បរទេស ៖ យោងតាមប្រភពពីសារព័ត៌មាន BBC នៅថ្ងៃទី១៣ ខែឧសភា ឆ្នាំ២០២៥ បានរាយការណ៍ថា ទីភ្នាក់ងារអាកាសចរណ៍អង្គការសហប្រជាជាតិបានសម្រេចហើយថា ប្រទេសរុស្ស៊ីគឺជាអ្នកទទួលខុសត្រូវចំពោះការធ្លាក់យន្តហោះម៉ាឡេស៊ី…
បរទេស ៖ យោងតាមប្រភពពីសារព័ត៌មាន BBC នៅថ្ងៃទី១៣ ខែឧសភា ឆ្នាំ២០២៥ បានរាយការណ៍ថា ទីភ្នាក់ងារអាកាសចរណ៍អង្គការសហប្រជាជាតិបានសម្រេចហើយថា ប្រទេសរុស្ស៊ីគឺជាអ្នកទទួលខុសត្រូវចំពោះការធ្លាក់យន្តហោះម៉ាឡេស៊ី MH17 នៅភាគខាងកើតប្រទេសអ៊ុយក្រែន កាលពីខែកក្កដា ឆ្នាំ២០១៤។
មនុស្សទាំងអស់ចំនួន២៩៨នាក់ នៅលើយន្តហោះដឹកអ្នកដំណើររបស់ប្រទេសម៉ាឡេស៊ី MH17 បានស្លាប់បាត់បង់ជីវិត ដោយការបាញ់ទម្លាក់ពីគ្រាប់មីស៊ីល Buk ផលិតដោយប្រទេសរុស្ស៊ី ប៉ុន្តែភាគីរុស្ស៊ីតែងតែបដិសេធរាល់ការទទួលខុសត្រូវចំពោះសោកនាដកម្មធ្លាក់យន្តហោះ MH17។
ទោះយ៉ាងណាក៏ដោយ កាលពីថ្ងៃទី១២ ខែឧសភា ឆ្នាំ២០២៤ ក្រុមប្រឹក្សាអង្គការសហប្រជាជាតិ នៃអង្គការអាកាសចរណ៍ស៊ីវិលអន្តរជាតិ (ICAO) បានបោះឆ្នោតសម្រេចថា សហព័ន្ធរុស្ស៊ីបានបរាជ័យក្នុងការរក្សាកាតព្វកិច្ចខ្លួនក្រោមច្បាប់អាកាសអន្តរជាតិ ដែលតម្រូវឱ្យរដ្ឋនានាបដិសេធមិនប្រើអាវុធប្រឆាំងនឹងយន្តហោះស៊ីវិលក្នុងពេលហោះហើរ។
គួររំលឹកថា នៅថ្ងៃទី១៧ ខែកក្កដា ឆ្នាំ២០១៤ យន្តហោះដឹកអ្នកដំណើរ MH17 របស់ក្រុមហ៊ុនអាកាសចរណ៍ Malaysia Airlines កំពុងតែធ្វើដំណើរចេញពីទីក្រុងអាំស្ទែដាំ ប្រទេសហូឡង់ទៅកាន់ទីក្រុងគូឡាឡាំពួ ប្រទេសម៉ាឡេស៊ី ប៉ុន្តែបានធ្លាក់នៅតំបន់ដុនបាស ប្រទេសអ៊ុយក្រែន អំឡុងពេលមានជម្លោះរវាងក្រុមឧទ្ទាមគាំទ្រដោយរុស្ស៊ី និងកងកម្លាំងអ៊ុយក្រែន ដោយបានសម្លាប់អ្នកដំណើរ និងនាវិកនៅលើយន្តហោះសរុបចំនួន ២៩៨នាក់។ អ្នកដំណើរ និងនាវិកភាគច្រើន ១៩៦នាក់មកពីប្រទេសហូឡង់ ក្នុងនោះក៏មាន៣៨នាក់មកពីអូស្ត្រាលី ពលរដ្ឋអង់គ្លេស១០នាក់ ព្រមទាំងពលរដ្ឋបែលហ្ស៊ិក និងម៉ាឡេស៊ីផងដែរ។
នៅក្នុងឆ្នាំ២០២២ តុលាការរបស់ប្រទេសហូឡង់បានសម្រេចថា ក្រុមមនុស្សស្ថិតក្រោមគ្រប់គ្រងដោយរុស្ស៊ីបានបាញ់ទម្លាក់យន្តហោះ MH17 ហើយជនជាតិរុស្ស៊ីពីរនាក់ និងជនជាតិអ៊ុយក្រែនម្នាក់ដែលជាអ្នកគាំទ្ររុស្ស៊ី ត្រូវបានកាត់ទោសឱ្យជាប់ពន្ធនាគារអស់មួយជីវិតពីបទឃាតកម្មដោយកំបាំងមុខ។ ប៉ុន្តែទោះជាយ៉ាងណាក៏ដោយ រុស្ស៉ីបានចាត់ទុកសាលក្រមរបស់តុលាការហូឡង់ជារឿងដ៏គួរអាម៉ាស់ ហើយថានឹងមិនធ្វើបត្យាប័នពលរដ្ឋខ្លួនជាដាច់ខាត។
យ៉ាងណាមិញ សេចក្តីសម្រេចកាលពីថ្ងៃទី១២ ខែឧសភា ឆ្នាំ២០២៥ របស់ក្រុមប្រឹក្សាអង្គការសហប្រជាជាតិ នៃអង្គការអាកាសចរណ៍ស៊ីវិលអន្តរជាតិ (ICAO) លើសំណុំរឿងដែលបានឡើងដល់តុលារការកំពូលអង្គការសហប្រជាជាតិនៅក្នុងឆ្នាំ២០២២មួយនេះ ទទួលបានការសាទរយ៉ាងពេញទំហឹងពីសំណាក់រដ្ឋាភិបាលអូស្ត្រាលី និងហូឡង់។
ជាក់ស្តែង រដ្ឋមន្ត្រីក្រសួងការបរទេសអូស្ត្រាលី លោកស្រី Penny Wong បានថ្លែងនៅក្នុងសេចក្តីថ្លែងការណ៍មួយថា «យើងសូមអំពាវនាវដល់ប្រទេសរុស្ស៊ីឱ្យប្រឈមមុខនឹងការទទួលខុសត្រូវរបស់ខ្លួន ចំពោះអំពើហឹង្សាដ៏អាក្រក់នេះ និងផ្តល់សំណងសម្រាប់ការប្រព្រឹត្តដ៏អាក្រក់របស់ខ្លួន»។ ស្របពេលរដ្ឋមន្ត្រីក្រសួងការបរទេសហូឡង់ Caspar Veldkamp ក៏បានលើកឡើងផងដែរថា «ខ្ញុំបានសម្គាល់ពីជំហានដ៏សំខាន់មួយឆ្ពោះទៅរកការពិត និងការសម្រេចបាននូវយុត្តិធម៌ និងគណនេយ្យភាព។ រដ្ឋមួយមិនអាចបំពានច្បាប់អន្តរជាតិបានឡើយ»៕ ប្រភព ៖ BBC
ចែករំលែកព័តមាននេះ