ចេញហើយ! លទ្ធផលចាប់ឆ្នោតជាផ្លូវការ Cambodian League Cup 2023
- ភ្នំពេញ
រាជធានីភ្នំពេញ ៖ លទ្ធផលការចាប់ឆ្នោតជាផ្លូវការពានរង្វាន់ Cambodian League Cup 2023 បានរក
រាជធានីភ្នំពេញ ៖ លទ្ធផលការចាប់ឆ្នោតជាផ្លូវការពានរង្វាន់ Cambodian League Cup 2023 បានរកឃើញក្រុមទាំងពីរពូល ស្មើនឹង១៤ក្រុម ដែលមកពីក្លិបលីគកំពូលកម្ពុជា និងលីគទី២ ដែលធ្វើឡើងនៅទីស្នាក់ការក្រុមហ៊ុនលីគបាល់ទាត់កម្ពុជា Cambodian Premier league នៅរសៀលថ្ងៃទី២៦ ខែមករា ឆ្នាំ២០២៣នេះ។
សម្រាប់លទ្ធផលការចាប់ឆ្នោតត្រូវបានចាប់ឡើងដោយលោក Satoshi Saito ដែលជានាយកប្រតិបត្តិផ្ទាល់ ដោយលទ្ធផលពូល A មានក្លិបបាល់ទាត់បឹងកេត វិសាខា គីរីវង់ Tiffy Army អគ្គិសនីកម្ពុជា កោះកុង និងព្រៃវែង។ ខណៈលទ្ធផលពូល B មានក្រុមដូចជា ក្លិបបាល់ទាត់ព្រះខ័នរាជស្វាយរៀង ភ្នំពេញក្រោន អង្គរថាយហ្គឺរ ណាហ្គាវើល នគរបាលជាតិ ISI ដង្កោសែនជ័យ និងសូលទីឡូអង្គរ។
រូបមន្តការប្រកួត Cambodian League Cup 2023 មាន ១៤ក្រុមចូលរួម ដោយបែងចែកជា២ពូល ក្នុង១ពូលមាន ៧ក្រុម ដែលត្រូវប្រកួត១ជើងប៉ុណ្ណោះ ដើម្បីឆ្លាស់ទឹកដីគ្នា វាស្មើនឹង១ក្រុម មាន៦ប្រកួតនៅក្នុងពូល។ ក្រុមដែលឈរនៅចំណាត់ថ្នាក់លេខ១ និងលេខ២ ក្នុងពូលនីមួយៗ នឹងត្រូវធ្វើការប្រកួតខ្វែង នៅវគ្គពាក់កណ្ដាលផ្ដាច់ព្រ័ត្រដែលមាន២ជើង ក្នុងផ្ទះ និងក្រៅផ្ទះ មុនឈានទៅដល់ការប្រកួតមួយជើងនៅវគ្គផ្ដាច់ព្រ័ត្រនៃទឹកដីអព្យាក្រិត។
នេះជារដូវកាលទី៣ហើយ ដែលការប្រកួតលីគខាប់កម្ពុជាត្រូវបានដំណើរការប្រកួត ដោយលើកទី១កាលពីឆ្នាំ២០២១ មិនបានដំណើរការដល់បញ្ចប់រដូវកាលឡើយដោយសារវិបត្តិកូវីដ១៩ និងឆ្នាំ២០២២ ក្លិបភ្នំពេញក្រោនជាម្ចាស់ជើងឯក ក្រោយឈ្នះវិសាខានៅវគ្គផ្ដាច់ព្រ័ត្រ។ សម្រាប់ការប្រកួតក្នុងឆ្នាំ២០២៣នេះវិញ នឹងដំណើរការប្រកួតចុងសប្ដាហ៍នៅថ្ងៃសៅរ៍ និងថ្ងៃអាទិត្យ ចាប់ពីថ្ងៃទី១១ ខែកុម្ភៈ ដល់ថ្ងៃទី៥ ខែមិថុនាឆ្នាំ២០២៣ នេះបើតាមកាលវិភាគព្រាងប្រចាំរដូវកាលរបស់ Cambodian Premier League ៕ (ដោយ៖ ភឿង ភារៈ)
ចែករំលែកព័តមាននេះ