EFL Cup ៖ Man United ឡើងទៅប៉ះ Newcastle វគ្គផ្តាច់ព្រ័ត្រជាលើកដំបូងរយៈពេល៦៣ឆ្នាំ
អង់គ្លេស ៖ ក្រុមបិសាចក្រហម Manchester United នឹងត្រូវតទល់ជាមួយនឹងក្រុមសារិកាព្រៃ
អង់គ្លេស ៖ ក្រុមបិសាចក្រហម Manchester United នឹងត្រូវតទល់ជាមួយនឹងក្រុមសារិកាព្រៃ Newcastle United ដើម្បីដណ្តើមតំណែងជើងឯកពានរង្វាន់ EFL Cup (Carabao Cup) ក្រោយបំបាក់ក្រុម Nottingham Forest យ៉ាងចាស់ដៃ នៅក្នុងការប្រកួតវគ្គពាក់កណ្តាលផ្តាច់ព្រ័ត្រ។
ជំនួបជើងទី១ នៅកីឡដ្ឋាន City Ground កាលពីថ្ងៃទី២៥ ខែមករា បានបញ្ចប់ទៅ ដោយក្រុមភ្ញៀវ Man United យកឈ្នះនៅក្នុងលទ្ធផល ៣-០ ខណៈជំនួបជើងទី២ ដែលបានធ្វើឡើងនៅកីឡដ្ឋាន Old Trafford កាលថ្ងៃទី០១ ខែកុម្ភៈ ក្រុមម្ចាស់ផ្ទះ Man United បានបន្តឈ្នះនៅក្នុងលទ្ធផល ២-០ ដែលមានន័យថា សរុបទាំងពីរជើង ក្រុមលោក Erik ten Hag យកឈ្នះលទ្ធផល ៥-០ ដើម្បីបន្តទៅវគ្គផ្តាច់ព្រ័ត្រពានរង្វាន់ EFL Cup ជាលើកដំបូង ក្រោយខកខានអស់រយៈពេល៦ឆ្នាំ។
Man United នឹងត្រូវតទល់ជាមួយនឹងក្រុម Newcastle ដែលបានយកឈ្នះលើក្រុម Southampton នៅក្នុងការប្រកួតវគ្គពាក់កណ្តាលផ្តាច់ព្រ័ត្រសុរបទាំងពីរេជើង ដោយលទ្ធផល ៣-១ ដើម្បីដណ្តើមតំណែងជើងឯកសម្រាប់រដូវកាល ២០២២-២៣ នេះ។
សម្រាប់ Newcastle ក្រោមការដឹកនាំរបស់លោក Eddie Howe បានដឹកនាំក្រុមរបស់រហស្សនាម «សារិកាព្រៃ» មួយនេះ ធ្វើព្យុះធ្វើភ្ញៀវយ៉ាងខ្លាំងសម្រាប់រដូវកាលនេះ ហើយនេះ គឺជាការឈានដល់វគ្គផ្តាច់ព្រ័ត្រពានរង្វាន់ EFL Cup ជាលើកដំបូង ក្រោយខកខានអស់ពេល៤៧ឆ្នាំ សម្រាប់ក្រុមដែលបច្ចុប្បន្ន កំពុងឈរនៅចំណាត់ថ្នាក់លេខ៣ នៃក្របខណ្ឌលីគកំពូលអង់គ្លេស English Premier League មួយនេះ។ ខណៈលើកដំបូង ដែលពួកគេឡើងដល់វគ្គផ្តាច់ព្រ័ត្រគឺរដូវកាល ១៩៧៥-៧៦ ដោយបញ្ចប់ទៅត្រឹមរងជើងឯក ក្រោយចាញ់ក្រុមមេឃខៀវ Manchester City ដោយលទ្ធផល ២-១។
គួរបញ្ជាក់ថា នេះគឺជាការជួបគ្នាជាលើកដំបូងបំផុត សម្រាប់ក្រុម Man United ម្ចាស់ជើងឯក EFL Cup ៥សម័យកាល និងក្រុម Newcastle នៅវគ្គផ្តាច់ព្រ័ត្រពានរង្វាន់ ចាប់តាំងពីពានរង្វាននេះ បង្កើតឡើងដំបូងនៅក្នុងឆ្នាំ ១៩៦០ ដែលគិតរហូតមកទល់ពេលនេះ មានរយៈពេល ៦៣ឆ្នាំហើយ។ ការប្រកួតដណ្តើមពានរង្វាន់ EFL Cup 2022-23 នឹងត្រូវធ្វើឡើងនៅឯកីឡដ្ឋានជាតិ Wembley នាថ្ងៃទី២៦ ខែកុម្ភៈ ឆ្នាំ២០២៣ ខាងមុខនេះ៕
ចែករំលែកព័តមាននេះ