រាជធានីភ្នំពេញ ៖ នៅប៉ុន្មានថ្ងៃនេះ ប្រជាពលរដ្ឋខ្មែរបានកំពុងអបអរសារទរពិធីបុណ្យចូលឆ្នាំប្រពៃណីចិន វៀតណាម។ចូលឆ្នាំចិន និងវៀតណាម ដែលពលរដ្ឋខ្មែរបានប្រារព្ធធ្វើតាំងពីថ្ងៃសៅរ៍ចុងសប្តាហ៍មុន រហូតមកដល់ដើមសប្តាហ៍នេះ។
គ្រឹះស្ថានអប់រំ ក្រុមហ៊ុនឯកជន រួមទាំងស្ថាប័នរដ្ឋផង បានបន្តបិទទ្វារឬរក្សាសភាពស្ងាត់ច្រងំ ដោយមិនមានសិស្សទៅរៀន និងពុំមានបុគ្គលិកទៅបម្រើការងារ។ស្ថានភាពនេះក៏បង្ហាញពីឥទ្ធិពលវប្បធម៌ចិននៅក្នុងប្រទេសកម្ពុជា និងប្រទេសជាច្រើនទៀតផងដែរ។តាមពិតទៅចូលឆ្នាំចិនពុំមានច្បាប់អនុញ្ញាតឱ្យឈប់សម្រាកជាផ្លូវការនោះទេ។ តែទោះបីគ្មានច្បាប់នៅរៀងរាល់ឆ្នាំឱ្យដល់ពេលចូលឆ្នាំចិនម្តងៗគ្រឹះស្ថានសិក្សា និងកន្លែងធ្វើការជាច្រើនបានបិទទ្វារ ឬមិនដំណើរការ។ ដោយសារពុំអាចឃាត់បុគ្គលិកមិនឱ្យឈប់សម្រាកបាន និងដោយសារពុំអាចអូសទាញសិស្សឱ្យមករៀនបាន សាលារៀន និងកន្លែងធ្វើការមួយចំនួនបានបិទទ្វារក្នុងថ្ងៃចូលឆ្នាំចិន ក្រោមរូបភាពផ្សេងៗតែម្តង។
សាលារៀន បានបង្ខំចិត្តបិទទ្វារសាលាដោយបានជូនដំណឹងថា ដើម្បីជាឱកាសបូកសរុបលទ្ធផលសិក្សារបស់សិស្ស ឬជាឱកាសប្រជុំប្រចាំឆ្នាំប្រចាំឆមាសជំនួសវិញ។ ដូចគ្នានេះ ក្រុមហ៊ុនឯកជនជាច្រើន បានយកឱកាសចូលឆ្នាំចិននេះអនុញ្ញាតឱ្យបុគ្គលខ្លួនបានឈប់សម្រាក ដោយជំនួសថ្ងៃឈប់សម្រាកផ្សេងមកជំនួសវិញឬគេបានតម្រូវឱ្យ បុគ្គលិកឈប់ សម្រាកប្រចាំឆ្នាំតែម្តង។
ត្បិតអីគ្រប់គ្នាបានដឹងថា បើទោះបីនៅបើកទ្វាក៏ពុំមានអ្នកធ្វើការដែរ។ បុគ្គលិកជាច្រើនគង់តែ ដាក់ច្បាប់ឈប់សម្រាកនៅពេលសែនចូលឆ្នាំថ្មីប្រពៃណីចិន និងវៀតណាមនោះជាដដែលទេ។ដោយឡែកចំពោះបុគ្គលិករដ្ឋនៅតាមក្រសួង និងស្ថាប័ននានាក៏មិនសូវទៅធ្វើការ។គ្មានច្បាប់អនុញ្ញាតឱ្យឈប់ តែជាទូទៅនៅក្នុងឱកាសចូលឆ្នាំប្រពៃណីចិននេះ ក្រសួងស្ថាប័នរដ្ឋមានសភាពស្ងាត់ច្រងំតែម្តង។
