សមាសភាពគូប្រកួតប្រដាល់អន្តរជាតិនៅរេញទូរទស្សន៍ My TV និង CNC
រាជធានីភ្នំពេញ ៖ ហ៊ឹម សេរី មកពីក្លិបតាព្រហ្មមានជ័យ និងសរ រាជសីហ៍ មកពីក្លិបមោងឫស្សីមរតកគុនខ្មែរ ត្រូវបានគេផ្គូផ្គងឱ្យជួបប្រកួតជាមួយកីឡាករថៃនៅលើសង្វៀន
រាជធានីភ្នំពេញ ៖ ហ៊ឹម សេរី មកពីក្លិបតាព្រហ្មមានជ័យ និងសរ រាជសីហ៍ មកពីក្លិបមោងឫស្សីមរតកគុនខ្មែរ ត្រូវបានគេផ្គូផ្គងឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍ MyTV ថ្ងៃសុក្រទី៤ សីហា ស្អែកនេះ ។ អ្នកនិយមទស្សនាកីឡាប្រដាល់ភាគច្រើនកំពុងតែទន្ទឹងរង់ចាំមើលថាតើកីឡាករកម្ពុជា ទាំង២រូបនេះអាចផ្ដួលគូប្រកួតបានដែរឬយ៉ាងណា? ខណៈកីឡាករថៃដែលពួកគេត្រូវជួបហាក់មានសមត្ថភាពខ្លាំងមិនធម្មតាបែបហ្នឹងនោះ។
ហ៊ឹម សេរី ដែលធ្លាប់ប្រកួត៥១ដង ឈ្នះ៤៤ដង ចាញ់៥ដង ស្មើ២ដង និងផ្ដួលគូប្រកួតឱ្យសន្លប់បាន៩ដង ត្រូវជួបប្រកួតជាមួយកីឡាករថៃឈ្មោះ នឹងរ៉ាស៊ី ស៊ីតភ្នំថង ក្នុងប្រភេទទម្ងន់៥១គីឡូក្រាម ។ កីឡាករថៃរូបនេះធ្លាប់ប្រកួត៨០ដង ឈ្នះ៦០ដង ចាញ់១៧ដង ស្មើ៣ដងនិងផ្ដួលគូប្រកួតឱ្យសន្លប់១៣ដង ។
សរ រាជសីហ៍ ដែលធ្លាប់ប្រកួត៧០ដង ឈ្នះ៥៣ដង ចាញ់១៦ដង ស្មើ១ដងនិងផ្ដួលគូប្រកួតឱ្យសន្លប់១២ដង ត្រូវជួបប្រកួតជាមួយកីឡាករថៃឈ្មោះ អូប៉ស ថវីស៊ីត ក្នុងប្រភេទទម្ងន់៦៩គីឡូក្រាម ។ កីឡាករថៃរូបនេះធ្លាប់ប្រកួត១១០ដង ឈ្នះ៨៥ដង ចាញ់២០ដង ស្មើ៥ដង និងផ្ដួលគូប្រកួតឱ្យសន្លប់២០ដង ។ រីឯគូប្រកួតមិត្តភាពធម្មតាវិញកីឡាករ លីនវិរៈ មកពីក្លិបបុរីរាជសីហ៍មានឫទ្ធិ ត្រូវប្រកួតជាមួយកីឡាករ ផន ភឿត មកពីក្លិបឃ្លាំងមឿងកីឡា និងកីឡាករ ថន វាសនា មកពីក្លិបនាគរាជគុនខ្មែរ ប្រកួតជាមួយកីឡាករ សួង សុវណ្ណថា មកពីសមាគមកីឡាប្រដាល់ក្រសួងការពារជាតិ ។
ដោយឡែកនៅលើសង្វៀនទូរទស្សន៍CNCថ្ងៃសៅរ៍ទី៥ សីហា វិញ ក៏មានការប្រកួតប្រដាល់លក្ខណៈម៉ារ៉ាតុងក្នុងប្រភេទទម្ងន់៦៣,៥គីឡូក្រាមរវាងកីឡាករកម្ពុជាឌុម កែវដា មកពីក្លិបមកុដរាជសីហ៍ ដែលធ្លាប់ប្រកួត៣៧ដង ឈ្នះ២៩ដង ចាញ់៨ដង និងផ្ដួលគូប្រកួតឱ្យសន្លប់១៤ដង ត្រូវប្រកួតជាមួយកីឡាករថៃឈ្មោះ ឆាងសឹក ស.សុផាត់ត្រាយីម ដែលធ្លាប់ប្រកួត៨៥ដង ឈ្នះ៦៣ដង ចាញ់២០ដង ស្មើ២ដង និងផ្ដួលគូប្រកួតឱ្យសន្លប់១៥ដង ។ ថុល មករា មកពីក្លិបឃ្លាំងមឿងកីឡា ដែលធ្លាប់ប្រកួត៥៨ដង ឈ្នះ៣៩ដង ចាញ់១៧ដង ស្មើ១ដងនិងផ្ដួលគូប្រកួតឱ្យសន្លប់១៦ដង ត្រូវប្រកួតជាមួយកីឡាករថៃឈ្មោះ តម្រួតឡេកធីដេតឡូងើន ដែលធ្លាប់ប្រកួត៨៤ដង ឈ្នះ៦៨ដង ចាញ់១៣ដង ស្មើ៣ដង និងផ្ដួលគូប្រកួតឱ្យសន្លប់១១ដង ។ គេនៅចាំបានថា កាលពីសប្ដាហ៍មុនក្នុងពូលកម្ពុជាសុទ្ធតែបានចាញ់នៅក្នុងវគ្គប្រកួតជម្រុះទាំងអស់ ដោយឡែកនៅក្នុងសប្ដាហ៍នេះគេនៅមិនទាន់ដឹងថា កីឡាករកម្ពុជាទាំងពីររូបនេះអាចទៅរួចជាមួយកីឡាករថៃឬយ៉ាងណាទេ ដូច្នេះមានតែរង់ចាំតាមដានទាំងអស់គ្នា ។
ចំណែកគូប្រកួតមិត្តភាពធម្មតាវិញកីឡាករ រិន សារ័ត្ន មកពីក្លិបកងទ័ពជើងទឹក ប្រកួតជាមួយកីឡាករ រិទ្ធ មុន្នី មកពីក្លិបមកុដរាជសីហ៍ ៕
ចែករំលែកព័តមាននេះ