បិទវគ្គហ្វឹកហ្វឺនបំប៉ននិងពង្រឹងសមត្ថភាពយោធាខេត្តតាកែវ
- តាកែវ
ខេត្តតាកែវ ៖ លោកឧត្តមសេនីយ៍ឯក យឿង សុខុន មេបញ្ជាការរងទ័ពជើងគោក មេបញ្ជាការយោធភូមិភាគទី៣ និងលោក អ៊ូច ភា…
ខេត្តតាកែវ ៖ លោកឧត្តមសេនីយ៍ឯក យឿង សុខុន មេបញ្ជាការរងទ័ពជើងគោក មេបញ្ជាការយោធភូមិភាគទី៣ និងលោក អ៊ូច ភា អភិបាលនៃគណៈអភិបាលខេត្តតាកែវ ព្រមទាំងថ្នាក់ដឹកនាំ នៅថ្ងៃទី៣១ មករា ឆ្នាំ២០២៣ បានអញ្ជើញជាអធិបតីនៅក្នុងពិធីបិទវគ្គហ្វឹកហ្វឺនបំប៉នពង្រឹងសមត្ថភាពយោធាឆ្នាំ២០២២ របស់តំបន់ប្រតិបត្តិការសឹករងតាកែវ នៅទីលានបាញ់គ្រាប់ពិត ស្ថិតនៅភូមិបុស្សតាផង់ ឃុំត្រពាំងក្រញូង ស្រុកត្រាំកក់ ។
ពិធីនេះ ក៏មានការអញ្ជើញចូលរួមដោយលោកឧត្តមសេនីយត្រី នាង សុភារ៉ា មេបញ្ជាការតំបន់ប្រតិបត្តិការសឹករងតាកែវ លោកមេបញ្ជាការរងកងរាជអាវុធហត្ថខេត្ត លោកស្នងការរងនគរបាលខេត្ត ព្រមទាំងថ្នាក់ដឹកនាំរដ្ឋបាលខេត្តតាកែវជាច្រើនរូបផងដែរ ។ លោកឧត្តមសេនីយ៍ត្រី នាង សុភារ៉ា មេបញ្ជាការតំបន់ប្រតិបត្តិការសឹករងតាកែវ ការរៀបចំបា.ញ់គ្រាប់ពិតនេះ គឺតំបន់សឹករងតាកែវ បានសហការជាមួយការិយាល័យហ្វឹកហ្វឺនយោធភូមិភាគទី៣ បានបើកវគ្គហ្វឹកហ្វឺនបំប៉នពង្រឹងសមត្ថភាពយោធាឆ្នាំ២០២២ ដល់សិក្ខាកាមចំនួន៨០នាក់របស់តំបន់ប្រតិបត្តិការសឹករងតាកែវមានរយៈពេល៣ខែ និងប្រើប្រាស់ប្រភេទអាវុធPKMS និងអាវុធ AK47 ។
លោក អ៊ូច ភា អភិបាលខេត្តតាកែវបានថ្លែងការកោតសរសើរចំពោះតំបន់ប្រតិបត្តិការសឹករងខេត្តតាកែវ ដែលបានរៀបចំហ្វឹកហ្វឺននេះ ដើម្បីបង្កើនចំណេះថ្មីៗបន្ថែមទៀត ហើយការបា.ញ់ស៊ីបគ្រាប់ពិតរបស់យើងទទួលបានលទ្ធផលល្អបា.ញ់ចំគោលដៅ ដែលមានចំងាយ១០០ម៉ែត្រ ពិតជាមានសារសំខាន់សម្រាប់យោធិនរបស់យើងសព្វថ្ងៃនេះ ប្រទេសយើងមានសុខសន្តិភាពពេញលេញ ក្រោមការដឹកនាំរបស់រាជរដ្ឋាភិបាលកម្ពុជា មានសម្តេចអគ្គមហាសេនាបតី តេជោ ហ៊ុន សែន ជានាយករដ្ឋមន្ត្រី ក៏ប៉ុន្តែកម្លាំងយោធារបស់យើងត្រូវតែមានភាពរឹងមាំ ដើម្បីបន្ត ការពារបុព្វហេតុជាតិមាតុភូមិរបស់យើងប្រទេសយើង មានសុខសន្តិភាពមិនអាចបំភ្លេចចោលកាតព្វកិច្ចយោធា។
លោកឧត្តមសេនីយ៍ឯក យឿង សុខុន មេបញ្ជាការរងទ័ពជើងគោក មេបញ្ជាការយោធភូមិភាគទី៣ បានបន្ថែមថា ចំពោះវគ្គហ្វឹកហ្វឺននេះ គឺបានផ្ដល់នូវការយល់ដឹងនិងបទពិសោធន៍ល្អៗ ដែលអាចធានាបានអំពីសមត្ថភាពជំនាញវិជ្ជាជីវៈរបស់យោធិនយើងបានល្អបន្ថែមទៀតទាំងក្នុងការងារប្រយុទ្ធ និងត្រៀមប្រយុទ្ធ ដោយដើរទន្ទឹមគ្នានឹងការងារអប់រំចិត្តសាស្ត្រ ដល់យោធិនគ្រប់រូបឲ្យមានមនសិការ វិជ្ជាជីវៈគោរពច្បាប់វិន័យកងទ័ព ជាពិសេស បំពេញភារកិច្ចតួនាទីរបស់ខ្លួនបម្រើជាតិមាតុភូមិ ដោយស្មោះត្រង់ដាច់ខាតចំពោះ ជាតិសាសនា ព្រះមហាក្សត្រ ក៏ដូចជាការធានានូវការអនុវត្តយ៉ាងម៉ឺងម៉ាត់នូវបទបញ្ជារបស់រាជរដ្ឋាភិបាល ក្រសួងការពារជាតិ អគ្គបញ្ជាការ បញ្ជាការដ្ឋានកងទ័ពជើងគោក ។
ចែករំលែកព័តមាននេះ