១ខែកន្លងហើយ! តើស្ថានភាព Ronaldo នៅអារ៉ាប៊ីសាអូឌីតយ៉ាងណាហើយ?
អារ៉ាប៊ីសាអូឌីត ៖ គិតរហូតមកទល់ពេលនេះ រយៈពេល១ខែហើយ ដែលកីឡាករ Cristiano Ronaldo
អារ៉ាប៊ីសាអូឌីត ៖ គិតរហូតមកទល់ពេលនេះ រយៈពេល១ខែហើយ ដែលកីឡាករ Cristiano Ronaldo បានចូលរួមជាមួយក្លិប Al Nassr លីគកំពូលអារ៉ាប៊ីសាអូឌីត Saudi Pro League។ ចុះរហូតមកទល់ពេលនេះ តើស្ថានភាពកំពូលខ្សែប្រយុទ្ធព័រទុយហ្គាល់រូបនេះ ទៅជាយ៉ាងណាហើយ?
ចាប់តាំងពីចាកចេញពីក្លិប Manchester United នៅលីគកំពូលអង់គ្លេស English Premier League ហើយទៅចូលរួមជាមួយក្លិប Al Nassr កាលពីថ្ងៃទី៣០ ខែធ្នូ ឆ្នាំ២០២២ Ronaldo បង្ហាញខ្លួនការប្រកួតផ្លូវការជាមួយ Al Nassr បាន២ប្រកួតហើយ ដោយ១ប្រកួតក្នុងលីគ និង១ប្រកួតទៀត ជាការប្រកួតពានរង្វាន់ក្នុងស្រុក និងពុំទាន់មានការស៊ុតបញ្ចូលទីនៅឡើយទេ។
ការបង្ហាញខ្លួនចុងក្រោយរបស់ Ronaldo គឺការប្រកួតវគ្គពាក់កណ្តាលផ្តាច់ព្រ័ត្រពានរង្វាន់ Saudi Super Cup 2022 ដោយរងបរាជ័យក្រោមថ្វីជើងក្រុម Al Ittihad នៅក្នុងលទ្ធផល ៣-១ កាលពីថ្ងៃទី២៦ ខែមករា កន្លងទៅ។
ក្រោយធ្លាក់ចេញពី Saudi Super Cup 2022 អ្នកគាំទ្រមួយចំនួនរបស់ Al Nassr មានការខឹងសម្បារយ៉ាងខ្លាំង ដោយភាគច្រើនពួកគេបង្ហាញការមិនពេញចិត្តលើ Ronaldo។ វីដេអូមួយ ត្រូវបានចែកចាយលើបណ្តាញទំនាក់ទំនងសង្គម បង្ហាញពីអ្នកគាំទ្រ២នាក់ ជាន់អាវ Al Nassr ដែលមានឈ្មោះ និងលេខរបស់ Ronaldo ដែលពួកគេកំពុងស្តីបន្ទោសកីឡាកររូបនេះ ចំពោះបរាជ័យក្នុងលទ្ធផល ៣-១ នៅកីឡដ្ឋាន King Fahd International។ ខណៈនៅក្នុងកីឡដ្ឋាន ក្រោយចប់ការប្រកួត គេសង្កេតឃើញសម្រែកអ្នកគាំទ្រមួយចំនួន ស្រែកឈ្មោះកំពូលខ្សែប្រយុទ្ធអាហ្សង់ទីន Lionel Messi ក្នុងន័យឌឺដងដល់ Ronaldo។
ទោះយ៉ាងណា អ្នកគាំទ្រជាច្រើនផ្សេងទៀត នៅតែរីករាយជាមួយវត្តមាន ខ្សែប្រយុទ្ធព័រទុយហ្គាល់រូបនេះ ដោយលើកឡើងថា Ronaldo ត្រូវការពេលវេលា ដើម្បីសម្រកខ្លួនជាមួយនឹងរបៀបនៃការលេងនៅអារ៉ាប៊ីសាអូឌីត។
ក្រោយការបរាជ័យនោះ លោក Rudi Garcia គ្រូបង្វឹកក្រុម Al Nassr ក៏បានលើកឡើងអំពីទម្រង់លេងរបស់ Ronaldo ផងដែរ ដោយនិយាយថា « Ronaldo បានបាត់បង់ឱកាសបង្កើតគ្រាប់បាល់ ដែលនឹងផ្លាស់ប្តូរដំណើរនៃការប្រកួតក្នុងតង់ទី១ ប៉ុន្តែខ្ញុំសូមអបអរសាទរចំពោះ Al Ittihad។ ពួកគេល្អជាងពួកយើងរហូតដល់ពាក់កណ្តាលតង់។ បន្ទាប់មកយើងបានប្រតិកម្មឆ្លើយតបវិញ ប៉ុន្តែមិនអាចកែប្រែស្ថានការណ៍បានទេ។ យើងចាញ់ Super Cup ប៉ុន្តែយើងនៅតែជាក្រុមកំពូលតារាង»។
គ្រូបង្វឹកជនជាតិបារាំងវ័យ៥៨ឆ្នាំរូបនេះ បានបន្ថែមថា «Ronaldo គឺជាការបន្ថែមភាពវិជ្ជមានមួយសម្រាប់ក្រុម ខណៈដែលគេបានជួយបំបែករនាំងខ្សែការពារ។ គេជាកីឡាករដ៏ល្អបំផុតម្នាក់នៅក្នុងពិភពលោក ហើយខ្ញុំជឿថា គេនឹងមិនបញ្ចប់អាជីពខ្លួននៅ Al Nassr នោះទេ គេនឹងត្រឡប់ទៅអាជីពនៅអឺរ៉ុបវិញ»។
គួររំលឹកបន្ថែមថា Cristiano Ronaldo បានចូលរួមជាមួយក្លិប Al Nassr កាលពីថ្ងៃទី៣០ ខែធ្នូ ឆ្នាំ២០២២ ដោយគ្មានតម្លៃខ្លួន (Free Transfer) និងបានចុះហត្ថលេខាលើកុងត្រារយៈពេល២ឆ្នាំកន្លះ ដែលជាមួយកុងត្រានេះ Ronaldo បានក្លាយជាកីឡាករទទួលបានថ្លៃនឿយហត់ខ្ពស់បំផុត មិនធ្លាប់មានក្នុងប្រវត្តិសាស្ត្របាល់ទាត់ ពោលប្រមាណ ២១០លានដុល្លារអាមេរិក នៅក្នុងមួយឆ្នាំ។
មុនពេលបង្ហាញខ្លួនប្រកួតផ្លូវការសម្រាប់ Al Nassr ខ្សែប្រយុទ្ធក្រុម Real Madrid និង Juventus វ័យ៣៧ឆ្នាំរូបនេះ បានបង្ហាញខ្លួនលើកដំបូង ក្នុងជំនួបមិត្តភាពរវាងក្រុម All Star ជ្រើសរើសចេញពីក្រុម Al-Nassr និង Al-Hilal ទល់នឹងក្រុម PSG ដែលក្រុមមកពីលីគកំពូលបារាំងយកឈ្នះលទ្ធផល ៥-៤ កាលពីថ្ងៃទី១៩ ខែមករា ដោយក្នុងនោះ Ronaldo រកបាន២គ្រាប់ផងដែរ នៅក្នុងជំនួបក្រៅផ្លូវការមួយនេះ៕ (ដកស្រង់ចេញពី Sky Sports និង Marca)
ចែករំលែកព័តមាននេះ