ខេត្តកំពង់ចាម ៖ ត្រីរាជមួយក្បាលទៀត ត្រូវបានប្រជានេសាទប្រើម៉ាញ់ ដែលមានកម្លាំងមនុស្សជាច្រើននាក់ ធ្វើការនេសាទអូសតាមដងទន្លេមេគង្គ ។ ជាមួយនោះ ត្រូវបានប្រលែងចូលទៅក្នុងទឹកទន្លេវិញ នាព្រឹកថ្ងៃទី១៩…
ខេត្តកំពង់ចាម ៖ ត្រីរាជមួយក្បាលទៀត ត្រូវបានប្រជានេសាទប្រើម៉ាញ់ ដែលមានកម្លាំងមនុស្សជាច្រើននាក់ ធ្វើការនេសាទអូសតាមដងទន្លេមេគង្គ ។
ជាមួយនោះ ត្រូវបានប្រលែងចូលទៅក្នុងទឹកទន្លេវិញ នាព្រឹកថ្ងៃទី១៩ ខែមករា ឆ្នាំ២០២៦ នៅចំណុចឃុំរកាគយ ស្រុកកងមាស ដោយមានការចូលរួមពីកម្លាំងអាជ្ញាធរមូលដ្ឋានព្រមទាំងជំនាញជលផល ។ តាមដឹងត្រីនេះ មានទម្ងន់ក្រោម១០០គីឡូក្រាម ហើយបើអ្នកណានេសាទបាន គឺមិនអនុញ្ញាតឱ្យលក់នៅលើទីផ្សារនោះទេ ព្រោះជាប្រភេទត្រីកម្រជិតផុតពូជ ។
លោកលី ស្រ៊ី នាយខណ្ឌរដ្ឋបាលជលផលកំពង់ចាម បានប្រាប់ឲ្យដឹងថា:
ស្របពេលរដូវបើកនេសាទ គឺមានបងប្អូនខ្មែរឥស្លាម បានប្រើប្រាស់ឧបករណ៍នេសាទស្របច្បាប់មានម៉ាញ់ ប្រើទូកម៉ាស៊ីនអូសចាប់យកត្រីតូចធំ ដើម្បីលក់ដូរឱ្យបងប្អូនអាជីវករនៅតាមទីផ្សារនានាក្នុងខេត្តកំពង់ចាម ។
ជាក់ស្ដែង នៅវេលាម៉ោង៤និង៣០នាទីរសៀល ថ្ងៃទី១៨ ខែមករា ឆ្នាំ២០២៦ ខណ្ឌរដ្ឋបាលជលផលកំពង់ចាម បានទទួលព័ត៌មានពីប្រជានេសាទឈ្មោះ ឆាយ សេងឃុន ដែលបាននេសាទបានត្រីរាជ ទម្ងន់ប្រហែល ៧០គីឡូជាង ដោយប្រើប្រាស់ឧបករណ៍ម៉ាញ់ នៅចំណុចតាមដងទន្លេមេគង្គ ភូមិថ្មី(ក) ឃុំរកាគយ ស្រុកកងមាស ខេត្តកំពង់ចាម ។ ចំពោះទីតាំងដែលនេសាទបាននេះ គឺមានលក្ខណៈអំណោយផល ព្រោះជាកន្លែងមួយដែលមានអន្លង់ជ្រៅទឹកត្រជាក់ហើយត្រីចូលចិត្តរស់នៅ ។
លោកនាយខណ្ឌជលផល បន្តឲ្យដឹងទៀតថា បន្ទាប់មកខណ្ឌរដ្ឋបាលជលផលកំពង់ចាម បានចុះត្រួតពិនិត្យ និងទំនាក់ទំនងផ្តល់ព័ត៌មានជូនវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋបាលជលផល និងគម្រោងអច្ឆរិយភាពនៃទន្លេមេគង្គ ដើម្បីកំណត់ទិន្នន័យត្រីរាជ និងមានវិធានការបន្ត ។
ក្រុមការងារបច្ចេកទេសវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋបាលជលផលបានកំណត់ទិន្នន័យដូចខាងក្រោម៖
+ត្រីរាជ ភេទ ញី
+ប្រវែង ១៨៧ សង់ទីម៉ែត្រ
+ទម្ងន់សរុប ៧៨ គីឡូក្រាម
+ពាក់ស្លាករដ្ឋបាលជលផល លេខកូដ ៣១៦
+នេសាទបាននៅតាមដងទន្លេមេគង្គ ភូមិថ្មី(ក) ឃុំរកាគយ ស្រុកកងមាស ខេត្តកំពង់ចាម ។
ក្រោយពីកំណត់អត្តសញ្ញាណដូចខាងលើរួច ក្រុមការងារមានអាជ្ញាធរស្រុកកងមាស មន្ត្រីនៃរដ្ឋបាលជលផល ខណ្ឌរដ្ឋបាលជលផលកំពង់ចាម និងក្រុមការងារគម្រោងអច្ឆរិយភាពនៃទន្លេមេគង្គ និងប្រជានេសាទបានលែងត្រីរាជនេះ ចូលក្នុងទន្លេមេគង្គវិញ ។
ខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម សូមអំពាវនាវដល់ប្រជានេសាទទាំងអស់ សូមផ្តល់ដំណឹងមកមន្ត្រីជំនាញនៃខណ្ឌរដ្ឋបាលជលផល នៅពេលនេសាទបានដោយចៃដន្យ ប្រភេទត្រីកម្រ ដូចជា ត្រីគល់រាំង ត្រីរាជ ត្រីត្រសក់ ជាដើម ដើម្បីលែងចូលទន្លេវិញ ក្នុងគោលបំណងអភិរក្សប្រភេទកម្រទាំងនេះឱ្យបានគង់វង្ស ។
បើគិតដើមឆ្នាំ ២០២៦ នេះការនេសាទត្រីរាជមកដល់ពេលនេះ បានចំនួន៣ក្បាលហើយ ។ ចំពោះអ្នកដែលនេសាទបានត្រូវបានក្រុមអភិរក្សលើកទឹកចិត្តជូនថវិកាមួយចំនួនដោយឡែកជំនាញជលផលខេត្តក៏បានផ្ដល់បានសរសើរដល់អ្នកនេសាទនោះផងដែរ ៕
ចែករំលែកព័តមាននេះ