រាជធានីភ្នំពេញ ៖ នៅថ្ងៃអាទិត្យទី៦ សីហា ចុងសប្ដាហ៍នេះ កម្មវិធីប្រកួតប្រដាល់នៅលើសង្វៀនទូរទស្សន៍ភីអិនអិន ប្រជុំដោយកីឡាករជើងខ្លាំងជាច្រើនគូក្នុងនោះក៏មានការប្រកួតលក្ខណៈ
រាជធានីភ្នំពេញ ៖ នៅថ្ងៃអាទិត្យទី៦ សីហា ចុងសប្ដាហ៍នេះ កម្មវិធីប្រកួតប្រដាល់នៅលើសង្វៀនទូរទស្សន៍ភីអិនអិន ប្រជុំដោយកីឡាករជើងខ្លាំងជាច្រើនគូក្នុងនោះក៏មានការប្រកួតលក្ខណៈអន្តរជាតិរវាងកីឡាករកម្ពុជានិងកីឡាករថៃផងដែរ ។ អ្នកនិយមទស្សនាកីឡាប្រដាល់ភាគច្រើនកំពុងតែទន្ទឹងរង់ចាំមើល ថាតើកីឡាករកម្ពុជាអាចសម្រេចគោលដៅរបស់ខ្លួនឬយ៉ាងណាក្នុងពេលកីឡាថៃត្រូវគេដឹងថា មានសមត្ថភាពខ្លាំងមិនធម្មតាបែបហ្នឹងនោះ។
គូអន្តរជាតិទី១ កីឡាករ ឡុង សុភី មកពីក្លិបសាលវ័ន្តកីឡា ត្រូវជួបប្រកួតជាមួយកីឡាករថៃឈ្មោះ ឡ លេក ក្នុងប្រភេទទម្ងន់៦៩គីឡូក្រាម ។ កីឡាករថៃរូបនេះទោះបីមិនធ្លាប់មកប្រកួតនៅលើសង្វៀនភីអិនអិនពីមុនមកមែន ប៉ុន្តែបើតាមការអះអាងពីអ្នករៀបចំការប្រកួតថា គេជាអ្នកប្រដាល់ជើងខ្លាំងលំដាប់ជួរមុខមួយរូបនៅក្នុងប្រទេសថៃ ។ ចំណែក ឡុង សុភី ពីមុនជាអ្នកប្រដាល់ល្បីល្បាញខាងប្រើស្នៀតកែងនិងជង្គង់នោះ មួយរយៈមកនេះហាក់បីដូចជាធ្លាក់កូដយ៉ាងខ្លាំងដោយប្រកួតចាញ់ច្រើនជាងឈ្នះ ។ ដូច្នេះសម្រាប់ការលើកនេះ បើសិនជាកីឡាករថៃម្នាក់នេះខ្លាំងដូចគេនិយាយមែននោះ ឡុង សុភីពិតជាយ៉ាប់ហើយ ។
គូអន្តរជាតិទី២ កីឡាករ សារឿន ចាន់ មកពីក្លិបតាព្រហ្មមានជ័យ ត្រូវប្រកួតជាមួយកីឡាករថៃឈ្មោះ កោះ ផេត ក្នុងប្រភេទទម្ងន់៦០គីឡូក្រាម ។ កោះ ផេត តាមតែគេដឹងទើបតែឈានជើងមកប្រកួតនៅស្រុកខ្មែរជាលើកទី១ប៉ុណ្ណោះ ដូច្នេះចំពោះប្រវត្តិប្រកួតរបស់គេខ្លាំងឬខ្សោយនោះអត់មានអ្នកណាដឹងនោះទេ ។
រីឯសារឿន ចាន់ ក៏ជាអ្នកប្រដាល់ដែលធ្លាប់មានឈ្មោះល្បីមួយរូបដែរ ប៉ុន្តែដោយសារតែបាត់មុខយូរពីលើសង្វៀន ទើបមិនដឹងថា ថ្វីដៃប្រកួតរបស់គេនៅល្អដូចមុនទៀតឬអត់ ។ ចាំមើលសារឿន ចាន់ អាចទៅរួចជាមួយកីឡាករថៃម្នាក់នេះបានដល់កម្រិតណា ។
គូអន្តរជាតិទី៣ជាគូបើកឆាករវាងកីឡាករ ផៃ សីហា មកពីក្លិបអង្គរមានជ័យខេត្តសៀមរាបប្រកួតជាមួយកីឡាករថៃឈ្មោះ យ៉ត កតញ្ញូ ក្នុងប្រភេទទម្ងន់៣៣គីឡូក្រាម ។ ចំណែកគូប្រកួតមិត្តភាពធម្មតាវិញកីឡាករ ម៉ន វណ្ណី មកពីក្លិបកងទ័ពជើងគោកព្រែកឯង ប្រកួតជាមួយ កីឡាករ ធន់ មករា មកពីសមាគមកីឡាប្រដាល់ក្រសួងការពារជាតិ ៕
ចែករំលែកព័តមាននេះ