ីរី ៖ តុល្យការនៃការរញ្ជួយដីដ៏ខ្លាំងកម្លាំង៧,៨រីស្ទ័រ នៅតូកគីនិងស៊ីរីមកដល់ថ្ងៃទី១២កុម្ភៈ គិតត្រឹមម៉ោង៣រសៀលម៉ោងនៅកម្ពុជា ចំនួនអ្នកស្លា.ប់ឡើងដល់២៨.១៩១នាក់ក្នុងប្រទេសទាំង២ ដោយប្រមុខទីភ្នាក់ងារមនុស្សធម៌ អ.ស.ប លោកMARTIN GRIFFITHSថ្លែងថា ចំនួននោះអាចកើនឡើងដល់ទ្វេដង។ នៅតួកគីចំនួនអ្នកស្លា.ប់កើនដល់២៤.៦១៧នាក់ និងនៅស៊ីរីអ្នកស្លា.ប់មាន៣.៥៧៤នាក់។
លោកMARTIN GRIFFITHS កាលពីថ្ងៃទី១១កុម្ភៈបានទៅកាន់ទីក្រុងKAHRAMANMARASតួកគី ចំណុចកណ្ដាលនៃការរញ្ជួយដីកាលពីថ្ងៃទី៦កុម្ភៈនោះ។ នៅក្នុងទីក្រុងនេះលោកថ្លែងទៅកាន់កាសែតSKY NEWSថា ខ្ញុំយល់ថា គេលំបាកក្នុងការវាយតម្លៃលើតុល្យការឲ្យបានច្បាស់ ព្រោះយើងត្រូវគាស់កាយរកជនរងគ្រោះក្រោមគំនរបាក់បែកដ៏ច្រើនសម្បើម តែខ្ញុំប្រាកដថាចំនួនអ្នកស្លា.ប់អាចមានទ្វេដងនៃចំនួនបច្ចុប្បន្នឬលើសពីនេះទៀត។
អ្នកជួយសង្គ្រោះច្រើនសិបពាន់នាក់កំពុងបន្តកាយរុករកក្រោមគំនរបាក់បែក ក្នុងធាតុអាកាសដ៏ត្រជាក់បន្ថែមលើចំនួនមនុស្សរងការប៉ះពាល់ច្រើនលាននាក់ ដែលបាត់បង់ទីជម្រកនិងកំពុងជួបប្រទះភាពអត់ឃ្លាន។ អ.ស.ប បានព្រមានថាមនុស្សយ៉ាងតិច៨៧០.០០០នាក់ ត្រូវការអាហារក្ដៅៗនៅតួកគីនិងស៊ីរី រួចមនុស្សដល់ទៅ៥,៣លាននាក់ បច្ចុប្បន្នកំពុងគ្មានជម្រកគ្រាន់តែនៅស៊ីរី។
អង្គការសុខភាពពិភពលោកWHO លើកឡើងកាលពីថ្ងៃទី១១កុម្ភៈថា មនុស្សជិត២៦លាននាក់ រងការប៉ះពាល់ដោយការរញ្ជួយដីនេះ។ អង្គការនោះអំពាវនាវរកជំនួយ៤២,៨លានដុល្លារ សម្រាប់ផ្គត់ផ្កង់ដល់សេចក្ដីត្រូវការបន្ទាន់ខាងសុខាភិបាល។ ចំណែកទីភ្នាក់ងារគ្រប់គ្រងគ្រោះមហន្តរាយតួកគីគូសបញ្ជាក់ថា សមាជិកបណ្ដាអង្គការតួកគីដល់ទៅជាង៣២.០០០នាក់ចូលរួមក្នុងការរុករកបន្ថែមលើអ្នកជួយសង្គ្រោះមកពីប្រទេសផ្សេងៗ ៨២៩៤នាក់៕
ចែករំលែកព័តមាននេះ