ពលរដ្ឋប្រកបរបរដឹកចង្ក្រាន និងឆ្នាំងដីលក់ឆ្លងខេត្ត ត្អូញថា លក់មិនសូវដាច់
- ប៉ៃលិន
ខេត្តប៉ៃលិន ៖ រហូតមកដល់ថ្ងៃទី២៤ ខែមករា ឆ្នាំ២០២៣នេះ គេសង្កេតឃើញប្រជាពលរដ្ឋចំនួន៣
ខេត្តប៉ៃលិន ៖ រហូតមកដល់ថ្ងៃទី២៤ ខែមករា ឆ្នាំ២០២៣នេះ គេសង្កេតឃើញប្រជាពលរដ្ឋចំនួន៣គ្រួសារ មកពីខេត្តកំពង់ឆ្នាំង បានបើកបររថយន្តច្នៃ ដឹកសម្ភារ:ផ្ទះបាយ ដែលជាស្នាដៃផលិត ផលខ្មែរសុទ្ធសាធ ដូចជា ចង្ក្រានដី ឆ្នាំងដី កញ្ច្រែង ល្អី លក់ដូរនៅតាមភូមិនានា និងក្នុងផ្សារ សម្រាប់ជីវភាពប្រចាំថ្ងៃ។ រហូតដល់លក់ដាច់អស់ ទើបពួកគាត់នាំគ្នាបើកបររថយន្តត្រឡប់ទៅស្រុកកំណើតវិញ ដើម្បីជួបជុំប្រពន្ធកូន ហើយនាំគ្នាទិញសម្ភារ:ទាំងនេះយកទៅលក់ដូរនៅតាមខេត្តផ្សេងៗបន្តទៀត។
បើតាមការរៀបរាប់ពីបុរសជាអ្នកលក់ឈ្មោះ គន ចាន់ថេត ហៅគីម មានស្រុកកំណើតរស់នៅឃុំជ្រៃបាក់ ស្រុករលាប្អៀរ ខេត្តកំពង់ឆ្នាំ បានឱ្យភ្នាក់ងារកោះសន្តិភាពដឹងថា ពួកគាត់បានបបួលមិត្តភក្តិមានគ្នា៣នាក់ បើកបររថយន្តច្នៃរៀងៗខ្លួន ដឹកចង្ក្រាន ឆ្នាំងដី កូនជ្រូកធ្វើពីដីសម្រាប់ដាក់សន្សំលុយ ចង្អេរ និងសម្ភារ:ផលិតដោយប្រជាពលរដ្ឋខ្មែរផ្ទាល់ យកលក់ដូរ នៅតាមភូមិចាប់តាំងពីខេត្តកំពង់ឆ្នាំងរហូតមកដល់ខេត្តប៉ៃលិន ដោយលើកតពីប្រជាពលរដ្ឋនៅតាមភូមិ ដោយទើបតែចូលមកលក់ដូរក្នុងខេត្តប៉ៃលិន ហើយក៏ដាច់មួយៗ ដែលចង្ក្រាន១គ្រឿងលក់ក្នុងតម្លៃចាប់ពី១៥០០០រៀល រហូតដល់៧០០០០រៀល។
តាមប្រភពបន្តទៀតថា ការបើកបររថយន្តច្នៃដើរលក់គ្រឿងផ្ទះបាយនេះ យប់កន្លែងណាសុំវត្ត ឬប៉ុស្តិ៍នគរបាលស្នាក់នៅដាំបាយហូបជួបជុំមិត្តភក្តិ លុះព្រឹកឡើងបន្តដំណើរទៅលក់ដូរនៅតាមភូមិ ដើម្បីបានថវិកាសម្រាប់ផ្គត់ផ្គង់ជីវភាពគ្រួសារ។ ពេលនេះ រថយន្ត១គ្រឿងកំពុងចូលទៅលក់ដូរនៅក្នុងផ្សារ រីឯរថយន្ត២គ្រឿងកំពុងរកកន្លែងចតឈប់នៅក្នុងបរិវេណវត្តពោធិ៍មារាម ហៅវត្តប៉ាហ៊ី ដើម្បីដាំបាយធ្វើម្ហូប។ ការលក់ដូរនេះមិនទៀងទាត់នោះទេ បើសិនជាលក់ដាច់អស់លឿននឹងឆាប់វិលត្រឡប់ទៅផ្ទះម្តង ដើម្បីជួបជុំប្រពន្ធកូន។ តែបើមិនសូវដាច់ គឺអាចរយ:ពេល១ទៅ២ខែ ទើបនាំគ្នាត្រឡប់ទៅស្រុកម្តង ដើម្បីកម្មង់ទិញចង្ក្រាន និងសម្ភារ:ចាន ឆ្នាំងដីថែមទៀត យកទៅលក់ដូរនៅតាមបណ្តាខេត្តនានា ទូទាំងប្រទេសកម្ពុជា។
ពួកគាត់បញ្ជាក់បន្ថែមទៀតថា មុខរបរមួយនេះ មិនសូវដាច់ខ្លាំងប៉ុន្មានទេ តែក៏អាចឱ្យពួកគាត់ ទទួលបានប្រាក់កម្រៃ ដើម្បីផ្ញើទៅឱ្យប្រពន្ធកូនទិញម្ហូបអាហារទទួលទាន ជាពិសេសបន្ទាប់ពីរួចការងារស្រែចំការ ពួកគាត់តែងនាំគ្នាដើរលក់ដូរនៅតាមបណ្តាខេត្តនៅទូទាំងប្រទេសតែម្តង៕
ចែករំលែកព័តមាននេះ