កម្ពុជាត្រៀមម្ហូប «ហាទ្បា» សម្រាប់សាសនិកអ៊ិស្លាមចូលរួមកីទ្បាស៊ីហ្គេមលើកទី៣២
- ភ្នំពេញ
រាជធានីភ្នំពេញ ៖ បើតាមប្រធានសមាគមសហគមន៍ចុងភៅកម្ពុជាលោក សុង តេង បានឲ្យដឹងថា
រាជធានីភ្នំពេញ ៖ បើតាមប្រធានសមាគមសហគមន៍ចុងភៅកម្ពុជាលោក សុង តេង បានឲ្យដឹងថា សម្រាប់ការប្រកួតស៊ីហ្គេមដែលកម្ពុជាធ្វើជាម្ចាស់ផ្ទះ យើងក៏បានត្រៀមមុខម្ហូបសម្រាប់បងប្អូនសាសនិកអ៊ិស្លាមផងដែរ នោះគឺម្ហូបហាទ្បា ។ ការថ្លែងបែបនោះធ្វើទ្បើងក្នុងឱកាសដែលក្រុមចុងភៅមកពីប្រទេសម៉ាទ្បេស៊ីធ្វើបទបង្ហាញអំពីម្ហូបហាទ្បាកាលពីថ្មីៗនេះនៅសណ្ឋាគារអូទ្បាំព្យា។
លោក សុង តេង បានថ្លែងអំណរគុណចំពោះបទបង្ហាញអំពីរបៀបធ្វើម្ហូបហាទ្បារបស់ចុងភៅមកពីប្រទេសម៉ាទ្បេស៊ី ហើយការធ្វើបទបង្ហាញនោះវាបានផ្តល់នូវអត្ថប្រយោជន៍ដើម្បីឲ្យចុងភៅវ័យក្មេងរបស់យើងបានស្គាល់ពីមុខម្ហូបហាទ្បានេះ ។
លោកថា សម្រាប់ចុងភៅវ័យក្មេងនៅកម្ពុជា នៅពេលធ្វើម្ហូបហាទ្បាម្តងៗគឺគាត់យកវត្ថុធាតុដើមមកធ្វើតែម្តង ពោលគឺគាត់យកវត្ថុស្រស់ៗមកធ្វើ តែឥទ្បូវយើងបានដឹងថា យើងអាចយកវត្ថុធាតុដើមជាម្សៅជាកញ្ចប់មកប្រើជំនួសវិញ ។ លោកបន្តថា ទោះបីគុណភាពវាមិនដល់ម្ហូបហាទ្បាដែលយើងយកវត្ថុធាតុដើមមកធ្វើ ប៉ុន្តែវាជួយកាត់បន្ថយកម្លាំងពលកម្មសម្រាប់ផ្នែកចុងភៅ រួមទាំងកាត់បន្ថយពេលវេលានៃការចម្អិនថែមទៀត។
លោក សុង តេង បានឲ្យដឹងដែរថា តាមមុខម្ហូបដែលចុងភៅម៉ាទ្បេស៊ីយកមកធ្វើបទបង្ហាញនេះ គឺជាគ្រឿងការី ហើយម្សៅដែលគេយកមកធ្វើម្ហូបនោះគឺជាផលិតផលនៃវត្ថុធាតុដើមដូចគ្នា តែគេបានកែច្នៃឬកិនជាម្សៅរួចហើយ ដូច្នេះវាងាយស្រួលក្នុងការចម្អិន។ លោកក៏បានផ្តាំផ្ញើទៅចុងភៅខ្មែរយើងឲ្យខិតខំស្រាវជ្រាវបន្តទៀតអំពីរបៀបធ្វើម្ហូប ដើម្បីបង្កើនសមត្ថភាពក្នុងការចម្អិនម្ហូប ជាក់ស្តែងដូចជារបៀបធ្វើម្ហូបហាទ្បានេះជាដើម ។
លោកអះអាងថា នៅឱកាសស៊ីហ្គេមនៅកម្ពុជានាពេលខាងមុខនេះ យើងនឹងមានមុខម្ហូបហាទ្បានេះដើម្បីទទួលប្រតិភូកីទ្បាករ ពិសេសប្រតិភូកីទ្បាករដែលជាសាសនិកអ៊ិស្លាម។
ចំណែកមន្ត្រីស្ថានទូតម៉ាទ្បេស៊ីប្រចាំកម្ពុជាក៏បានឲ្យដឹងដែរថា ក្រុមចុងភៅដែលមកធ្វើបទបង្ហាញអំពីរបៀបធ្វើម្ហូបហាទ្បានាពេលនេះ គឺជាប្រតិភូមកពីសមាគមសុខភាពម្ហូបអាហារនៅម៉ាទ្បេស៊ី ហើយជាចុងភៅជំនាញខាងម្ហូបហាទ្បាឬហាទ្បាហ្វូត ។ ពួកគាត់មិនគ្រាន់តែមកបង្ហាញអំពីអ្វីទៅដែលហៅថាហាទ្បានោះទេ ប៉ុន្តែពួកគាត់នៅបានបង្ហាញអំពីបច្ចេកទេសឬរបៀបធ្វើម្ហូបហាទ្បាដល់ចុងភៅនៅកម្ពុជាថែមទៀត។ លោកថា តាមគំនិតឬគោលបំណងដែលពួកគេបានរៀបចំនេះ ដោយសារនាពេលឆាប់ៗមុខនេះ កម្ពុជានឹងធ្វើជាម្ចាស់ផ្ទះកីទ្បាស៊ីហ្គេម។
ដូច្នេះប្រតិភូកីទ្បាមួយចំនួនធំគឺមកពីប្រទេសឬអាចនិយាយថាជាបងប្អូនដែលកាន់សាសនាមូស្លីម ។ អញ្ចឹងហើយយើងក៏បានពិនិត្យនិងទំនាក់ទំនងទៅរាល់សណ្ឋាគារដែលជាកន្លែងស្នាក់នៅរបស់បងប្អូនសាសនិកអ៊ិស្លាមដើម្បីបញ្ជូនហាទ្បាទៅកាន់ពួកគាត់ ។ លោកបន្ថែមថា វាមិនគ្រាន់តែបម្រើឲ្យប្រតិភូកីទ្បាស៊ីហ្គេមនោះទេ ប៉ុន្តែហាទ្បាវានឹងបម្រើផងដែរដល់ភ្ញៀវទេសចរមូស្លីមដែលចូលមកទស្សនាកម្សាន្តនៅកម្ពុជា ដែលយើងគិតថា កាន់តែមានចំនួនច្រើនទ្បើងៗនាពេលខាងមុខ ៕
ចែករំលែកព័តមាននេះ