រាជធានីភ្នំពេញ ៖ សម្រាប់ឆ្នាំ២០២៣នេះ វិស័យសំណង់ និងអចលនៈទ្រព្យអាចនឹងស្ទុះងើបឡើងបន្តិច ប៉ុន្តែទំនងជាមិនមែននៅក្នុងលក្ខខណ្ឌខ្លាំងក្លាឡើយ ដោយសារតែចរន្តនៃនិន្នាការសេដ្ឋកិច្ចតំបន់ និងសាកល។ តាមការវិភាគ និងភស្តុតាងដែលមាននោះការលក់ផ្ទះ…
រាជធានីភ្នំពេញ ៖ សម្រាប់ឆ្នាំ២០២៣នេះ វិស័យសំណង់ និងអចលនៈទ្រព្យអាចនឹងស្ទុះងើបឡើងបន្តិច ប៉ុន្តែទំនងជាមិនមែននៅក្នុងលក្ខខណ្ឌខ្លាំងក្លាឡើយ ដោយសារតែចរន្តនៃនិន្នាការសេដ្ឋកិច្ចតំបន់ និងសាកល។
តាមការវិភាគ និងភស្តុតាងដែលមាននោះការលក់ផ្ទះ និងលក់ដីនៅឆ្នាំ២០២៣ នឹងនៅបន្តជួបការលំបាក ហើយមិនទាន់អាចលក់ចេញទិញចូលលឿនឡើយ ខណៈវិស័យសំណង់ និងអចលនទ្រព្យត្រូវរំពឹងថានឹងមានកំណើនយឺតមែនទែន។ដូច្នេះអ្នកមានផ្ទះ និងដីដែលចង់លក់ដើម្បីប្រមូលយកលុយវិញមកប្រើប្រាស់នឹងត្រូវការពេលវែង ដើម្បីអាច លក់ដាច់ និងប្រមូលលុយបាន។
បើតាមការព្យាករណ៍របស់ក្រសួងសេដ្ឋកិច្ច និងហរិញ្ញវត្ថុបានអះអាងថា នៅឆ្នាំ២០២៣ កម្ពុជាអាចនឹងទទួលកំណើនសេដ្ឋកិច្ចសរុបនៅក្នុងអត្រា៦,៦ភាគរយ ហើយសម្រាប់អនុវិស័យសំណង់ និងអចលនៈទ្រព្យត្រូវបានរំពឹងថា នឹងបន្តមាននិន្នាការកើនឡើង ប៉ុន្តែនៅក្នុង ល្បឿនយឺត ដោយសារតែការរំពឹងទុកលើការបន្តងើបឡើងវិញយឺតនៃលំហូរទុនវិនិយោគពីបរទេស និងកំណើនទាបនៃសកម្មភាពទិញ និងលក់អចលនទ្រព្យជារួម។
ដោយឡែកតាមរបាយការណ៍វឌ្ឈនភាពម៉ាក្រូសេដ្ឋកិច្ច និងវិស័យធនាគារឆ្នាំ២០២២ និងទស្សនៈវិស័យឆ្នាំ២០២៣ របស់ធនាគារជាតិនៃកម្ពុជាវិញ បានអះអាងថា នៅឆ្នាំ២០២៣នេះ កម្ពុជាអាចនឹងទទួលកំណើនសេដ្ឋកិច្ចរង្វង់៦ភាគរយ ហើយវិស័យសំណង់នឹងទទួលបានកំណើន១,៧ ភាគរយហើយវិស័យអចលនទ្រព្យគឺប្រមាណជា១,២ ភាគរយ។
ផ្អែកតាមការព្យាករណ៍នេះ ប្រភពទាំងពីរបានបង្ហាញនូវទស្សនៈវិស័យថា តម្លៃអចលនទ្រព្យ ពោល គឺលំនៅស្ថានដែលមានតម្លៃថោក និង សមរម្យអាចមានកំណើនបន្តិចបន្តួច ប៉ុន្តែសម្រាប់គម្រោងប្រភេទនិវេសនដ្ឋានដែលមានតម្លៃថ្លៃ ឬប្រណីតអាចត្រូវការពេលវេលា ដើម្បីវិលត្រឡប់មករកស្ថានភាពមុនពេលមានវិបត្តិ។
