ខេត្តបន្ទាយមានជ័យ ៖ បុរសជាកម្មករអូសរទេះម្នាក់ និងពិការដៃម្ខាង បានទៅកាន់ការិយាល័យទំនាក់ទំនងព្រំដែនកម្ពុជា-ថៃ ប្រចាំមាត់ច្រកទ្វារអន្តរជាតិប៉ោយប៉ែត ដើម្បីឱ្យជួយបញ្ជាក់លើឯកសារដល់គាត់ សុំបូជាសពប្រពន្ធនៅវត្តមួយស្ថិតលើទឹកដីថៃក្នុងស្រុកអារញ្ញ ខេត្តស្រះកែវ ប្រទេសថៃ នៅព្រឹកថ្ងៃទី០១ សីហា នេះ ក្រោយពីស្លា.ប់ដោយសារជំងឺ ។
ខេត្តបន្ទាយមានជ័យ ៖ បុរសជាកម្មករអូសរទេះម្នាក់ និងពិការដៃម្ខាង បានទៅកាន់ការិយាល័យទំនាក់ទំនងព្រំដែនកម្ពុជា-ថៃ ប្រចាំមាត់ច្រកទ្វារអន្តរជាតិប៉ោយប៉ែត ដើម្បីឱ្យជួយបញ្ជាក់លើឯកសារដល់គាត់ សុំបូជាសពប្រពន្ធនៅវត្តមួយស្ថិតលើទឹកដីថៃក្នុងស្រុកអារញ្ញ ខេត្តស្រះកែវ ប្រទេសថៃ នៅព្រឹកថ្ងៃទី០១ សីហា នេះ ក្រោយពីស្លាប់ដោយសារជំងឺ ។
ក្រោយស្តាប់ការរៀបរាប់ពីបុរសខាងលើទើបគេដឹងថា ពិតជាគួរឲ្យសង្វេគ គឺគ្រួសារគាត់ទីទាល់ក្រ ប្រពន្ធឈឺរ៉ាំរ៉ៃ គ្មានប្រាក់មើលថែដិតដល់ទេ គឺកើតជំងឺទឹកនោមផ្អែម និងលើសឈាមផង ថែមទាំងត្រូវចិញ្ចឹមចៅប្រុស-ស្រីរហូត៤នាក់ទៀត ខណៈគាត់ជាកម្មករអូសរទេះរកព្រឹក ខ្វះល្ងាចនោះ ។
បុរសពិការខាងលើឈ្មោះកែវ ឌី អាយុ៥២ឆ្នាំ មានប្រពន្ធឈ្មោះស៊ាង នាង អាយុ៦២ឆ្នាំ (ស្លាប់) ស្នាក់នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។ បុរសដដែលបន្តថា ប្រពន្ធគាត់ឈឺជាង៣ខែមកហើយ ដោយសារជំងឺ ហើយគ្មានលទ្ធភាពមើលថែប្រពន្ធឲ្យបានដិតដល់នោះទេ ។ គាត់បន្តថា ដោយជំងឺកាន់តែធ្ងន់ធ្ងរ គាត់គ្មានប្រាក់ ក្មួយប្រុសរបស់គាត់ដែលស្នាក់នៅធ្វើការក្នុងស្រុកអារញ្ញ ខេត្តស្រះកែវ ប្រទេសថៃ ជួយចាត់ចែងបញ្ជូនទៅមន្ទីរពេទ្យនៅស្រុកអារញ្ញ កាលពីថ្ងៃទី៣១កក្កដា ក្រែងមានសង្ឃឹម តែជាអកុសលប្រពន្ធរបស់គាត់បានស្លាប់នៅទីនោះ។ គាត់បន្តទៀតថា ដោយសារគ្មានលទ្ធភាពក្នុងការបញ្ជូនសពត្រឡប់មកវិញ ទើបសម្រេចបូជាសពប្រពន្ធ ហើយរៀបចំធ្វើបុណ្យលើទឹកដីថៃ ដោយក្មួយប្រុសឈ្មោះរឹទ្ធ ខា អាយុ៣២ឆ្នាំ និងគ្រួសារជាអ្នកចំណាយគ្រប់បែបយ៉ាង ។
ជុំវិញករណីនេះ មន្ត្រីក្រុមការងារទំនាក់ទំនងព្រំដែនកម្ពុជា-ថៃ ប្រចាំច្រកទ្វារអន្តរជាតិប៉ោយប៉ែត បានប្រាប់កោះសន្តិភាពថាដោយមើលឃើញគ្រួសារខាងលើ ទីទាល់ក្រពេក ខាងលោកទទួលបទបញ្ជាពីអង្គភាពជួយសម្រួលបែបបទច្បាប់តាមតម្រូវការហើយថែមទាំងយករថយន្ត១គ្រឿង ជូនដំណើរនិងជួយចាត់ចែងការបូជា និងធ្វើបុណ្យលើទឹកដីថៃនោះតែម្តង ។
ចុងបញ្ចប់ បុរសកំសត់បានសុំអំពាវនាវរកអំណោយសង្គ្រោះពីសប្បុរសជន ក្នុងនិងក្រៅប្រទេស មេត្តាជួយដល់គ្រួសារគាត់ផង។
ចែករំលែកព័តមាននេះ