រាជធានីភ្នំពេញ ៖ ជាងសំណង់ម្នាក់បានហូបស្រាជាប្រចាំ និងស្រវឹងជារៀងរាល់ថ្ងៃ ហើយអត់ឃើញទៅធ្វើការ ធ្វើឱ្យមិត្តភក្ដិរួមការងារស្មានថា ដេកអត់ទាន់ក្រោក ក៏បានទៅដាស់ ប៉ុន្តែក្រោយមកបាត់មិនឃើញនៅក្នុងរោងស្នាក់នៅ ទើបនាំគ្នាដើររក ស្រាប់តែប្រទះឃើញស្លា.ប់នៅក្នុងទឹកត្រពាំងជិតនោះតែម្តង បង្កឲ្យមានការភ្ញាក់ផ្អើលកាលពីវេលាម៉ោង៩ព្រឹក ថ្ងៃទី០១ ខែកុម្ភៈ ឆ្នាំ២០២៣ នៅចំណុចជិតការដ្ឋានសំណង់ ដែលមានទីតាំងនៅតាមផ្លូវ៦០ម៉ែត្រ ស្ថិតក្នុងភូមិតាំងរនាម សង្កាត់ប្រទះឡាង ខណ្ឌកំបូល រាជធានីភ្នំពេញ។
ជនរងគ្រោះខាងលើនោះមានឈ្មោះ សំអុល ភេទប្រុស អាយុ៥៤ឆ្នាំ មុខរបរជាងសំណង់ ស្នាក់នៅរោងកន្លែងធ្វើសំណង់ នឹងមានស្រុកកំណើតនៅឯខេត្តព្រៃវែង និងស្នាក់នៅកន្លែងកើតហេតុ។
តាមប្រភពព័ត៌មានពីកន្លែងកើតហេតុបានឲ្យដឹងថា បុរសរងគ្រោះរូបនេះ បានមកធ្វើការងារនៅក្នុងការដ្ឋនសំណង់ខាងលើជាច្រើនឆ្នាំមកហើយ ហើយគាត់ក៏ជាមនុស្សម្នាក់តែងតែផឹកស្រាជាប្រចាំ និងស្រវឹងជារៀងរាល់ថ្ងៃថែមទៀតផង ដោយក្នុងមួយថ្ងៃផឹកអស់១,៥លីត្រជាទៀងទាត់តែម្ដង។ ប៉ុន្តែទោះបីជាស្រវឹងបែបនេះក្ដី ក៏គាត់បានធ្វើការងាររាល់ថ្ងៃមិនដែលសម្រាកនោះឡើយ លើកលែងតែនៅពេលដែលគាត់ឈឺតែប៉ុណ្ណោះ ទើបសម្រាក១ថ្ងៃ ឬ២ថ្ងៃ។
ប្រភពដដែលបានប្រាប់ឲ្យដឹងបន្ថែមទៀតថា ដោយឡែកនៅព្រឹកថ្ងៃកើតហេតុ មិនឃើញគាត់ក្រោកទៅធ្វើការសោះ ហើយស្មានថាគាត់ដេកមិនទាន់ក្រោក ទើបមិត្តភក្ដិរួមការងារនាំគ្នាដើររកមើលក្នុងរោង ដើម្បីដាស់ឲ្យគាត់ក្រោកទៅធ្វើការ។ ប៉ុន្តែពេលទៅដល់មិនឃើញគាត់នៅក្នុងរោងនោះទេ មិត្តភក្តិរួមការងារក៏បានដើររក ស្រាប់តែប្រទះឃើញគាត់ស្លា.ប់នៅក្នុងទឹកត្រពាំងជាប់រោងដែលគាត់ស្នាក់នៅទៅវិញ ទើបបង្កឱ្យមានការភ្ញាក់ផ្អើលឆោឡោតែម្ដង។
ក្រោយមកក៏បានរាយការណ៍ជូននគរបាល ឲ្យចុះទៅពិនិត្យកោសល្យវិច័យ ហើយនគរបាលប្រាប់ថា ជនរងគ្រោះស្រវឹងស្រា ហើយដើរធ្លាក់ទឹក រួចក៏លង់ស្លា.ប់តែម្តង។ បន្ទាប់ពីពិនិត្យរួចក៏បាទំនាក់ទំនងទៅក្រុមគ្រួសារ ដើម្បីនាំយកស.ពបុរសរងគ្រោះទៅធ្វើបុណ្យតាមប្រពៃណីនៅស្រុកកំណើត៕
ចែករំលែកព័តមាននេះ