ADផ្ទាំងផ្សព្វផ្សាយពាណិជ្ជកម្ម

Picture

ម្ចាស់ផ្ទះ​កំពុង​ស្រោច​ទឹក​ទុរេន​សុខ​ៗ ក៏​ឮ​សូរ​ផ្ទុះ​ផ្ទួន​ៗ លុះ​អើត​មើលឃើញ​អណ្ដាតភ្លើង​ផ្អើល​ពេញ​ភូមិ

2 អាទិត្យ មុន
  • បាត់ដំបង

អគ្គិភ័យ​ដែល​គេ​សង្ស័យ​ថា បណ្ដាល​មក​ពី​ការ​ទុ​ស្សេ​ខ្សែ​ចរន្តអគ្គិសនី បាន​លេប​ត្របាក់​​លំនៅ​ឋាន​ដែល​ធ្វើ​អំពី​ឈើ​ដ៏​ធំ​មួយ​ខ្នង​អស់​គ្មាន​សល់

ខេត្តបាត់ដំបង ៖ អគ្គិភ័យ​ដែល​គេ​សង្ស័យ​ថា បណ្ដាល​មក​ពី​ការ​ទុ​ស្សេ​ខ្សែ​ចរន្តអគ្គិសនី បាន​លេប​ត្របាក់​លំនៅ​ឋាន​ដែល​ធ្វើ​អំពី​ឈើ​ដ៏​ធំ​មួយ​ខ្នង​អស់​គ្មាន​សល់ កាលពី​វេលា​ម៉ោង​ជិត​៤​ទៀប​ភ្លឺ ថ្ងៃ​ទី​២៤ ខែមករា ឆ្នាំ​២០២៣ នៅ​ចំណុច​ភូមិក​ន្ទូ​ត ឃុំ​សំឡូត ស្រុក​សំឡូត ហើយ​ម្ចាស់ផ្ទះ​រំដោះ​បាន​តែ​ម៉ូតូ​មួយ​គ្រឿង​គត់ ក្រៅពី​នេះ​បាន​ក្លាយជា​ចំណី​ព្រះ​អគ្គី​ស្ទើរ​ទាំងស្រុង​ទៅ​ហើយ​។

Picture

បើ​តាម​របាយការណ៍​របស់​សមត្ថកិច្ច​បាន​ឲ្យ​ដឹង​ថា លំនៅ​ឋាន​ដែល​រង​គ្រោះ​ដោយ​អគ្គិភ័យ​នោះ គឺ​មាន​ទំហំ​៧​ម៉ែត្រ​x៩​ម៉ែត្រ ធ្វើ​អំពី​ឈើ​ប្រក់​ស័ង្កសី ដែល​មាន​ម្ចាស់​ឈ្មោះ សំ ភឿន ភេទ​ប្រុស អាយុ​៣៦​ឆ្នាំ​។ សេចក្ដីរាយការណ៍​បាន​ឲ្យ​ដឹង​បន្ត​ថា អគ្គិភ័យ​នេះ​បាន​ឆាបឆេះ​លំនៅ​ឋាន​រាប​ដល់​ដី​តែ​ម្ដង សូ​ម្បី​តែ​ទ្រព្យសម្បត្តិ​នៅ​ក្នុងផ្ទះ​ក៏​ត្រូវ​ព្រះ​អគ្គី​លេប​ត្រ​បាត់​អស់​គ្មាន​សល់​ដែរ​។

Picture

ប្រភព​ដដែល​បន្ត​ថា បើ​តាម​ព័ត៌មាន​ពី​ម្ចាស់ផ្ទះ គឺ​រំដោះ​បាន​តែ​ម៉ូតូ​មួយ​គ្រឿង​គត់ តែ​ពុំ​មាន​គ្រោះថ្នាក់​ដល់​មនុស្ស​នោះ​ទេ​។ ហើយ​អគ្គិភ័យ​នោះ ទំនង​បង្ក​ឡើង​ដោយ​ការ​ទុ​ស្សេ​ខ្សែ​ចរន្តអគ្គិសនី​នៅ​ពេល​ដែល​ម្ចាស់ផ្ទះ​ប្រើប្រាស់​បូមទឹក​ស្រោច​ដំណាំ​ទុរេន​នៅ​ក្នុង​ចំការ​ខាងក្រោយ​ផ្ទះ​អស់​ជា​ច្រើន​ម៉ោង​ស្ទើរតែ​ពេញ​មួយ​យប់​។ នេះ​បើ​យោង​តាម​ការ​បំភ្លឺ​ពី​ម្ចាស់ផ្ទះ ដែល​បាន​រៀបរាប់​ប្រាប់​សមត្ថកិច្ច ក្រោយ​ពេល​កើតហេតុ​។

