ការបំបៅកូនដោយទឹកដោះម្តាយមិនត្រឹមតែផ្តល់នូវសារធាតុចិញ្ចឹម និងអាហារបំប៉នដល់ទារកនោះទេ វាថែមទាំងផ្តល់នូវអត្ថប្រយោជន៍ជាច្រើនដល់ម្តាយផងដែរ ។
ការបំបៅកូនដោយទឹកដោះម្តាយគឺជាវិធីដែលផ្ដល់នូវអត្ថប្រយោជន៍ជាច្រើនដល់សុខភាពម្តាយ និងទារក ។ ទឹកដោះម្តាយត្រូវបានគេចាត់ទុកថាជាអាហារដ៏ល្អឥតខ្ចោះសម្រាប់ទារក ហើយវាក៏មានសារធាតុចិញ្ចឹមក្នុងបរិមាណត្រឹមត្រូវជួយដល់សុខភាពម្តាយ ។
អត្ថប្រយោជន៍មួយចំនួននៃការបំបៅដោះកូនចំពោះម្តាយគឺ៖
១-បន្ថយហានិភ័យនៃការហូរឈាមបន្ទាប់ពីសម្រាលកូន
ការបំបៅដោះកូន ភ្លាមៗក្រោយពេលសម្រាលជួយឱ្យទារកទទួលអាហារបំប៉នដ៏ល្អចំពោះសុខភាពរបស់គេ ។ ការធ្វើដូចនេះមិនត្រឹមតែធានាបានថាទារកទើបនឹងកើតទទួលបានអាហារបំប៉ន និងចំណីអាហារដើម្បីបំប៉ន និងបំពេញការស្រេកឃ្លានរបស់ពួកគេក្រោយពេលកើត ភ្លាមៗទេ ប៉ុន្តែវាក៏ជួយកាត់បន្ថយការហូរឈាមចេញពីស្បូនដែលកើតឡើង ភ្លាមៗក្រោយពីការសម្រាល និងជំរុញការបញ្ចេញសុកចេញពីក្នុងស្បូន ។
២-ជួយទប់ស្កាត់បញ្ហាកង្វះជាតិដែក
បញ្ហាកង្វះជាតិដែកកើតមានជាទូទៅក្នុងចំណោមអ្នកម្តាយជាច្រើន ។ ការបន្តបំបៅកូនដោយទឹកដោះម្តាយអាចជួយកាត់បន្ថយហានិភ័យ និងពន្យារពេលនៃវដ្តរដូវ ដូច្នេះអាចជួយការពារការបាត់បង់ជាតិដែកតាមរយៈការហូរឈាមរដូវ ។ ទោះជាយ៉ាងណាក្តី អ្នកម្តាយត្រូវបានណែនាំឱ្យលេបថ្នាំជាតិដែករបស់ពួកគេយ៉ាងហោចណាស់៣ខែបន្ទាប់ពីការសម្រាល ។
៣-បន្ថយហានិភ័យនៃការមានគភ៌
ការមានផ្ទៃពោះជាលើកទី២ ភ្លាមៗបន្ទាប់ពីការសម្រាលកូនមិនមែនជារឿងល្អសម្រាប់ម្តាយ ទារកដែលទើបនឹងកើត ឬកូនក្នុងផ្ទៃនោះទេ ។ វាអាចបណ្តាលឱ្យមានភាពតានតឹងខាងផ្លូវចិត្តយ៉ាងខ្លាំងចំពោះម្តាយ និងទារក ធ្វើឲ្យសុខភាពរបស់ទារកក្នុងផ្ទៃប្រឈមនឹងហានិភ័យ និងបង្អាក់ដល់ការលូតលាស់ និងការអភិវឌ្ឍទារកនៅក្នុងស្បូន។ ប៉ុន្តែការបំបៅកូនដោយទឹកដោះម្តាយតែមួយមុខរយៈពេល៦ខែក្រោយការសម្រាល និងអវត្តមាននៃការមករដូវមានតួនាទីជាអ្នកការពារ និងបន្ថយឱកាសនៃការមានគភ៌ ភ្លាមៗបន្ទាប់ពីការសម្រាល ។
៤-កាត់បន្ថយហានិភ័យនៃជំងឺមហារីក
ការសិក្សាជាច្រើនបានគាំទ្រទ្រឹស្តីដែលថាការបំបៅដោះកូនអាចពន្យារពេលនៃការកើតមានជំងឺមហារីកមួយចំនួនដូចជាជំងឺមហារីកអូវែ និងជំងឺមហារីកសុដន់ចំពោះម្តាយដែលបំបៅដោះកូន ។
៥-ជួយសម្រកទម្ងន់ក្រោយពេលមានផ្ទៃពោះ
ការឡើងទម្ងន់ក្នុងអំឡុងពេលមានផ្ទៃពោះគឺអាចទទួលយកបាន ប៉ុន្តែនៅពេលដែលទម្ងន់ទាំងនេះមិនស្រកក្រោយពេលសម្រាល វាពិតជាពិបាកក្នុងការដោះស្រាយ ។ ជាតិខ្លាញ់ប្រមូលផ្តុំក្នុងអំឡុងពេលមានផ្ទៃពោះអាចជួយម្តាយដោះស្រាយជាមួយភាពតានតឹង និងការមានផ្ទៃពោះ ព្រមទាំងតម្រូវការរបស់ទារក ។ វិធីដ៏ល្អបំផុតដើម្បីបញ្ចេញជាតិខ្លាញ់ទាំងអស់ចេញពីរាងកាយគឺការបំបៅកូនដោយទឹកដោះម្តាយ ពីព្រោះវានឹងប្រើប្រាស់ជាតិខ្លាញ់ដែលផ្ទុកនៅគ្រប់ផ្នែក ផ្សេងៗនៃរាងកាយដើម្បីផលិតទឹកដោះ ៕
ចែករំលែកព័តមាននេះ