សង្គ្រាមអ៊ុយក្រែន ៖ ប្រធានាធិបតីអាមេរិកលោកដូណាល់ត្រាំថ្លែងនាថ្ងៃទី១២ឧសភាថា លោកអាចទៅកាន់តួកគីនាថ្ងៃទី១៥ឧសភាសម្រាប់ការចរចាគ្នាជាយថាហេតុរវាងរុស្សុីនិងអ៊ុយក្រែន ដែលលោកយល់ថានឹងជាការចរចាដ៏មានប្រយោជន៍។
មុនពេលចេញដំណើរមកបំពេញទស្សនកិច្ចនៅមជ្ឈឹមបូព៌៌ា ដែលនឹងនាំលោកមកកាន់អារ៉ាប៊ីសាអូឌីត កាតានិងអេមីរ៉ាត់អារ៉ាប់រួម លោកត្រាំអះអាងទៅកាន់ក្រុមអ្នកកាសែតនៅសេតវិមានថា ខ្ញុំគ្រោងជិះយន្តហោះទៅកាន់តួកគី។ ខ្ញុំសន្មត់ថាមានលទ្ធភាពដែលអ្វីមួយអាចកើតមាន។
ក្នុងសង្កថាមួយទៅកាន់សារព័ត៌មានកាលពីថ្ងៃទី១១ឧសភា ប្រធានាធិបតីរុស្សុីលោកវ្ល៉ាឌីមៀរពូទីនបានស្នើដល់អ៊ុយក្រែន ឲ្យធ្វើការចរចាដោយផ្ទាល់ឡើងវិញនៅទីក្រុងអីុស្តង់ប៊ុលប្រទេសតួកគីនាថ្ងៃទី១៥ឧសភា។ លោកពូទីនថ្លែងថា យើងអំពាវនាវដល់ក្រុងគៀវឲ្យបើកធ្វើឡើងវិញការចរចាដោយផ្ទាល់ ដែលកាត់ផ្ដាច់កាលពីឆ្នាំ២០២២។ យើងស្នើចាប់ផ្ដើមចាប់ពីថ្ងៃទី១៥ឧសភាទៅ ការចរចាដោយផ្ទាល់នៅក្រុងអីុស្តង់ប៊ុល។ ប្រមុខវិមានក្រឹមឡាំងទាមទារថា ការចរចានោះធ្វើដោយគ្មានលក្ខខណ្ឌជាមុន។ លោកបន្តថារុស្សុីត្រៀមចរចាដោយគ្មានលក្ខខណ្ឌជាមុន ដោយលោកបញ្ជាក់ថាលោកនឹងជួបពិភាក្សានាបណ្ដាម៉ោងខាងមុខជាមួយប្រធានាធិបតីតួកគីលោករីសីុបតៃយីបអ័រដូហ្គាន។
ប្រធានាធិបតីរុស្សុីក៏ថ្លែងដែរថា ការចរចានោះត្រូវផ្ដោតលើមូលហេតុសីុជម្រៅនៃជម្លោះដែលកំពុងបន្ត ចាប់តាំងពីជាង៣ឆ្នាំមកហើយតែលោកមិនបដិសេធឡើយដែលការចរចានោះអាចឈានទៅបង្កើតបទឈប់បាញ់គ្នាថ្មីមួយ។ ទោះបីជាធ្វើសំណើនោះតែលោកពូទីនមិនឆ្លើយតបឱសានវាទរបស់បណ្ដាមេដឹកនាំអឺរ៉ុបនិងអ៊ុយក្រែន នាពេលមុននេះដែលជម្រុញឲ្យរុស្សុីព្រមទទួលយកបទឈប់បាញ់គ្នាពេញលេញនិងគ្មានលក្ខខណ្ឌរយៈពេល៣០ថ្ងៃមួយចាប់ពីថ្ងៃទី១២ឧសភាទៅ។ នៅក្រុងគៀវអមដោយអធិការបតីថ្មីអាល្លឺម៉ង់ នាយករដ្ឋមន្ត្រីអង់គ្លេសនិងនាយករដ្ឋមន្ត្រីប៉ូឡូញ ប្រធានាធិបតីបារាំងលោកអេមម៉ានុយអែលម៉ាក្រុងថ្លែងថា បើរុស្សុីបដិសេធបទឈប់បាញ់គ្នានេះ ឬទទួលយកតែរំលោភបំពានយើងបានស្រុះស្រួលគ្នាថា ទណ្ឌកម្មដ៏ធំនានានឹងត្រូវរៀបចំដោយសហការគ្នារវាងអឺរ៉ុបនិងអាមេរិក។
ដោយអំពាវនាវដល់ក្រុងមូស្គូឲ្យទទួលយកបទឈប់បាញ់គ្នានោះ ប្រធានាធិបតីអ៊ុយក្រែនលោកវ៉ូឡូឌីមៀរហ្សេឡេនស្គីអះអាងថា លោកនឹងរង់ចាំលោកពូទីននាថ្ងៃទី១៥ឧសភានៅតួកគី តែលោកពូទីនមិនបានឆ្លើយតបនៅឡើយ។ លោកត្រាំថ្លែងថាខ្ញុំគិតថាកិច្ចប្រជុំនាថ្ងៃទី១៥ឧសភានៅតួកគីរវាងរុស្សុីនិងអ៊ុយក្រែន អាចសម្រេចបានលទ្ធផលល្អមួយដែលមេដឹកនាំទាំង២ត្រូវតែមានវត្តមាន៕
ចែករំលែកព័តមាននេះ