ក្រុមហ៊ុនចិនមួយត្រូវអាមេរិកដាក់ទណ្ឌកម្មរឿងលូកដៃក្នុងសង្គ្រាមនៅអ៊ុយក្រែន
សហរដ្ឋអាមេរិក ៖ សហរដ្ឋអាមេរិក បានដាក់ទណ្ឌកម្មលើក្រុមហ៊ុនចិនមួយ ដោយចោទប្រកាន់ថា
សហរដ្ឋអាមេរិក ៖ សហរដ្ឋអាមេរិក បានដាក់ទណ្ឌកម្មលើក្រុមហ៊ុនចិនមួយ ដោយចោទប្រកាន់ថា
សហរដ្ឋអាមេរិក ៖ សហរដ្ឋអាមេរិក បានដាក់ទណ្ឌកម្មលើក្រុមហ៊ុនចិនមួយ ដោយចោទប្រកាន់ថា បានផ្តល់រូបភាពផ្កាយរណបអំពីប្រទេសអ៊ុយក្រែន ដើម្បីគាំទ្រដល់ប្រតិបត្តិការប្រយុទ្ធរបស់ក្រុមទាហានស៊ីឈ្នួល ដែលមានឈ្មោះថា Wagner សម្រាប់ប្រទេសរុស្ស៊ី។ នេះបើយោងតាមប្រភពពីសារព័ត៌មាន BBC ដែលចេញផ្សាយនៅថ្ងៃទី២៧ ខែមករា ឆ្នាំ២០២៣។
វិទ្យាស្ថានស្រាវជ្រាវវិទ្យាសាស្ត្រ និងបច្ចេកវិទ្យាអវកាស Changsha Tianyi របស់ចិន ស្ថិតក្នុងចំណោមអង្គភាពចំនួន១៦ ដែលរងការទប់ស្កាត់ដោយនាយកដ្ឋានរតនាគារសហរដ្ឋអាមេរិក។ ក្រុមហ៊ុននេះ ត្រូវបានគេស្គាល់ថា Spacety China ដែលមានការិយាល័យនៅទីក្រុងប៉េកាំង និងប្រទេសលុចហ្សំបួរ។
ការិយាល័យគ្រប់គ្រងទ្រព្យសកម្មបរទេស ក្រសួងរតនាគារសហរដ្ឋអាមេរិក បានលើកឡើងក្នុងសេចក្តីថ្លែងការណ៍មួយ កាលពីថ្ងៃទី២៦ ខែមករា ថា Spacety China បានផ្តល់ឱ្យក្រុមហ៊ុនបច្ចេកវិទ្យា Terra Tech ដែលមានមូលដ្ឋានក្នុងប្រទេសរុស្ស៊ី ជាមួយរូបភាពពីផ្កាយរណប Synthetic Aperture (SAR) អំពីទីតាំងនៅអ៊ុយក្រែន។ ដោយសេចក្តីថ្លែងការណ៍បានបញ្ជាក់ថា «រូបភាពទាំងនេះ ត្រូវបានប្រមូលផ្តុំ ដើម្បីបើកប្រតិបត្តិការប្រយុទ្ធរបស់ Wagner នៅក្នុងប្រទេសអ៊ុយក្រែន»។
បន្ថែមពីនេះ នាយកដ្ឋានក៏បានដាក់ទណ្ឌកម្មលើក្រុមហ៊ុនបុត្រសម្ព័ន្ធ ដែលមានមូលដ្ឋាននៅប្រទេសលុចហ្សំបួររបស់ Spacety China នៅក្រោមការដាក់ទណ្ឌកម្ម មិនអាចមានការផ្ទេរ ការបង់ប្រាក់ ឬការនាំចេញទ្រព្យសម្បត្តិ ឬផលប្រយោជន៍ណាមួយនៅក្នុងសហរដ្ឋអាមេរិក ទៅកាន់អង្គភាពគោលដៅ ហើយពាក់ព័ន្ធជុំវិញបញ្ហានេះ Spacety China មិនទាន់មានការឆ្លើយតប ចំពោះទង្វើនេះ នៅឡើយទេ។ នេះបើយោងតាមរបាយការណ៍ BBC បានចេញផ្សាយ។
នៅលើគេហទំព័ររបស់ខ្លួន Spacety China បានពិពណ៌នាខ្លួនឯងថា ជាអ្នកត្រួសត្រាយផ្លូវក្នុងការផ្តល់បច្ចេកវិទ្យាផ្កាយរណបពាណិជ្ជកម្ម ហើយចង់ផ្តល់រូបភាពគ្រប់ចំណុចនៅលើផែនដីជាមួយតម្លៃសមរម្យ ដល់អ្នកប្រើប្រាស់ទូទាំងពិភពលោក ខណៈដែល SAR គឺជាប្រភេទបច្ចេកវិទ្យារ៉ាដា ដែលអាចផ្តល់រូបភាព មានភាពច្បាស់ខ្ពស់ ដោយប្រើអង់តែនខ្លី។
សូមជម្រាបថា ប្រទេសចិន ដែលជាសម្ព័ន្ធមិត្តជិតស្និទ្ធរបស់រុស្ស៊ី បានព្យាយាមដាក់ខ្លួនជាភាគីអព្យាក្រឹត ទាក់ទងនឹងសង្គ្រាមនៅអ៊ុយក្រែន។ ប៉ុន្តែប្រទេសយក្សនៅអាស៊ីមួយនេះ ទទួលរងការរិះគន់ដោយសហរដ្ឋអាមេរិក និងសម្ព័ន្ធមិត្ត ចំពោះការបដិសេធមិនថ្កោលទោសការឈ្លានពានរបស់រុស្ស៊ីលើអ៊ុយក្រែន ដែលមានរយៈពេលជិត១ឆ្នាំហើយ ចាប់តាំងពីការចាប់ផ្តើមដំបូង កាលពីចុងខែកុម្ភៈ ឆ្នាំ២០២២ កន្លងទៅ៕
ចែករំលែកព័តមាននេះ