Picture

សមត្ថកិច្ច​បាន​ស្រង់​សំដី​ម្ចាស់ផ្ទះ​បន្ត​ថា គាត់​បាន​ត​.​ភ្លើង​បូមទឹក​ស្រោច​ដំណាំ​ទុរេន​តាំងពី​ព្រលប់​ថ្ងៃ​ទី​២៣ ខែមករា គឺ​ស្ទើរ​ពេញ​មួយ​យប់​។ ហើយ​ខណៈ​ពេល​គាត់​កំពុង​តែ​ស្រោច​ដំណាំ​ខាងក្រោយ​ផ្ទះ គឺ​នា​ទៀប​ភ្លឺ​ទៅ​ហើយ ស្រាប់តែ​គាត់​ឮ​សំលេង​ផ្ទុះ​នៅ​ឯ​ផ្ទះ​របស់​គាត់​ចំនួន​២​លើក​ផ្ទួន​ៗ​។ ពេល​នោះ​គាត់​ក៏​បាន​អើត​មើល ស្រាប់តែ​ឃើញ​អណ្ដាតភ្លើង​កំពុង​តែ​ឆាបឆេះ​ឡើង​សន្ធោសន្ធៅ​ទៅ​ហើយ​។ គ្រានោះ​គាត់​បានរ​ត់ទៅ​មើល ស្រាប់តែ​ឃើញ​ភ្លើង​កំពុង​តែ​ឆេះ​ផ្ទះ​គាត់ ទើប​មានការ​ភ្ញាក់ផ្អើល​ពេញ​ភូមិ​តែ​ម្ដង​។

Picture

ជន​រង​គ្រោះ​បាន​បញ្ជាក់​ប្រាប់​សមត្ថកិច្ច​ទៀត​ថា គាត់​សង្ស័យ​អគ្គិភ័យ​នោះ គឺ​បណ្ដាល​មក​ពី​ការ​ទុ​ស្សេ​ខ្សែភ្លើង ហើយ​ឆេះ​រាលដាល រហូត​ឆេះ​ផ្ទុះ​កំប៉ុង​ហ្គា​ស​ថែម​ទៀត ទើប​បានជា​ឆេះ​លឿន និង​ខ្លាំង​បែប​នេះ ដែល​គាត់​មិន​អាច​រំដោះ​អ្វី​បាន​ឡើយ ក្រៅពី​ម៉ូតូ​មួយ​គ្រឿង​។

Picture

បើ​តាម​នាយ​នគរបាល​ប៉ុស្ដិ៍​រដ្ឋបាល​សំឡូត លោក នូ ប៊ុ​ន​ធឿ​ន បាន​ថ្លែងប្រាប់​កោះសន្តិភាព​ថា នៅផ្ទះ​ជន​រង​គ្រោះ គេ​ពិនិត្យ​ឃើញ​មាន​ផ្ទុះ​ឆេះ​សំបក​កំប៉ុង​ហ្គា​ស និង​ធុង​ខ្យល់​សម្រាប់​បូម​កង់​រថយន្ត ឬ​ម៉ូតូ ដែល​ត្រូវ​ភ្លើង​ឆេះ​អស់​គ្មាន​សល់ រាប់​ទាំង​គោ​យន្ត​មួយ​គ្រឿង​ផង​ដែរ​។ ដោយឡែក​តួ​ផ្ទះ​ទាំង​មូល និង​សម្ភារៈ ឬ​ទ្រព្យសម្បត្តិ​ដទៃ​ទៀត ក៏​ត្រូវ​អគ្គិភ័យ​លេប​ត្រ​បាត់​អស់​ដែរ​។ ចំណែក​ម្ចាស់ផ្ទះ​បាន​រត់​ចេញពី​ចំការ​ខាងក្រោយ មក​អូស​យក​បាន​តែ​ម៉ូតូ​មួយ​គ្រឿង​គត់ រួច​ផុត​ពី​ចំណី​ព្រះ​អគ្គី​។

