Mike Tyson ត្រូវស្ត្រីម្នាក់ប្តឹងទារសំណង៥លានដុល្លារ ចំពោះរឿងកើតឡើងតាំងពី៣០ឆ្នាំមុន
សហរដ្ឋអាមេរិក ៖ ស្តេចប្រដាល់អាមេរិក Mike Tyson ត្រូវបានស្ត្រីរស់នៅទីក្រុងញូវយ៉កម្នាក់ប្តឹង
សហរដ្ឋអាមេរិក ៖ ស្តេចប្រដាល់អាមេរិក Mike Tyson ត្រូវបានស្ត្រីរស់នៅទីក្រុងញូវយ៉កម្នាក់ប្តឹង ដោយបានអះអាងថា បុរសវ័យ៥៦ឆ្នាំរូបនេះ បានរំលោ.ភលើរូបនាងនៅក្នុងរថយន្ត កាលពីដើមទសវត្សឆ្នាំ ១៩៩០។
យោងតាមប្រភពពីសារព័ត៌មាន The New York Post បានរាយការណ៍ថា ស្ត្រីអនាមិកម្នាក់ កំពុងទាមទារសំណងចំនួន៥លានដុល្លារអាមេរិក។ នាងបានចោទប្រកាន់ថា រឿងរ៉ាវដ៏ឈឺចា.ប់នេះ បានកើតឡើង បន្ទាប់ពីអ្នកទាំងពីរបានជួបគ្នា នៅក្នុងក្លិបកម្សាន្តរាត្រីដ៏ពេញនិយមមួយកន្លែង នៅក្នុងទីក្រុង Albany ហើយថា ក្រោយរឿងហេតុនេះ បានធ្វើឱ្យនាងមានរបួសផ្លូវកាយ និងផ្លូវចិត្តយ៉ាងខ្លាំង ក្នុងរយៈពេលប៉ុន្មានឆ្នាំកន្លងមកនេះ។
ពេលវេលាដែលស្ត្រីរូបនោះចោទប្រកាន់ គឺស្របទៅនឹងការកាត់ទោសពីបទរំលោភសេពសន្ថវៈលើកមុនរបស់លោក Mike Tyson លើបេក្ខភាពបវរកញ្ញាសម្រស់អាយុ១៨ឆ្នាំ គឺលោកស្រី Desiree Washington ក្នុងរដ្ឋ Indianapolis ដោយគ្រានោះ Tyson បានជាប់ពន្ធនាគាររយៈពេល៣ឆ្នាំ បន្ទាប់ពីការកាត់ទោសរបស់គាត់។ ប៉ុន្តែទោះយ៉ាងណា គាត់នៅតែរក្សាភាពគ្មានកំហុសរបស់ខ្លួនក្នុងករណីនោះ។
ដោយឡែក ករណីថ្មីៗនេះ ចំណាត់ការផ្លូវច្បាប់បច្ចុប្បន្ន ត្រូវបានដាក់នៅក្រោមច្បាប់ Adult Survivors របស់ទីក្រុងញូវយ៉ក ដែលផ្តល់ឱ្យជនរងគ្រោះរយៈពេល១ឆ្នាំ ដើម្បីដាក់ពាក្យបណ្តឹងជុំវិញឧប្បត្តិហេតុ ដែលបានកើតឡើងកាលពីអតីតកាល។
ស្ត្រីរងគ្រោះបានចោទថា អ្នកប្រដាល់រូបនេះ បានរំលោភរូបនាងយ៉ាងហិង្សា ប៉ុន្តែឯកសារមិនបានបញ្ជាក់ថា តើអ្នកបើកបរស្ថិតនៅក្នុងរថយន្ត នៅពេលដែលត្រូវបានគេចោទប្រកាន់នោះទេ។ លោក Darren Seilback ដែលជាមេធាវីរបស់ជនរងគ្រោះ បាននិយាយថា ការិយាល័យបានស៊ើបអង្កេតការចោទប្រកាន់របស់នាងយ៉ាងម៉ត់ចត់ ហើយបានកំណត់ថា ពួកគេបានផ្តល់ភាពជឿជាក់ខ្ពស់។
សារព័ត៌មាន SPORTbible បានទាក់ទងទៅកាន់អ្នកតំណាងរបស់ Mike Tyson ដើម្បីសុំការអត្ថាធិប្បាយជុំវិញការប្តឹងផ្តល់ខាងលើនេះ ប៉ុន្តែនៅមិនទាន់មានការឆ្លើយតបនៅឡើយទេ។
សូមជម្រាបថា Mike Tyson គឺជាអត្តពលិកម្នាក់ក្នុងចំណោមអត្តពលិកដទៃផ្សេងទៀត ដែលគួរឱ្យគោរពបំផុត នៅក្នុងសង្វៀនប្រដាល់ អំឡុងទសវត្សឆ្នាំ ១៩៨០ និង ១៩៩០ ។ ទោះជាយ៉ាងណាក៏ដោយ ជីវិតរបស់អតីតម្ចាស់ខ្សែក្រវាត់ប្រដាល់សកលទម្ងន់ធ្ងន់ពិភពលោករូបនេះ នៅខាងក្រៅសង្វៀន ជារឿយៗ តែងតែបង្ករឿងរ៉ាវចម្រូងចម្រាសជាច្រើន ដែលធ្វើឱ្យបាត់បង់ប្រជាប្រិយភាពរបស់ខ្លួន៕
ចែករំលែកព័តមាននេះ