ក្រោយពីមានករណីគ្រោះថ្នាក់ចរាចរណ៍ជាបន្តបន្ទាប់លើចំណុចផ្លូវប្រសព្វ រវាងផ្លូវជាតិលេខ៥៣ និងផ្លូវវាងក្រុង ស្ថិតក្នុងភូមិសាស្ត្រឃុំស្រែថ្មី ស្រុករលាប្អៀររួចមក នៅព្រឹកថ្ងៃទី១៨ ខែមករា ឆ្នាំ២០២៣ សមត្ថកិច្ចចម្រុះបានចុះអប់រំផ្សព្វផ្សាយណែនាំដល់
ខេត្តកំពង់ឆ្នាំង ៖ ក្រោយពីមានករណីគ្រោះថ្នាក់ចរាចរណ៍ជាបន្តបន្ទាប់លើចំណុចផ្លូវប្រសព្វ រវាងផ្លូវជាតិលេខ៥៣ និងផ្លូវវាងក្រុង ស្ថិតក្នុងភូមិសាស្ត្រឃុំស្រែថ្មី ស្រុករលាប្អៀររួចមក នៅព្រឹកថ្ងៃទី១៨ ខែមករា ឆ្នាំ២០២៣ សមត្ថកិច្ចចម្រុះបានចុះអប់រំផ្សព្វផ្សាយណែនាំដល់ប្រជាពលរដ្ឋស្ដីពីច្បាប់ចរាចរណ៍ផ្លូវគោក ដល់អ្នកធ្វើដំណើរដែលឆ្លងកាត់នៅទីនោះ។
លោក ឆាយ លាភា ប្រធានមន្ទីរសាធារណការ និងដឹកជញ្ជូនខេត្តកំពង់ឆ្នាំង បានឲ្យដឹងថាក្រោយពេលកើតហេតុគ្រោះថ្នាក់ចរាចរណ៍ ដែលតែងតែកើតឡើងជាបន្តបន្ទាប់នៅចំណុចផ្លូវប្រសព្វរវាងផ្លូវជាតិលេខ៥៣ និងផ្លូវវាងក្រុង នៅចំណុចភូមិគល់គុប ឃុំស្រែថ្មី រួចមក ឯកឧត្តមអភិបាលខេត្តកំពង់ឆ្នាំង ក៏បានចាត់ឱ្យមន្ត្រីជំនាញចុះទៅពិនិត្យ និងអប់រំដល់អ្នកធ្វើដំណើរឆ្លងកាត់នៅទីនោះ។
ជាក់ស្ដែង នៅព្រឹកថ្ងៃទី១៧ ខែមករានេះ មន្ត្រីជំនាញសុវត្ថិភាពចរាចរណ៍ផ្លូវគោក នៃមន្ទីរសាធារណការ និងដឹកជញ្ជូនខេត្ត បានសហការជាមួយនឹងនគរបាលចរាចរណ៍ផ្លូវគោក បានចុះអប់រំណែនាំដល់ប្រជាពលរដ្ឋដែលជាអ្នកធ្វើដំណើរមាន រថយន្តគោយន្ត ម៉ូតូ ដើម្បីឲ្យស្គាល់ពីស្លាកសញ្ញាចរាចរណ៍ ពីគំនូសចរាចរណ៍លើផ្លូវ ដើម្បីបញ្ជៀសការគ្រោះថ្នាក់ដែលកើតឡើងយថាហេតុ។
លោកប្រធានមន្ទីរសាធារណការ ក៏បានបញ្ជាក់ដែរថា ផ្លូវវាងក្រុង នៅចំណុចផ្លូវប្រសព្វដែលកសាងដោយក្រុមហ៊ុនជប៉ុន គឺមានស្លាកសញ្ញាចរាចរណ៍ត្រឹមត្រូវ មានគំនូសលើថ្នល់ មានស្លាកបន្ថយល្បឿន និងមានផ្លាកឈប់ (stop) នៅចំណុចផ្លូវប្រសព្វ និងមានស្លាកគំនូសបទឆ្វេងបត់ស្ដាំ យ៉ាងត្រឹមត្រូវ។ ប៉ុន្តែគ្រោះថ្នាក់ចរាចរណ៍ដែលកើតឡើងកន្លងមក គឺបណ្ដាលមកពីអ្នកបើកបរមិនគោរពច្បាប់ មិនមើលស្លាក និងគំនូសសញ្ញា នៅលើផ្លូវទើបបណ្ដាលឲ្យកើតគ្រោះថ្នាក់ចរាចរណ៍បែបនេះ។
បើតាមការបញ្ជាក់ពីលោកឧត្តមសេនីយ៍ត្រី កេត យ៉ុង ស្នងការរងនគរបាលខេត្តបានឲ្យដឹងថាចាប់តាំងពីការបើកឱ្យដំណើរការផ្លូវវាងក្រុងនៅថ្ងៃទី២ ខែមករា រហូតដល់ថ្ងៃទី១៧ ខែមករា ឆ្នាំ២០២៣នេះ គឺត្រឹមតែ១៥ថ្ងៃប៉ុណ្ណោះ មានគ្រោះថ្នាក់ចរាចរណ៍បានកើតឡើងចំនួន៧ករណី បណ្ដាលឲ្យមនុស្សស្លា.ប់ម្នាក់ របួសធន់២នាក់ និងខូចខាតរថយន្ត ម៉ូតូ អស់មួយចំនួនផងដែរ៕
ចែករំលែកព័តមាននេះ