កម្ពុជា ជាប្រទេសមួយមានថ្ងៃឈប់សម្រាកប្រចាំឆ្នាំច្រើនថ្ងៃ បើធៀបនឹងប្រទេសផ្សេង។ ការឈប់សម្រាកនៅកម្ពុជាមានចំនួន២១ថ្ងៃ រាប់ទាំងពីថ្ងៃប្រវត្តិសាស្ត្រ បុណ្យជាតិ បុណ្យសាសនា ប្រពៃណី។ ក្រៅពីការឈប់សម្រាកជាផ្លូវការ ពលរដ្ឋខ្មែរនិយមឈប់សម្រាកទៅវប្បធម៌ប្រពៃណីបរទេសផងដែរ។ដូចជាឱកាសចូលឆ្នាំថ្មីនេះជាដើម ក្រៅពីការឈប់ សម្រាកឱកាសបុណ្យចូលឆ្នាំប្រពៃណីខ្មែរ នៅខែមេសា ពលរដ្ឋខ្មែរចូលរួមឈប់សម្រាកដើរកម្សាន្តរៀបចំកម្មវិធីពេលឱកាសបុណ្យចូលឆ្នាំសកល បុណ្យចូលឆ្នាំប្រពៃណី ជនជាតិចិន និងវៀតណាមជាដើម។
អ្នកសេដ្ឋកិច្ចបានមើលឃើញថា ការឈប់សម្រាកពីការងារអាចជាឧបសគ្គដល់ចង្វាក់ផលិត ហើយបានក្លាយជាបន្ទុកធំមួយសម្រាប់ក្រុមហ៊ុនដែលរកផលចំណេញ។ ការឈប់សម្រាករបស់មន្ត្រីរាជការ ដែលផ្តល់សេវាសាធារណៈបង្កឱ្យយឺតយាវដល់ដំណើរការក្រុមហ៊ុនឯកជន។ ក្រុមហ៊ុនខ្លះដែលមិនអាចបិទទ្វារដោយខ្លាចប៉ះពាល់ចង្វាក់ផលិតកម្ម សុខចិត្តចំណាយថវិកាមួយទ្វេរជាពីរក្នុងការបន្ថែមប្រាក់ឈ្នួលដល់កម្មករ ឬបុគ្គលិក។
បើនិយាយពីការសិក្សាក៏ដូចគ្នា គឺធ្វើអោយសិស្សខាតបង់ពេលវេលាសិក្សា។រហូតដល់អ្នកអភរិក្សខ្លះបានលើកឡើងថា ក្រៅពីការខាតបង់លើប្រយោជន៍ជាក់ស្តែងដល់ការចេះដឹង ការឈប់សម្រាកនៅក្នុងឱកាសបុណ្យទានសាសនាបរទេស ប្រពៃណីគេអាចធ្វើអោយកូនខ្មែរ ចាប់យកវប្បធម៌ប្រពៃណីគេ ខណៈវប្បធម៌ខ្លួនឯងមិនបានចេះច្បាស់ ឬមិនទទួលបានការអប់រំណែនាំឱ្យច្បាស់លាស់នោះ។
ទោះយ៉ាងណាអ្នកសេដ្ឋកិច្ចមួយចំនួនបានយល់ថា ឱកាសឈប់សម្រាកជាចលនាសេដ្ឋកិច្ចទៅវិញទេ។នៅពេលឈប់សម្រាកម្តងៗ ពលរដ្ឋនាំគ្នាដើរកម្សាន្តដែលជាឱកាសមានលំហូរសាច់ប្រាក់នៅក្នុងសង្គម។ ពលរដ្ឋដើរលេងអាចធ្វើអោយវិស័យសណ្ឋាគារ ចំណីអាហារ និងសេវាកម្មនានាមានចំណូល។
ទោះយ៉ាងណា ដោយសាររងផលប៉ះពាល់សេដ្ឋកិច្ច ដោយសារកូវីដ១៩ និងបញ្ហាសង្គ្រាមរុស្សី ជាមួយអ៊ុយក្រែនផងនោះនៅឆ្នាំនេះមានការសង្កេតឃើញថា ចូលឆ្នាំប្រពៃណីចិន និងវៀតណាមមិនសូវអធិកអធមដូចឆ្នាំមុនៗទេ។ ការរកប្រាក់មិនសូវបាន ហើយទំនិញឡើងថ្លៃផងនោះពលរដ្ឋជាច្រើនមិនហ៊ានចាយលុយផ្តេសផ្តាសឡើយ៕ដោយ សារ៉ាន់
ចែករំលែកព័តមាននេះ