ខេត្តសៀមរាប៖ ​លោកឧត្តមសេនីយ៍ត្រី អ៊ុំ អមរ៉ា ស្នងការរង​នគរបាល ទទួលផែនបទល្មើស​ប្រឆាំង​គ្រឿងញៀន នៃស្នងការដ្ឋាននគរបាល ខេត្តសៀមរាប បានប្រាប់​ថា បន្ទាប់ពីទទួល​បានដំណឹងសង្ស័យថា ទីតាំងមួយកន្លែង ដែលនាំចូលស្តុកទុក និងចែកចាយនូវប្រភេទ​បារីអេឡិចត្រូនិក ( ECigarette) និងអេចឈ៍ ធី ភី ដែលតែងហៅថា ​Hybrid​ លោកបានដឹកនាំកម្លាំង​នគរបាលការិយាល័យប្រឆាំងគ្រឿងញៀន បានចុះទៅដល់ទីតាំងភ្លាមៗ។

លោកបន្តថា ប្រតិបត្តិការនេះ សម្របសម្រួល​ដោយលោក យិន មុនីរិទ្ធ ព្រះរាជអាជ្ញារង​នៃអយ្យការ​អមសាលាដំបូងខេត្តសៀមរាប ចុះអនុវត្ត​វិធានការរដ្ឋបាលបង្ក្រាប​ទីតាំងមួយ​កន្លែងធ្វើអាជីវកម្ម បោះដុំ និងចែកចាយនូវប្រភេទបារីអេឡិចត្រូនិក ( ECigarette) និងអេចឈ៍ ធី ភី ដែលតែងហៅថា (Hybrid ) ស្ថិតនៅ​ភូមិវិហារចិន សង្កាត់ស្វាយដង្គំ ក្រុងសៀមរាប ខេត្តសៀមរាប កាលពីព្រឹកថ្ងៃទី២៦ ខែមករា ឆ្នាំ២០២៣ នេះ។

លោក​បាន​បញ្ជាក់ថា បន្ទាប់ពីចុះដល់ទីតាំងខាងលើ កម្លាំងនគរបាលជំនាញ យើងបានធ្វើការ​ដកហូតវត្ថុតាងជាក់ស្តែងមួយ​ចំនួន រួមមាន៖ កេសធំ ចំនួន ១៨កេស និងកេសតូច ចំនួន ៤៧ ​កេស​ផងដែរ។

លោក​បញ្ជាក់ទៀតថា ក្រោយពីចុះដកហូតវត្ថុតាង​រួចមក កម្លាំងជំនាញយើង បានធ្វើកិច្ចសន្យា លើកទី១ ចំពោះម្ចាស់ទីតាំង និងម្ចាស់អាជីវកម្ម ដើម្បីឱ្យបញ្ឈប់ធ្វើសកម្មភាព នាំចូល និងលក់​ចែកចាយចាប់ពីពេលនេះតទៅ​ទៀត​។ បច្ចុប្បន្ន កម្លាំងនគរបាលជំនាញ បានឱ្យម្ចាស់យើងធ្វើ​កិច្ចសន្យា លើកទី១ រឹបអូសយកមករក្សាទុកនៅស្នងការដ្ឋាន រង់ចាំដុតកំទេចចោល៕  ច័ន្ទ រស្មី