ខេត្តបាត់ដំបង ៖ ជនសង្ស័យចំនួន០៣នាក់ ដែលសកម្មបំផុតក្នុងការ «លួចម៉ូតូ» ហើយជនខ្លះមានប្រវត្តិធ្លាប់ជាប់គុកទៀតផង ពេលនេះ ត្រូវបានសមត្ថកិច្ចឃាត់ខ្លួនពាក់ព័ន្ធនឹងអំពើ«ចោរកម្ម»ដដែល ហើយត្រូវកសាងសំណុំរឿងបញ្ជូនទៅតុលាការជាថ្មី នៅព្រឹកថ្ងៃទី១២…
ខេត្តបាត់ដំបង ៖ ជនសង្ស័យចំនួន០៣នាក់ ដែលសកម្មបំផុតក្នុងការ «លួចម៉ូតូ» ហើយជនខ្លះមានប្រវត្តិធ្លាប់ជាប់គុកទៀតផង ពេលនេះ ត្រូវបានសមត្ថកិច្ចឃាត់ខ្លួនពាក់ព័ន្ធនឹងអំពើ«ចោរកម្ម»ដដែល ហើយត្រូវកសាងសំណុំរឿងបញ្ជូនទៅតុលាការជាថ្មី នៅព្រឹកថ្ងៃទី១២ ឧសភា ក្រោយបញ្ចប់ការសួរនាំ ។ នេះបើតាមមន្ត្រីការិយាល័យជំនាញបានរាយការណ៍ ។
តាមរយៈរបាយការណ៍ លោក ចៀក ថានិន នាយការិយាល័យព្រហ្មទណ្ឌកំរិតស្រាលនៃស្នងការខេត្តបានឲ្យដឹងថា ជនសង្ស័យទាំង០៣នាក់ រួមមាន៖ ១-ឈ្មោះ រុំ ភីរក្ស ហៅ ង៉ា អាយុ៣៣ឆ្នាំ (ធ្លាប់ជាប់គុក) ស្នាក់នៅមិនពិតប្រាកដ ២-ឈ្មោះ ភឹម ឌីណា អាយុ៣៩ឆ្នាំ និង៣-ឈ្មោះ យិន សារ៉ាវុធ អាយុ៤៩ឆ្នាំ ទាំង០២នាក់ នៅភូមិរណចេក២ សង្កាត់រតនៈ ក្រុងបាត់ដំបង ។
លោក ចៀក ថានិន បានប្រាប់ថា ក្រុមនេះ ត្រូវបានកម្លាំងជំនាញនៃការិយាល័យព្រហ្មទណ្ឌកំរិតស្រាលក្រោមការដឹកនាំ និងបញ្ជាផ្ទាល់ពីលោក ឈឿង គឹមសុង ស្នងការរង
ទទួលផែនព្រហ្មទណ្ឌ និងលោក ដាញ់ អេងប៊ុនចាន់ ស្នងការខេត្តធ្វើការស្រាវជ្រាវរហូតឃាត់ខ្លួនបានជាបន្តបន្ទាប់ កាលពីព្រឹកថ្ងៃទី១១ ឧសភា ពេលដែលពួកគេសម្ងំលាក់ខ្លួននៅក្នុងផ្ទះសំណាក់មួយកន្លែងឈ្មោះ «ដាវីន» នៅខាងជើងរង្វង់មូល«ព្រះនរាយ» ក្នុងសង្កាត់ចំការសំរោង ក្រុងបាតដំបង ក្រោយពួកគេបានធ្វើសកម្មភាព«លួចម៉ូតូ»មួយគ្រឿងនៅស្រុករតនមណ្ឌល កាលពីចុងខែមេសាកន្លងទៅថ្មីៗនេះ ។
នៅក្នុងរបាយការណ៍ដដែល ក្រុមជនសង្ស័យទាំង០៣នាក់នេះ បានធ្វើសកម្មភាព
«លួចយកម៉ូតូ» មួយគ្រឿង កាលពីថ្ងៃទី២៩ មេសា កន្លងទៅនេះ នៅចំណុចភូមិតាគ្រក់ ឃុំត្រែង ស្រុករតនមណ្ឌល របស់ជនរងគ្រោះឈ្មោះ ហួន សុខហៃ ភេទប្រុសអាយុ១៧ឆ្នាំ ។ ក្រោយធ្វើសកម្មភាពលួចបានចម្រេច ក្រុមចោរដ៏សកម្មនេះ បានព្យាយាមជិះគេចខ្លួន មកពួនសំងំជួលបន្ទប់ស្នាក់នៅក្នុងផ្ទះសំណាក់ខាងលើ ។ ប៉ុន្តែត្រូវកម្លាំងជំនាញ ការិយាល័យព្រហ្មទណ្ឌកំរិតស្រាល ធ្វើការកំណត់មុខសញ្ញាបាន ទើបឈានដល់ការឃាត់ខ្លួនបានទាំងសំបុកតែម្ដង ។
ស្ដាប់ចម្លើយសង្ខេបរបស់លោកចោរ ដែលសារភាពពីប្រវត្តិប្រព្រឹត្តបទល្មើស៖ ក្រោយពេលត្រូវចាប់ខ្លួន ក្រុមចោរដ៏សកម្មទាំង០៣នាក់នេះ បានសារភាពនៅចំពោះមុខមន្ត្រីជំនាញថា ពួកខ្លួនធ្លាប់មានប្រវត្តិ«លួចយកម៉ូតូ» គេបានសរុបចំនួន០៧គ្រឿង រាប់ទាំងលួចលើកចុងក្រោយនៅស្រុករតនមណ្ឌលផង ។