ការព្យាករណ៍ថ្មីនេះ គឺវាខុសពីការព្យាករណ៍កាលពីពាក់កណ្តាលឆ្នាំ២០២២ ដែលគេបានសន្និដ្ឋានថា វិស័យសំណង់ និងអចលនទ្រព្យកម្ពុជានាឆ្នាំ២០២៣ គឺអាចទទួលកំណើនរហូតដល់ ៧,២ភាគរយ។ពាក់ព័ន្ធនឹងសភាពការណ៍នៃវិស័យសំណង់ និងអចលនទ្រព្យនេះ ទិន្នន័យពីក្រសួងរៀបចំដែនដីនគរូបនីយកម្ម និងសំណង់បានបង្ហាញពីសញ្ញាមិនល្អតាំងពីចុងឆ្នាំ២០២២កន្លងមក។តួរលេខបានបង្ហាញថា ចាប់ពីខែមករា ដល់ខែវិច្ឆិកា ឆ្នាំ ២០២២ ក្រសួងបានអនុម័តឱ្យមានគម្រោងសាងសង់ចំនួន៣.៨២៧គម្រោង ដែលមានផ្ទៃក្រឡាកម្រាលសំណង់សរុប ៦.៥៩៦.៩៣៦ ម៉ែត្រការ៉េ ធ្លាក់ចុះ២,៤៩ ភាគរយពីចំនួន៣.៩២៥ គម្រោងនារយៈពេល១១ខែឆ្នាំមុន រីឯចំណែកទុនវិនិយោគក្នុងរយៈពេល១១ ខែឆ្នាំ២០២២ គឺមាន២.៦៣៥ លានដុល្លារធ្លាក់ចុះ៤៩,៤២ ភាគរយពីចំនួន ៥.២១០ លានដុល្លារ។
តាមការស្ទាបស្ទង់ក្រៅផ្លូវការជាមួយនឹងអ្នកដែលពាក់ព័ន្ធជាមួយនឹងវិស័យសំណង់ និងអចលនៈទ្រព្យថ្មីៗនេះបានឲ្យដឹងថា ការសន្និដ្ឋានអំពីស្ថានភាពវិជ្ជមានតិចតួចអំពីវិស័យសំណង់ និងអចលនៈទ្រព្យនេះ គឺឈរលើមូលដ្ឋាននៃការរំពឹងអំពីការងើបឡើងវិញនៃវិស័យទេសចរណ៍ ជាពិសេសអ្នកទេសចរចិន និងវិនិយោគិនចិន ខណៈដែលក្រសួងទេសចរណ៍បានបង្ហាញពីការរំពឹងទុកថា វិស័យទេសចរណ៍នៅឆ្នាំ២០២៣នេះអាចទទួលភ្ញៀវទេសចរបរទេសដល់ទៅ៤លាននាក់ ស្របពេលឆ្នាំ២០២២បានទទួលតែ២,២៨ លាននាក់ ។
កាលពីឆ្នាំ២០២២ កន្លងទៅនេះ ក្រៅពីការធ្លាក់ចុះវិស័យសំណង និងអចលនទ្រព្យ គឺបានជួបនូវបញ្ហាជាច្រើន ជាពិសេស គឺការទូទាត់ និង បញ្ហាទុនបង្វិលដែលនាំឲ្យវិស័យនេះនៅចុងឆ្នាំមានបញ្ហាច្រើនបង្គួរ ហើយរំពឹងថា ស្ថានភាពវានឹងប្រសើរនៅក្នុងឆ្នាំ២០២៣ ជាពិសេស គឺ ការវិលមកវិញរបស់អ្នកវិនិយោគទុនចិនក្រោយគោលនយោបាយសូន្យកូវីដ ត្រូវបានលើកលែងដោយរដ្ឋាភិបាលចិន។
មកដល់ពេលនេះមានគម្រោងសំណង់ជាច្រើននៅរាជធានីភ្នំពេញ និង នៅខេត្តព្រះសីហនុ ត្រូវជាប់គាំងដោយវិនិយោគិនភាគច្រើន គឺមកពីចិន។ដូច្នេះយើងរំពឹងថា វិនិយោគិនចិនចាស់អាចនឹងត្រឡប់មកវិញ ហើយវិនិយោគិនចិនថ្មីអាចសម្លឹងមើលកម្ពុជាសម្រាប់ការវិនិយោគ លើ វិស័យសំណង់បន្ថែមទៀត។សរុបមកវិញវិស័យសំណង់ និងអចលនទ្រព្យនឹងមិនអាចស្ទុះងើបឡើងលឿនដូចវិស័យដទៃបានឡើយ៕ ដោយៈ ហេង ចេស្តារ
ចែករំលែកព័តមាននេះ