រាជធានីភ្នំពេញ ៖ អាកាសយានដ្ឋានអន្តរជាតិភ្នំពេញ គឺជាអាកាសយានដ្ឋានធំបំផុត និងសំខាន់បំផុតក្នុងវិស័យដឹកជញ្ជូនតាមផ្លូវអាកាសរបស់កម្ពុជា ដែលនឹងបិទដំណើរការទាំងស្រុងនៅដើមខែកក្កដា ឆ្នាំ២០២៥ បន្ទាប់ពីលេចរូបរាងឡើងនូវអាកាសយានដ្ឋានអន្តរជាតិតេជោ ស្ថិតនៅស្រុកកណ្តាលស្ទឹង ខេត្តកណ្តាល…
រាជធានីភ្នំពេញ ៖ អាកាសយានដ្ឋានអន្តរជាតិភ្នំពេញ គឺជាអាកាសយានដ្ឋានធំបំផុត និងសំខាន់បំផុតក្នុងវិស័យដឹកជញ្ជូនតាមផ្លូវអាកាសរបស់កម្ពុជា ដែលនឹងបិទដំណើរការទាំងស្រុងនៅដើមខែកក្កដា ឆ្នាំ២០២៥ បន្ទាប់ពីលេចរូបរាងឡើងនូវអាកាសយានដ្ឋានអន្តរជាតិតេជោ ស្ថិតនៅស្រុកកណ្តាលស្ទឹង ខេត្តកណ្តាល ចម្ងាយប្រមាណ២០គីឡូម៉ែត្រភាគខាងត្បូងនៃរាជធានីភ្នំពេញដំណើរការស្ថាពរ ។ នេះបើតាមអ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិលឯកឧត្តម ស៊ីន ចាន់សិរីវុត្ថា ។
ថ្លែងប្រាក់សារព័ត៌មានក្នុងស្រុកមួយឯកឧត្តម ស៊ីន ចាន់សិរីវុត្ថា បានលើកឡើងថា បើគ្មានការប្រែប្រួល ព្រលានយន្តហោះពោធិ៍ចិនតុង នឹងបិទដំណើរការនៅយប់ថ្ងៃ៩ចូល១០កក្កដា។
ឯកឧត្តមបានបញ្ជាក់ថា «គ្មានការប្រែប្រួលណាមួយកើតឡើងទេ ព្រលានយន្តហោះពោធិ៍ចិនតុង ឬអាកាសយានដ្ឋានអន្តរជាតិភ្នំពេញ នឹងបិទលែងឲ្យដំណើរការនៅវេលាម៉ោង០០៖០០នាទីរំលងអធ្រាត្រថ្ងៃ៩ ឈានចូលថ្ងៃ១០ កក្កដាខាងមុខ ហើយ»។
ឯកឧត្តមបានលើកឡើងថា នៅថ្ងៃទី១០ ខែកក្កដា ឆ្នាំ២០២៥ខាងមុខ គឺជាថ្ងៃគោលដៅដែលភាគីពាក់ព័ន្ធបានគ្រោងទុកក្នុងការដាក់ឱ្យប្រតិបត្តិការអាកាសយានដ្ឋានអន្តរជាតិតេជោ (TIA/ KTI) ស្ថិតនៅខេត្តកណ្តាលជាប់ព្រំប្រទល់រាជធានីភ្នំពេញ ក្នុងលក្ខខណ្ឌប្រសិនបើគ្មានអ្វីប្រែប្រួលទេនោះ តែអ្វីៗគឺអាស្រ័យទៅលើលទ្ធផលនៃការពិនិត្យវាយតម្លៃ និងសាវនកម្មលើកទី២ដែលនឹងប្រព្រឹត្តទៅមុនបំណាច់ខែឧសភាឆ្នាំ២០២៥នេះ ។
ឯកឧត្តមបានលើកឡើងទៀតថា ដូចអ្វីដែលបានរៀបរាប់ខាងលើបើគ្មានការប្រែប្រួល ព្រលានយន្តហោះពោធិ៍ចិនតុង នឹងបិទដំណើរការនៅម៉ោង០០:00យប់រំលងអធ្រាត្រថ្ងៃទី៩ ឈានចូលថ្ងៃទី១០ ខែកក្កដា ២០២៥ ហើយប្រតិបត្តិការទាំងអស់ នឹងត្រូវរុះរើទាំងស្រុងទៅកាន់ព្រលានយន្តហោះអន្តរជាតិតេជោតាមការគ្រោងទុក។
ឯកឧត្តមថា ជាមួយគ្នានេះ ជើងហោះហើរចុងក្រោយគេបង្អស់ជាប្រវត្តិសាស្ត្រ មុននឹងបិទដំណើរការព្រលានយន្តហោះពោធិ៍ចិនតុងគឺជាជើងហោះហើរ Korean Air។
ជាមួយគ្នានោះដែរឯកឧត្តម ស៊ីន ចាន់សិរីវុត្ថាក៏បាន គូសបញ្ជាក់ថា៖ «អីចឹងអ្វីៗខ្ញុំតែងតែនិយាយថា បើសិនគ្មានអ្វីប្រែប្រួលទេនេះទី១ ។ ទី២ បើយកថ្ងៃ១០កើតឡើងមែន គឺយើងយកថ្ងៃ៩ (កក្កដា)ម៉ោង០០ឈានចូលថ្ងៃ១០ហ្នឹងគឺជាថ្ងៃកំណត់បិទព្រលានចាស់ ចូលព្រលានថ្មី ប៉ុន្តែអ្វីៗរងចាំចម្លើយរហូតដល់បំណាច់ខែប្រាំនេះសិន»។
សូមបញ្ជាក់ថា អាកាសយាន្តដ្ឋានអន្តរជាតិពោធិ៍ចិនតុង ចាប់ផ្តើមកសាងជាលើកដំបូងដោយប្រទេសបារាំងនៅឆ្នាំ១៩៥៧ រួចធ្វើពិធីសម្ពោធនៅថ្ងៃទី១៩ ខែមករា ឆ្នាំ១៩៥៩ ។ ប៉ុន្តែ ដើម្បីឆ្លើយតបនឹងកំណើនចំនួនអ្នកធ្វើដំណើរ អាកាសយាន្តដ្ឋានត្រូវបានបើកការដ្ឋានរុះរើសាងសង់ជាថ្មីឡើងវិញនៅឆ្នាំ១៩៩៥ ដោយក្រុមហ៊ុន SCAរបស់បារាំង ។ អាកាសយានដ្ឋានដែលត្រូវបានសាងសង់រួចរាល់ជាស្ថាពរនៅឆ្នាំ២០០២ មានលទ្ធភាពទទួលអ្នកដំណើរបាន៥លាននាក់ក្នុង១ឆ្នាំៗ។ អាកាសយានដ្ឋានអន្តរជាតិពោធិ៍ចិនតុង ត្រូវបានប្តូរឈ្មោះទៅជាអាកាសយានដ្ឋានអន្តរជាតិភ្នំពេញនៅថ្ងៃទី១៥ ខែមករា ឆ្នាំ២០០៣៕
ចែករំលែកព័តមាននេះ