តាមរយៈរបាយការណ៍សមត្ថកិច្ច ដែលបានស្រង់ចម្លើយក្រុមជនសង្ស័យ ពួកគេបាននិយាយទៀតថា ពួកគេធ្លាប់ជិះម៉ូតូដើរធ្វើសកម្មភាព«លួច»នៅតាមបណ្ដាស្រុកចំនួន០៤។
របាយការណ៍បានបញ្ជាក់ថា លើកទី១នៅស្រុកឯកភ្នំ (មិនចាំថ្ងៃខែ) ធ្លាប់លួចយកបានម៉ូតូម៉ាកឃ្លីក ពណ៌.ស ០១គ្រឿង។ លើកទី២-នៅស្រុកថ្មគោល (មិនចាំថ្ងៃខែ) ធ្លាប់លួចយកបានម៉ូតូម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០២០ ចំនួន០១គ្រឿង។ ដោយឡែក លើកទី៣-នៅស្រុកសង្កែ (មិនចាំថ្ងៃខែ) ក្រុមចោរនេះហាក់មមាញឹកច្រើនជាងតាមបណ្ដាស្រុកដទៃទៀត គឺក្រុមចោរដ៏សកម្មនេះ មានឱកាសលួចបានរហូតដល់ទៅចំនួន០៣លើក លួចបានម៉ូតូរហូតដល់ទៅចំនួន០៤គ្រឿង។
ក្នុងនោះ មានម៉ូតូម៉ាកវ៉េវ អាល់ហ្វាពណ៏ខ្មៅ០១គ្រឿង ម៉ាកឃ្លីកពណ៌ក្រហម ០១គ្រឿង រីឯចំនួន០២គ្រឿងទៀត ចាស់ៗពេលមិនស្គាល់ម៉ាក ។ បានន័យថា ក្រុមចោរ០៣នាក់នេះ លួចមិនរើសម៉ូត ម៉ាកចាស់ឬថ្មីទេ ប្រទះអ្វីលួចហ្មឹង ។
ចំពោះលើកទី៤ គឺជាលើកចុងក្រោយ មុនពេលត្រូវសមត្ថកិច្ច ត្រូវសមត្ថកិច្ចក្របួចអូស.ក ចេញពីផ្ទះសំណាក់ ក្រុមនេះ បានធ្វើសកម្មភាពលួចយកម៉ូតូគេ នៅថ្ងៃទី២៩ មេសា ឆ្នាំ២០២៥ នៅចំណុចភូមិតាគ្រក់ ស្រុករតនមណ្ឌល បាន០១គ្រឿងម៉ាក ហុងដាឌ្រីម សេ១២៥ ពណ៏ក្រហម ស៊េរីឆ្នាំ២០២០ ។
ជុំវិញករណីនេះ ស្នងការរងទទួលផែនព្រហ្មទណ្ឌ លោក ឈឿង គឹមសុង បានប្រាប់ថា ជាមួយនឹងការឃាត់ខ្លួនជនសង្ស័យទាំង០៣នាក់នេះ មន្ត្រីការិយាល័យជំនាញ ដកហូតបានវត្ថុតាងរួមមាន៖ ម៉ូតូម៉ាកហុងដាឌ្រីមពណ៏ក្រហម០១គ្រឿងជារបស់ជនរងគ្រោះ និង ម៉ូតូម៉ាកម៉ាយម៉ាហា អ៊ីសិនទ័រ ស៊េរីចាស់០១គ្រឿងជាមធ្យោបាយ ដែលក្រុមនេះជិះធ្វើសកម្មភាព ។
លោកស្នងការរងបានបញ្ជាក់ពីប្រវត្តិក្រុមចោរនេះថា ក្នុងចំណោមពួកគេទាំង០៣នាក់ មានម្នាក់ឈ្មោះ រុំ ភីរក្ស ហៅង៉ា ធ្លាប់ជាប់គុកម្ដងហើយ ពីបទ«លួចម៉ូតូ» តែជននេះមិនរាងចាល ចេញពីគុកមកប្រព្រឹត្តបទល្មើសដដែលទៀត ពេលនេះត្រូវចាប់ខ្លួនជាមួយបក្សពួក បញ្ជូនទៅចូលគុកវិញជាថ្មីទៀត ។
យ៉ាងណាក្ដី បើតាមលោកឈឿង គឹមសុង បានបញ្ជាក់ថា ម៉ូតូដែលដកហូតបានពីក្រុមជនសង្ស័យ ដោយយោងលើគោលការណ៍លោកស្នងការ និងលោកព្រះរាជអាជ្ញាអមសាលាដំបូងខេត្ត មន្ត្រីជំនាញបានប្រគល់ជូនជនរងគ្រោះវិញហើយ ។
ដោយឡែក ពាក់ព័ន្ធនឹងអ្នកទទួលផលចោរកម្ម (អ្នកទទូលទិញម៉ូតូពីជនសង្ស័យ) គឺជននោះបានរត់គេចខ្លួនបាត់ពីមូលដ្ឋាន តែយើងកំណត់អត្តសញ្ញាណបានហើយ។ បើតាមការស៊ើបអង្កេត អ្នកទទូលផលចោរកម្មនេះ មិនត្រិមតែទទូលទិញផលចោរកម្មប៉ុណ្ណោះទេ ជននេះ ថែមទាំងជាមុខសញ្ញាជូញដូរគ្រឿងញៀនទៀតផង ។ ពេលនេះ មន្ត្រីជំនាញបាននិងកំពុងធ្វើការស្រាវជ្រាវនៅឡើយ ដើម្បីតាមចាប់ខ្លួន៕
ចែករំលែកព័តមាននេះ