Picture

លោក នូ ប៊ុ​ន​ធឿ​ន បាន​ស្រង់​សំដី​ម្ចាស់ផ្ទះ​ទៀត​ថា គាត់​បាន​ត​.​ខ្សែភ្លើង​ប្រើ​ម៉ូ​ទ័​រ​បូមទឹក​ស្រោច​ដំណាំ​ទុ​រ៉េ​ន​តាំងពី​ក្បាល​ព្រលប់ ហើយ​បាន​ដំណើរការ​ស្ទើរ​ពេញ​មួយ​យប់​។ លុះ​នៅ​វេលា​ទៀប​ភ្លឺ ពេល​គាត់​កំពុង​តែ​ស្រោច​ដំណាំ ស្រាប់តែ​មាន​អគ្គិភ័យ​ឆេះ​ផ្ទះ​តែ​ម្ដង​។ ហើយ​បើ​យោង​លើ​ការ​បំភ្លឺ​របស់​ម្ចាស់ផ្ទះ​បែប​នេះ លោក​សង្ស័យ​ការ​ប្រើ​ម៉ូ​ទ័​រ​បូមទឹក​ច្រើន​ម៉ោង​ពេក ទើប​ធ្វើ​ឲ្យ​ខ្សែភ្លើង​ក្ដៅ​ខ្លាំង រហូត​ទុ​ស្សេ​ក្លាយជា​អគ្គិភ័យ​តែ​ម្ដង​។

Picture

ក្រោយ​ស្ដាប់​ការ​បំភ្លឺ​របស់​ម្ចាស់ផ្ទះ លោក​មេ​ប៉ុស្ដិ៍​រូប​នេះ បាន​ធ្វើការ​សន្និដ្ឋាន​ជាបឋម​ថា អគ្គិភ័យ​បាន​ឆាបឆេះ​ពី​ផ្នែក​ខាងលើ ហើយ​ឆេះ​រាលដាល​ចុះ​មក​ខាងក្រោម រហូត​ដល់​ផ្ទះបាយ​ឆេះ​ផ្ទុះ​កំប៉ុង​ហ្គា​ស​។ ពេល​នោះ​គាត់​ឮ​ស្នូរ​សំឡេង​ផ្ទុះ ទើប​គាត់​រត់​មក​មើល តែ​ហួសពេល​ទៅ​ហើយ ព្រោះ​អគ្គិភ័យ​បាន​ឆេះ​ពេញបន្ទុក និង​លឿន​បំផុត ទើប​គាត់​មិន​អាច​ជួយ​រំដោះ​ទ្រព្យសម្បត្តិ​អ្វី​បាន សូ​ម្បី​រថយន្ត​ពន្លត់​អគ្គិភ័យ​ក៏​មិន​អាច​បាញ់​ទឹក​ជួយ​ទាន់​ពេល​ដែរ​។

Picture

ប៉ុន្តែ​យ៉ាងណា​ក្តី អគ្គិភ័យ​លេប​យក​អស់​ផ្ទះ​មួយ​ខ្នង និង​ទ្រព្យសម្បត្តិ​ស្ទើរ​ទាំងស្រុង តែ​ពុំ​បង្ក​ឲ្យ​មាន​គ្រោះថ្នាក់​ដល់​មនុស្ស​នោះ​ទេ តែ​គេ​មិន​ទាន់​វា​.​យ​តម្លៃ​ពី​តុល្យការ នៃ​ការ​ខូចខាត​បាន​ភ្លាម​ៗ​នៅ​ឡើយ​ទេ ខណៈ​មន្ត្រី​ជំនាញ និង​អាជ្ញាធរ​កំពុង​ចុះ​ត្រួតពិនិត្យ និង​សាកសួរ​ជន​រង​គ្រោះ​បន្ត​ទៀត​៕

Picture
Picture
SEA Game 2023

ព្រឹត្តិការណ៍ស៊ីហ្គេម លើកទី៣២

SEA Game 2023