ខេត្តស្វាយរៀង ៖ មហាជនបានរាយការណ៍ និងផ្តល់ព័ត៌មានជូនលោកអភិបាលខេត្ត ដោយសុំបទអន្តរាគមន៍លើករណីក្នុងហាងកាហ្វេមួយកន្លែងសង្ស័យបង្កប់ល្បែងស៊ីសងនិងជល់មាន់តាមអនឡាញ អាចធ្វើឲ្យប៉ះពាល់ដល់គោលនយោបាយភូមិឃុំមានសុវត្ថិភាព ដែលរាជរដ្ឋាភិបាលបញ្ជាឲ្យបង្ក្រាប ក៏ប៉ុន្តែពេលសមត្ថកិច្ចចុះទៅដល់ទីតាំងគឺហាក់បីដូចជា គ្មានការផ្តល់ទីតាំងឬបើកកន្លែងភ្នាល់ល្បែងស៊ីសងទៅវិញ បែរជួបតែអ្នកផឹកកាហ្វេ។
នៅព្រឹកថ្ងៃទី៣១ មករា ឆ្នាំ២០២៣ នេះ លោកសេង សិលា និងលោកម៉ែន អេង អភិបាលរងខេត្តស្វាយរៀងបានអញ្ជើញចុះពិនិត្យទីតាំងហាងកាហ្វេមួយកន្លែងស្ថិតនៅក្នុងភូមិទួលអំពិល សង្កាត់ច្រកម្ទេស ក្រុងបាវិត ខេត្តស្វាយរៀង ដែលធ្លាប់ផ្តល់កន្លែងលេងល្បែ.ងស៊ីសង (ឡូតូអនឡាញនិងមាន់ជល់អនឡាញ) ។ សមាសភាពចូលរួមមានលោកវណ្ណ សុមុន្នី អភិបាលរងក្រុងបាវិត លោកចៅសង្កាត់ច្រកម្ទេស លោកនាយប៉ុស្តិ៍នគបាលរដ្ឋបាលសង្កាត់ច្រកម្ទេសផងដែរ ។
លោកសេង សិលា អភិបាលរងខេត្តបានមានប្រសាសន៍ថា បន្ទាប់ពីទទួលបានព័ត៌មានថា មានទីតាំងផ្តល់កន្លែង ភ្នាល់លេងល្បែងស៊ីសងនោះ លោកម៉ែន វិបុល អភិបាលខេត្តស្វាយរៀងបានចាត់ឱ្យលោក និងលោកម៉ែន អេង ជាអភិបាលរងខេត្តស្វាយរៀង ដឹកនាំកម្លាំងសហការជាមួយរដ្ឋបាលក្រុងបាវិត សង្កាត់ច្រកម្ទេស បានចុះពិនិត្យទីតាំងខាងលើនោះ ។
លោកអភិបាលរងខេត្តបានមានប្រសាសន៍បន្តទៀតថា ក្រោយពីចុះទៅដល់ទីតាំងហាងកាហ្វេខាងលើនេះ ពិនិត្យឃើញថា ទីតាំងមួយនេះគ្មានសកម្មភាពបើកល្បែងស៊ីសងនោះទេ ហើយទីតាំងនេះក៏ធ្លាប់ត្រូវបានធ្វើកិច្ចសន្យា អប់រំណែនាំជាមួយអាជ្ញាធរមូលដ្ឋានរួចហើយដែរ ។ លោកសេង សិលា និងលោក ម៉ែន អេង បានធ្វើការណែនាំដល់ម្ចាស់ទីតាំងហាងកាហ្វេខាងលើ កុំឱ្យមានការលួចលាក់ផ្តល់កន្លែងលេងល្បែងស៊ីសង គ្រប់ប្រភេទដែលផ្ទុយទៅនឹងច្បាប់ ប្រសិនបើមានលួចលាក់ផ្តល់ទីតាំងសមត្ថកិច្ចពិនិត្យឃើញមានបទល្មើសត្រូវចាប់ខ្លួនទាំងអ្នកលេងទាំង អ្នកផ្តល់ទីតាំងផងដែរ ។
លោកអភិបាលរងខេត្តបានអំពាវនាវ ដល់ពលរដ្ឋខ្មែរទាំងអស់កុំឱ្យនាំគ្នាចូលលេងល្បែងស៊ីសង នៅតាមបណ្តាកាស៊ីណូ និងទីតាំងបើកលេងល្បែងស៊ីសងគ្រប់ប្រភេទដែលវាផ្ទុយទៅនឹងច្បាប់ ហើយប្រឈមទៅនឹងទោសទណ្ឌថែមទៀតផង៕
ចែករំលែកព័តមាននេះ