យ៉ាងហោចណាស់ មានមនុស្សប្រុសស្រីជាង១០០នាក់ចម្រុះជាតិសាសន៍ បានជាប់គាំងក្នុងសណ្ឋាគារឡិមុន ខណៈពេលដែលអគ្គិភ័យបានឆាបឆេះចាប់ពីជាន់ផ្ទាល់ដី ហើយអគារនេះ គឺមានកម្ពស់រហូតដល់
ក្រុងព្រះសីហនុ ៖ បើតាមសេចក្តីរាយការណ៍បានឱ្យដឹងថា យ៉ាងហោចណាស់ មានមនុស្សប្រុសស្រីជាង១០០នាក់ចម្រុះជាតិសាសន៍ បានជាប់គាំងក្នុងសណ្ឋាគារឡិមុន ខណៈពេលដែលអគ្គិភ័យបានឆាបឆេះចាប់ពីជាន់ផ្ទាល់ដី ហើយអគារនេះ គឺមានកម្ពស់រហូតដល់៨ជាន់ឯណោះ ប៉ុន្តែភ្លាមៗនោះ ក៏ត្រូវបានអាជ្ញាធរ និងសមត្ថកិច្ចសង្គ្រោះបានពេលវេលាផងដែរ ។
សេចក្តីរាយការណ៍បន្តថា ហេតុការណ៍គ្រោះអគ្គិភ័យខាងលើនេះ បានកើតឡើងនៅវេលាម៉ោង៩កន្លះយប់ ថ្ងៃទី១៩ ខែមករា ឆ្នាំ២០២៣ ម្តុំខាងក្រោយកាស៊ីណូជិនប៉ី១ ហើយសណ្ឋាគារដែលឆេះនោះមានឈ្មោះថា «សណ្ឋាគារឡិមុន» ដែលស្ថិតនៅក្នុងភូមិ៤ សង្កាត់លេខ៤ ក្រុង/ខេត្តព្រះសីហនុ ។
ក្រោយពីទទួលបានដំណឹងខាងលើនេះភ្លាមៗ អាជ្ញាធរមានសមត្ថកិច្ចថ្នាក់ក្រុង និងខេត្ត បានចេញមកកន្លែងកើតហេតុ និងបានជួយអន្តរាគមន៍ទាន់ពេលវេលា ក្នុងនោះសមត្ថកិច្ចបានប្រើប្រាស់ទឹកអស់ជាង១០គ្រឿងទើបអណ្ដាតភ្លើងរលត់ទៅវិញ (ដែលជារថយន្តទឹកមកពីគ្រប់អង្គភាព) និងសមត្ថកិច្ចបានជួយសង្គ្រោះអាយុជីវិតមនុស្សទាំងជនជាតិខ្មែរ និងជនជាតិចិន ជាង១០០នាក់ និងរងរបួស២នាក់ ។
សមត្ថកិច្ចដាក់ការសន្និដ្ឋានជាបឋមថា ករណីអគ្គិភ័យខាងលើនេះ គឺឆាបឆេះ បណ្តាលមកពីឆ្លងប្រព័ន្ធអគ្គិសនី ធ្វើឱ្យភ្លើងឆាបឆេះទូហ្គេមបាញ់ត្រី១គ្រឿងនៅជាន់ផ្ទាល់ដី ទើបបណ្តាលឲ្យមានផ្សែងហុយចេញឡើងខ្មួលខ្មាញ់រហូតឆាបឆេះបែបនេះតែម្តង៕
ចែករំលែកព័តមាននេះ