ខេត្តព្រៃវែង ៖ ផ្លូវកៅស៊ូប្រវែងជិត១០០ម៉ែត្រ ស្ថិតនៅភូមិព្រែកកាំភ្លើង ឃុំកំពង់ពពិល ស្រុកពារាំង ខេត្តព្រៃវែង បានស្រុតប្រេះបែក ដោយសារតែការបាក់ស្រុតច្រាំងទន្លេ និងបានធ្វើអោយប្រជាពលរដ្ឋដែលធ្វើដំណើរឆ្លងកាត់មានការព្រួយបារម្ភជាខ្លាំង។
ពលរដ្ឋដែលរស់នៅក្នុងភូមិព្រែកកាំភ្លើង បានអោយដឹងថា ការបាក់ស្រុតផ្លូវនេះ មិនមែនដោយសារការបូមខ្សាច់ ឬសកម្មភាពមនុស្សអ្វីនោះទេ គឺវាកើតឡើងដោយសារតែគ្រោះធម្មជាតិ ហើយគ្រោះធម្មជាតិនេះ គឺបានចាប់កើតមានឡើងតាំងពីដើមខែមករាមកម្ល៉េះ ដោយពីដំបូង គឺបាក់ស្រុតតែច្រាំងទន្លេនោះទេ បន្ទាប់មកក៏បាក់ដោយទាំងផ្ទះប្រជាពលរដ្ឋចូលទៅក្នុងទឹកទន្លេអស់ចំនួន៧ខ្នងទៀត គឺនៅភូមិជំនីកចំនួន៤ខ្នង និងនៅភូមិព្រែកកាំភ្លើងចំនួន៣ខ្នង ហើយមកដល់ថ្ងៃទី១៤មករា ក៏បន្តបាក់ថែមទៀត ដោយបាក់កិលបន្តិចម្តងៗ រហូតមកដល់ថ្ងៃទី១៦ ក៏បាក់មកដល់ផ្លូវកៅស៊ូតែម្តង។
ប្រភពដដែលបន្តថា ដោយសារឃើញតួផ្លូវមានស្នាមប្រេះបែក និងបាក់ស្រុតបែបនេះ បានធ្វើអោយប្រជាពលរដ្ឋដែលរស់នៅក្នុងឃុំកំពង់ពពិល ក៏ដូចជាអ្នកដំណើរដែលបានឆ្លងកាត់ មានការព្រួយបារម្ភជាខ្លាំង ព្រោះខ្លាចមានគ្រោះថ្នាក់ដល់មនុស្សនិងសត្វ ទើបនាំគ្នារាយការណ៍ទៅអាជ្ញាធរ និងមន្ត្រីជំនាញអោយទប់ស្កាត់ និងដោះស្រាយបញ្ហានេះអោយបានលឿន។
ទោះជាយ៉ាងណាក៏ដោយ ក្រោយពីទទួលបានព័ត៌មាននេះ នៅព្រឹកថ្ងៃទី១៧ ខែមករា អាជ្ញាធរស្រុកពារាំង និងមន្ទីរសាធារណការខេត្ត បានចុះពិនិត្យមើលដល់កន្លែងដែលបាក់ស្រុត និងបានចាត់វិធានការភ្លាមៗផងដែរ។
បើតាមលោក អ៊ុន សុធា ប្រធានមន្ទីរសាធារណការខេត្តព្រៃវែង បានបញ្ជាក់ថា ក្រោយពីចុះត្រួតពិនិត្យផ្លូវដែលបាក់ស្រុតនេះរួច មន្ទីរបានសុំគោលការណ៍ទៅក្រសួង ហើយខាងក្រសួងក៏បានឯកភាពអោយធ្វើការជួសជុលឡើងវិញភ្លាមៗ ដោយចាប់ផ្តើមដាក់គ្រឿងចក្រឈូសឆាយផ្លូវ ដើម្បីអោយប្រជាពលរដ្ឋអាចធ្វើដំណើរឆ្លងកាត់បាន ដោយគ្មានការព្រួយបារម្ម នៅរសៀលថ្ងៃទី១៧ ខែមករានេះ បន្ទាប់មកទើបធ្វើការទប់ជើងទេផ្លូវឡើងវិញ ដើម្បីកុំអោយមានការបាក់ស្រុតតទៅទៀត។
ចែករំលែកព័តមាននេះ