មន្ត្រីជាន់ខ្ពស់អ៊ុយក្រែន ៖ រុស្ស៊ីរៀបចំការវាយលុកដ៏ធំមួយ ដើម្បីប្រារព្ធខួប១ឆ្នាំនៃការឈ្លានពាន
អ៊ុយក្រែន ៖ យោងតាមប្រភពពីសារព័ត៌មាន BBC ចេញផ្សាយនៅថ្ងៃទី០២ ខែកុម្ភៈ នេះ បានឱ្យដឹង
អ៊ុយក្រែន ៖ យោងតាមប្រភពពីសារព័ត៌មាន BBC ចេញផ្សាយនៅថ្ងៃទី០២ ខែកុម្ភៈ នេះ បានឱ្យដឹងថា រដ្ឋមន្ត្រីការពារជាតិអ៊ុយក្រែន បាននិយាយថា រុស្ស៊ីកំពុងរៀបចំការវាយលុកថ្មីដ៏ធំមួយលើអ៊ុយក្រែន ហើយលោកព្រមានថា វាអាចនឹងចាប់ផ្តើមភ្លាមៗ នៅថ្ងៃទី២៤ ខែកុម្ភៈ ខាងមុខនេះ។
លោក Oleksii Reznikov រដ្ឋមន្ត្រីការពារជាតិអ៊ុយក្រែន បាននិយាយថា ទីក្រុងម៉ូស្គូបានប្រមូលផ្តុំកងទ័ពទ្រង់ទ្រាយធំ ហើយអាចនឹងសាកល្បងអ្វីមួយ ដើម្បីប្រារព្ធខួបនៃការលុកលុយលើកដំបូងរបស់ពួកគេមកលើអ៊ុយក្រែន កាលពីឆ្នាំមុន។ ការវាយប្រហារដ៏សំខាន់នេះ ក៏សម្រាប់ប្រារព្ធទិវា អ្នកការពារនៃមាតុភូមិរបស់រុស្ស៊ី នៅថ្ងៃទី២៣ ខែកុម្ភៈ ផងដែរ។ លោកបាននិយាយថា ទីក្រុងមូស្គូ បានចល័តកងទ័ពប្រហែល ៥០ម៉ឺននាក់ សម្រាប់ការវាយលុកដ៏មានសក្តានុពលនេះ។
កាលពីខែកញ្ញា ឆ្នាំ២០២២ កន្លងទៅ ប្រធានាធិបតីរុស្ស៊ី លោក Vladimir Putin បានប្រកាសអំពីការចល័តទ័ពទូទៅប្រមាណ ៣០ម៉ឺននាក់ ដែលបុរសខ្លាំងរុស្ស៊ីរូបនេះ បាននិយាយថា ជាការចាំបាច់ ដើម្បីធានាបាននូវបូរណភាពទឹកដីរបស់រុស្ស៊ី។ ប៉ុន្តែទោះយ៉ាងណា លោក Reznikov បានស្នើថា តួរលេខពិតប្រាកដដែលត្រូវបានជ្រើសរើស និងដាក់ពង្រាយនៅអ៊ុយក្រែន អាចមានចំនួនខ្ពស់ជាងនេះ។
បច្ចុប្បន្នអ៊ុយក្រែន នៅតែរងការវាយប្រហារពីរុស្ស៊ី តាមរយៈការផ្លោងគ្រាប់មីស៊ីលមកលើតំបន់សំខាន់ៗមួយចំនួន។ ជាក់ស្តែងកាលពីពេលថ្មីៗនេះ មនុស្ស៣នាក់ បានស្លាប់ នៅក្នុងការវាយប្រហារលើទីក្រុង Kramatorsk ។ អភិបាលតំបន់បាននិយាយថា មនុស្ស៨នាក់ផ្សេងទៀត បានរងរបួស នៅក្នុងទីក្រុងស្ថិតក្នុងតំបន់ Donetsk មួយនេះ បន្ទាប់ពីកាំជ្រួចរុស្ស៊ី បានវាយប្រហារចំអគារលំនៅដ្ឋានមួយ។ ចំនួនអ្នកស្លាប់ត្រូវបានគេរំពឹងថា នឹងកើនឡើង នៅពេលក្រុមអ្នកជួយសង្គ្រោះរុករក នៅក្នុងបំណែកបាក់បែកនៃអគារ។
ប្រធានាធិបតីអ៊ុយក្រែន លោក Volodymyr Zelenskyy បានសរសេរសំណេរមួយនៅលើប្រព័ន្ធផ្សព្វផ្សាយសង្គមអំពីការវាយប្រហារថា «មធ្យោបាយតែមួយគត់ ដើម្បីបញ្ឈប់អំពើភេរវកម្មរបស់រុស្ស៊ី គឺការកម្ចាត់ ដោយប្រើរថក្រោះ យន្តហោះចម្បាំង និងមីស៊ីលរយៈចម្ងាយឆ្ងាយ»។
កាលពីពេលថ្មីៗកន្លងទៅនេះ ភាគីអ៊ុយក្រែន បានអំពាវនាវសារជាថ្មី សម្រាប់ជំនួយយន្តហោះចម្បាំង ពីប្រទេសលោកខាងលិច ដើម្បីជួយការពារខ្លួនពីការវាយប្រហារតាមអាកាសរបស់រុស្ស៊ី ដែលការស្នើជំនួយនេះ កើតឡើងបន្ទាប់ពីអាល្លឺម៉ង់ សហរដ្ឋអាមេរិក និងចក្រភពអង់គ្លេស បានយល់ព្រមបញ្ជូនរថក្រោះប្រយុទ្ធទំនើប សម្រាប់អ៊ុយក្រែន៕ (ដកស្រង់ចេញពី BBC)
ចែករំលែកព័តមាននេះ