Bale ប្រកាសចូលរួមប្រកួតវាយកូនហ្គោលកម្មវិធី PGA Tour ក្រោយទើបចូលនិវត្តន៍ពីបាល់ទាត់
វែលស៍ ៖ អតីតកីឡាករបាល់ទាត់ លោក Gareth Bale បានប្រកាសថា នឹងចូលរួមក្នុងការប្រកួតកីឡ
វែលស៍ ៖ អតីតកីឡាករបាល់ទាត់ លោក Gareth Bale បានប្រកាសថា នឹងចូលរួមក្នុងការប្រកួតកីឡវាយកូនហ្គោលកម្មវិធីកម្រិតពិភពលោក PGA Tour នាពេលខាងមុខនេះ ពោលគឺតែប៉ុន្មានសប្តាហ៍ប៉ុណ្ណោះ បន្ទាប់ពីរូបគេបានប្រកាសចូលនិវត្តន៍ពីអាជីពបាល់ទាត់របស់ខ្លួន។ នេះបើយោងតាមប្រភពសារព័ត៌មាន BBC ចេញផ្សាយកាលពីថ្ងៃទី២៤ ខែមករា ឆ្នាំ២០២៣។
អតីតប្រធានក្រុមជម្រើសជាតិវែលស៍វ័យ៣៣ឆ្នាំរូបនេះ បាននិយាយថា ខ្លួននឹងចូលរួមប្រកួតប្រជែងនៅក្នុងកម្មវិធី AT&T Pebble Beach Pro-Am នៅខែកុម្ភៈ ឆាប់ៗខាងមុខនេះ ដែលនឹងធ្វើឡើងនៅក្នុងរដ្ឋកាលីហ្វ័រញ៉ា សហរដ្ឋអាមេរិក។
អតីតខ្សែប្រយុទ្ធឆ្នើមក្រុម Tottenham Hotspur និង Real Madrid រូបនេះ បានប្រកាសចូលនិវត្តន៍ពីអាជីពបាល់ទាត់ទាំងក្លិប និងជម្រើសជាតិជាផ្លូវការ កាលពីថ្ងៃទី៩ ខែមករា កន្លងទៅថ្មីៗនេះ ក្នុងនាមរូបគេជាកីឡាករផ្នែកបុរស ដែលបង្ហាញខ្លួន និងរកគ្រាប់បាល់បានច្រើនជាងគេបំផុតសម្រាប់ក្រុមជម្រើសជាតិវេលស៍ ហើយក៏ជាកីឡាករឈ្នះពានរង្វាន់ UEFA Champions League ៥សម័យកាលជាមួយក្រុម Real Madrid ផងដែរ។
អំឡុងពេលប្រកបអាជីពបាល់ទាត់ ពោលគឺនៅប៉ុន្មានឆ្នាំចុងក្រោយនេះ គេសង្កេតឃើញ Bale តែងតែបង្ហាញចំណង់ចំណូលចិត្តរបស់ខ្លួន ទៅលើការលេងកីឡាវាយកូនហ្គោល មុនពេលប្រកាសជាផ្លូវការ ដើម្បីបោះជំហានលើអាជីពថ្មីមួយនេះ។
Gareth Bale នឹងចូលរួមការប្រកួតកម្មវិធី AT&T Pebble Beach Pro-Am ដែលធ្វើឡើងនៅឯទីលាន Pebble Beach ដោយមានអ្នកចូលរួមរហូតដល់១៥៦នាក់ ដែលនៅក្នុងនោះ ក៏រួមមានការចូលរួមពីសំណាក់ម្ចាស់ជើងឯកព្រឹត្តិការណ៍ US Open លោក Matt Fitzpatrick ផងដែរ ដើម្បីធ្វើការប្រកួតប្រជែងដណ្តើមប្រាក់រង្វាន់ចំនួន ៩លានដុល្លារអាមេរិក។
គួររំលឹកថា សម្រាប់អាជីពបាល់ទាត់ Gareth Bale បានក្លាយជាកីឡាករអាជីពជាលើកដំបូងនៅអង់គ្លេសក្នុងឆ្នាំ ២០០៦ ជាមួយក្លិប Southampton ហើយបានផ្លាស់មកក្លិប Tottenham Hotspur នៅឆ្នាំ២០០៧ មុនពេលចុះហត្ថលេខាជាមួយក្លិប Real Madrid ក្នុងតម្លៃកំណត់ត្រាពិភពលោក ៩០លានអឺរ៉ូ កាលពីឆ្នាំ២០១៣ មុនផ្លាស់ត្រឡប់មកចូលរួមជាមួយ Tottenham វិញ នៅក្នុងឆ្នាំ២០២០ ក្នុងលក្ខខណ្ឌខ្ចីជើង ហើយបានបន្តទៅចូលរួមជាមួយក្លិប Los Angeles FC នៅលីគកំពូលរបស់សហរដ្ឋអាមេរិក កាលពីពាក់កណ្តាលឆ្នាំ២០២២ ដែលជាកន្លែងចុងក្រោយនៃអាជីពរបស់ខ្លួន៕
ចែករំលែកព័តមាននេះ