ខេត្ត​តាកែវ៖ ស្នងការ​ដ្ឋាន​នគរបាល ខេត្ត​តាកែវ មាន​លោក​​ឧត្តម​​សេនីយ៍​​ទោ ឈាង ផាន់​ណារ៉ា ជា​​ស្នង​ការ​​។ ចំណែក​ស្នងការរង​នៃស្នងការដ្ឋាននគរបាល ខេត្តតាកែវ មកដល់ពេលនេះ មានចំនួន​សរុប ៣២នាក់។ ក្នុងនោះ ស្នងការរង​ ៦នាក់ ទើបតែត្រូវបានតែងតាំង និងប្រកាសចូលកាន់​តំណែង កាលពីថ្ងៃទី២៥ ខែមករា ឆ្នាំ២០២៣​។

​កិច្ចប្រជុំបូកសរុបសភាពការណ៍ និងលទ្ធផលកិច្ចសហប្រតិបត្តិការ រក្សាសន្តិសុខ សណ្តាប់ធ្នាប់​សង្គម ប្រចាំឆ្នាំ២០២២ និងលើកទិសដៅការងារអនុវត្តបន្ត ឆ្នាំ២០២៣ រួមទាំង​ការប្រកាសផ្ទេរ​ភារកិច្ច-តែងតាំងមុខតំណែង ជូនមន្រ្តីនគរបាលជាតិ ​នៃស្នងការដ្ឋាននគរបាល ខេត្តតាកែវ ត្រូវបាន​ធ្វើឡើង កាលពីថ្ងៃទី២៥ ខែមករា ឆ្នាំ២០២៣​។

ក្រៅពី​ការប្រកាស​តែងតាំងស្នងការរង ៦នាក់ នៅស្នងការដ្ឋាននគរបាល ខេត្តតាកែវ ក៏មានការផ្ទេរភារកិច្ច តែងតាំងមុខតំណែងដល់​នគរបាល នៃស្នងការដ្ឋាននគរបាល ខេត្តតាកែវ រួមមាន​៖ ប្រកាសមុខតំណែង ចំនួន ១៣៣នាក់ ស្រីចំនួន ១០នាក់។ ថ្នាក់ស្នងការរង ចំនួន ០៦នាក់។ ថ្នាក់នាយការិយាល័យ ចំនួន ០៤នាក់។ ថ្នាក់នាយរងការិយាល័យចំនួន ១២នាក់។ ថ្នាក់អធិការរង ចំនួន ១៦នាក់។ ថ្នាក់នាយផ្នែក ចំនួន ២២នាក់។ ថ្នាក់នាយរងផ្នែកចំនួន ៥១នាក់។ ថ្នាក់នាយប៉ុស្តិ៍ ចំនួន ០៧នាក់។ ថ្នាក់នាយរងប៉ុស្តិ៍ ចំនួន ១៥នាក់។

លោកឧត្តមសេនីយ៍ទោ  ឈាង ផាន់ណារ៉ា ស្នងការ ​បានណែនាំដល់​មន្ត្រីប៉ូលិស បន្ត​ខិតខំប្រឹងប្រែង ការពារ ថែរក្សាសន្តិសុខ សណ្តាប់ធ្នាប់សង្គម សុវត្ថិភាពឱ្យ​បានល្អប្រសើរ ជូនប្រជាពលរដ្ឋ ក្នុងមូលដ្ឋានខេត្ត និងបន្ត​អនុវត្តឲ្យបានសកម្មនូវគោលនយោបាយភូមិឃុំ មានសុវត្ថិភាព ដើម្បីកាត់បន្ថយបទល្មើសគ្រប់ប្រភេទ ពង្រឹងលើការងារជំនាញប្រចាំ​ថ្ងៃគ្រប់​បណ្តា​អង្គភាព ក៏ដូចជា ផែនទាំង១៣ ផ្តល់សេវាសាធារណៈជូនបងប្អូនប្រជាពលរដ្ឋ ឲ្យបានទាន់ពេលវេលា ពង្រឹងវិន័យ លេខៈ០០៦ របស់កងកម្លាំងនគរបាលជាតិ រក្សាសាមគ្គីភាពផ្ទៃក្នុង ត្រៀមកម្លាំង ប្រចាំការជានិច្ច២៤ ម៉ោង លើ ២៤ម៉ោង ដើម្បីទ្រោលសភាពការណ៍ កើតឡើងជាយថាហតុ និងជំរុញដល់មន្រ្តីនគរបាល ដែលទើបទទួលបានការតែងតាំងថ្មី ត្រូវតែបំពេញភារកិច្ចឲ្យបានល្អ ទៅតាមជំនាញ ដែលថ្នាក់លើប្រគល់ជូន៕  សេង សុធា